ميلليون مۇسىرەپوۆ تەاترىنا بۇيىردى

سەمەي قالاسىندا قازاقستاننىڭ حالىق ءارتىسى, مەملەكەتتىك سىيلىقتىڭ يەگەرى, كورنەكتى تەاتر جانە كينو اكتريساسى ءامينا ومىرزاقوۆانىڭ 100 جىلدىعىنا ارنالعان XXVII رەسپۋبليكالىق تەاتر فەستيۆالى مارەگە جەتتى. 20-25 قىركۇيەك ارالىعىندا مادەنيەت جانە سپورت مينيسترلىگى مەن شىعىس قازاقستان وبلىسى اكىمدىگىنىڭ قولداۋىمەن جانە قازاقستان تەاترلارى اسسوتسياتسياسىنىڭ ۇيىمداستىرۋىمەن وتكەن شاراعا 12 تەاتر ۇجىمى ۇزدىك قويىلىمدارىن ۇسىنعان بولاتىن. «وسىدان ءبىر اپتا بۇرىن ەلىمىزدىڭ تۇكپىر-تۇكپىرىنەن كەلگەن ونەرپازدار كەزدەسىپ, تاجىريبەلەرىن ورتاعا سالىپ, فەستيۆالىمىزدىڭ سالتاناتتى اشىلۋى وتكەن ەدى. قاي كەزدە دە قوشتاسۋ قيىن. بۇگىن مىنە, كىل مىقتىلاردىڭ ىشىنەن ويىپ تۇرىپ ورىن العان كىم مىقتىنى, ۇزدىكتەردى انىقتايتىن بولامىز. وسىنداي فەستيۆالدار ءار ونەر يەسىنىڭ تۇلعالىق دامۋىنا جانە وسۋىنە اسەر ەتەدى. ءالى تالاي تەاتر مەرەكەسىندە كەزدەسەتىن بولامىز» دەدى فەستيۆالدىڭ جابىلۋ سالتاناتىندا ءسوز العان قازاقستاننىڭ ەڭبەك ەرى,  كسرو جانە قازاقستاننىڭ حالىق ءارتىسى, قازىلار القاسىنىڭ توراعاسى, قازاقستان تەاترلارى اسسوتسياتسياسىنىڭ پرەزيدەنتى, تەاتر جانە كينو اكتەرى, پروفەسسور ءاسانالى ءاشىموۆ.

جابىلۋ سالتاناتىندا ءامينا ومىرزاقوۆانىڭ ساحنادا ويناعان 30 رولىنەن ءۇزىندى كورسەتىلدى. سالتاناتتى راسىمگە وبلىس اكىمى اپپاراتىنىڭ باسشىسى ازامات مۇحامەدچينوۆ قاتىسىپ: « ۇلى دالانىڭ ۇلى ەسىمىنە اينالعان جەرلەسىمىز, ءامينا انامىزدىڭ 100 جىلدىعىنا وراي ءاسانالى ءاشىموۆ باستاپ كەلگەن بارشا ونەر مايتالماندارىنا زور العىس بىلدىرەمىن. ءاردايىم ەلگە قىزمەت ەتىپ, تەك ونەردىڭ بيىگىنەن كورىنۋلەرىڭىزگە تىلەكتەسپىن» دەپ لەبىزىن جەتكىزىپ, وبلىس جۇرتشىلىعى اتىنان قازىلار القاسىنىڭ توراعاسى ءاسانالى ءاشىموۆ پەن قازىلار القاسىنىڭ بارلىق مۇشەلەرىنە شاپان جاۋىپ, سىي-قۇرمەت كورسەتتى.

سونىمەن, فەستيۆال قورىتىندىسىندا ونەرپازدار مەن ونەر ۇجىمدارى 13 اتالىم جانە شىعىس قازاقستان وبلىسى اكىمىنىڭ ارنايى جۇلدەسىمەن ماراپاتتالدى. ف.دوستوەۆسكي اتىنداعى ورىس دراما تەاترى «پەرىشتە» سپەكتاكلى ءۇشىن «ۇزدىك كوركەمدىك  شەشىم», جان داۋىسى» سپەكتاكلى ءۇشىن فارحات مولداعالي «ۇزدىك رەجيسسۋرا», ء«لايلى-ءماجنۇن» سپەكتاكلىندەگى ء«لايلىنىڭ اناسى جانە كەمپىر» رولدەرى ءۇشىن بوتاگوز ماقسۇتوۆا ء«امينا ومىرزاقوۆا اتىنداعى «ەڭ ۇزدىك ايەل بەينەسى», ء«اليحاننىڭ اماناتى» سپەكتاكلىندەگى ء«اليحان» ءرولى ءۇشىن مەدعات ومىراليەۆ «ۇزدىك ەر ادام بەينەسى», «اباي» سپەكتاكلىندەگى «اباي» ءرولى ءۇشىن باقىتبەك تەمىربەكوۆ «قازاقستاننىڭ تەاتر ونەرىنە قوسقان ۇلەسى ءۇشىن», م.گوركي اتىنداعى مەملەكەتتىك اكادەميالىق ورىس دراما تەاترى «ەۆگەني ونەگين» سپەكتاكلى ءۇشىن «ۇزدىك اكتەرلىك انسامبل», اباي اتىنداعى قازاق مۋزىكالىق دراما تەاترى «احمەتتىڭ اماناتى» سپەكتاكلى ءۇشىن «تاريحي تاقىرىپتى يگەرۋدەگى ىزدەنىستەرى ءۇشىن», وسكەمەندەگى وبلىستىق دراما تەاترىنىڭ اكتەرى ەلدوس ماساليموۆ «قاندى ازۋ» سپەكتاكلىندەگى «بوراش» ءرولى ءۇشىن «ەڭ ۇزدىك ەكىنشى پلانداعى ەر ادام بەينەسى», «تەاتر 180º» سپەكتاكلىندەگى «دوتتي» ءرولى ءۇشىن گۇلميرا جاكيلينا «ەڭ ۇزدىك ەكىنشى پلانداعى ايەل ادام بەينەسى», «بالالىق شاققا ساياحات» سپەكتاكلىنىڭ رەجيسسەرى جانگەلدى سادىقوۆ ء«ۇمىت», «تەاتر 180º» سپەكتاكلى ءۇشىن «Nomad» تەاترى «ۇزدىك دەبيۋت» جانە «داۋىس. داۋ ءىس» سپەكتاكلى ءۇشىن سەمەيدەگى «داريعا-اي» جاستار تەاترى «شىعارماشىلىق جەتىستىكتەرى ءۇشىن» نوميناتسيالارى بويىنشا ماراپاتتالدى.

ال «ەڭ ۇزدىك سپەكتاكل» نوميناتسياسى الماتىداعى ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى «ادامزات» سپەكتاكلى ءۇشىن بەرىلدى. جۇلدە قورى - 1,500 000 تەڭگە.

سونداي-اق, شىعىس قازاقستان وبلىسى اكىمىنىڭ جۇلدە قورى 1,000 000 تەڭگەنى قۇرايتىن ارنايى جۇلدەسى «داريعا-اي» جاستار تەاترىنا تابىستالدى.  

سەمەي