قۇرمەتتى توراعا مىرزا!جوعارى مارتەبەلى دەلەگاتسيا باسشىلارى!
قادىرلى حانىمدار مەن مىرزالار!
قازاقستان رەسپۋبليكاسىنىڭ پرەزيدەنتى رەتىندە تۇڭعىش رەت بىرىككەن ۇلتتار ۇيىمى باس اسسامبلەياسىنىڭ بيىك مىنبەرىنەن ۇندەۋ جولداۋ – مەن ءۇشىن زور مارتەبە.
بىرىككەن ۇلتتار ۇيىمى دۇنيە جۇزىندەگى بارشا ادامزاتتىڭ مۇڭ-مۇقتاجىن قورعايتىن بالاماسى جوق بىرەگەي ءارى امبەباپ ۇيىم جانە ءاردايىم سولاي بولىپ قالا بەرەدى.
ادامزاتتى تالاي سىن-قاتەر مەن قانتوگىستەردەن ساقتاپ كەلە جاتقان ۇيىمنىڭ نەگىزى قالانعانىنا كەلەسى جىلى 75 جىل تولادى.
بۇگىندە ۇلتتار ۇيىمى جاھاندىق دامۋ جانە وركەنيەتتەر ساباقتاستىعىن قامتاماسىز ەتۋدە اسا ماڭىزدى ءرول اتقارىپ كەلەدى.
باس حاتشى انتونيۋ گۋتەرريشتىڭ ءار ادام مەن مەملەكەت تاعدىرىن ورتاق قۇندىلىق دەپ تاۋىپ, نازاردان تىس قالدىرماۋ يدەياسىن قازاقستان تولىق قولدايدى.
الايدا قازىرگى تاڭداعى گەوساياسي جانە گەوەكونوميكالىق وزگەرىستەرگە قاتىستى الاڭداۋشىلىعىمىزعا تولىق نەگىز بار.
بۇل جاعداي 2030 كۇن ءتارتىبىن جۇزەگە اسىرۋ ماقساتىنداعى بىرلەسكەن ءىس-ارەكەتتەرىمىز ءۇشىن كۇردەلى سىناق ەكەنى ايقىن.
مەنىڭ كوزقاراسىم بويىنشا, جاڭا ۇرەيلى جاھاندىق ءومىر شىندىعىنا مىنا نەگىزگى ۇردىستەر ىقپال ەتۋدە.بىرىنشىدەن, كۇن سايىن كۇشەيىپ, شەشىمى تابىلماعان جانجالدار مەن الەمنىڭ ءتۇرلى بولىكتەرىندە احۋالدىڭ ۋشىعۋى ەسكى ءبولۋ سىزىقتارىن قايتا جاڭعىرتىپ, جاڭالارىن تۋىنداتۋدا, وسىنىڭ سالدارىنان الەمدىك دەرجاۆالار كەڭ اۋقىمدى اسكەري تەكەتىرەستىڭ شەگىندە تۇر.
ەكىنشىدەن, بارلىعىمىز جاھاندىق جانە وڭىرلىك سۋبەكتىلەر اراسىنداعى سەنىم تاپشىلىعىنان زارداپ شەگۋدەمىز. بۇل قازىرگى قاۋىپسىزدىك ارحيتەكتۋراسى مەن قارۋ-جاراققا باقىلاۋدىڭ تومەندەۋىنە الىپ كەلسە, وسىنىڭ سالدارىنان قارۋلانۋ ۇدەرىستەرى قايتا ۇدەي ءتۇستى.
وسى سىن-قاتەرلەر شەكتەۋ قويۋ سانكتسيالارىمەن, ساۋدا-ساتتىق سوعىستارىمەن, عارىشتاعى ينتەنسيۆتى باقتالاستىقپەن, تسيفرلى تەحنولوگيالار مەن جاساندى ينتەللەكت سالاسىنداعى باسەكەلەستىكپەن تەرەڭدەي تۇسۋدە. جوعارىدا اتالعان اسپەكتىلەردىڭ ءبارى اسقىنىپ بارا جاتقان جاھاندىق داعدارىستىڭ ۇرەيلى شەگىن قالىپتاستىرۋ-دا.
ۇشىنشىدەن, شيەلەنىسە تۇسكەن الەۋمەتتىك, ەكونوميكالىق جانە تەحنولوگيالىق تەڭسىزدىكتەر, سولتۇستىك پەن وڭتۇستىك اراسىنداعى كۇشەيىپ بارا جاتقان الشاقتىق, سونداي-اق جاقىنداپ قالعان جاھاندىق قارىز داعدارىسى قازىرگى الەمدىك ەكونوميكالىق لاندشافتى بۇرمالاپ كورسەتۋدە.
وسىنىڭ سالدارىنان ءبىز حالىقارالىق ارىپتەستىك پەن ىنتىماقتاستىققا كەسىرىن تيگىزەتىن پروتەكتسيونيزم مەن ۇلتشىلدىق ساياساتتىڭ وسكەنىن كورىپ وتىرمىز.
تورتىنشىدەن, قورشاعان ورتانىڭ ازىپ-توزۋى الەمدەگى تۇراقسىزداندىرۋ فاكتورلارىنىڭ بىرىنە اينالىپ وتىر.ورتالىق ازيا كليماتىنىڭ وزگەرۋىنە ىقپال ەتۋ, اتاپ ايتقاندا, شولەيتتەنۋ, مۇزدىقتاردىڭ ەرۋى جانە ودان كەيىنگى اۋىز سۋ مەن سۋارمالى سۋلار رەسۋرستارىنىڭ ازايۋى سەكىلدى ەكزيستەنتسيالدىق سيپاتتاعى ايتارلىقتاي اۋىر پروبلەمالارعا الىپ كەلەدى.
وسىنداي كۇردەلى جاعدايدا قازاقستان كەڭ اۋقىمدى جانە ورنىقتى دامۋ, جان-جاقتى ديالوگ پەن بەيبىت كۇش-جىگەر تانىتۋ ساياساتىن تاباندى جۇرگىزۋدە.
توراعا مىرزا!
يادرولىق قارۋدان ازات الەمگە قول جەتكىزۋ مەنىڭ ەلىم ءۇشىن باستى باسىمدىق بولىپ قالا بەرەدى. بۇل ۇمتىلىس بىزگە يادرولىق قارۋدى جويۋ جولىنداعى جاھاندىق قوزعالىستىڭ الدىڭعى شەبىندە بولۋعا مورالدىق قۇقىق بەرە وتىرىپ, قازاق حالقىنىڭ جالپىۇلتتىق بىرتەكتىگىنىڭ اجىراماس بولىگىنە اينالدى. ءبىز بۇگىندە يادرولىق قارۋ باسىمدىق ەمەس, كەرىسىنشە, جاھاندىق بەيبىتشىلىك پەن تۇراقتىلىققا قاتەر توندىرەتىن الاپات ەكەنىنە نىق سەنىمدىمىز.
وكىنىشكە قاراي, كەيبىر ەلدەر ءالى دە بولسا وزدەرىنىڭ ستراتەگيالىق قاۋىپسىزدىگىنىڭ نەگىزى رەتىندە يادرولىق ارسەنالدارىنا ارقا سۇيەپ, باسەكەلەستەرىن اسيممەتريالىق جاۋاپ ىزدەۋگە يتەرمەلەپ وتىر. قازاقستان وسى بۇرمالانعان ۇستانىمداردى وزگەرتۋ جولىندا جالىقپاي-تالماي ۇلگى كورسەتە جۇمىس جۇرگىزىپ كەلەدى.
قازاقستان تۇڭعىش پرەزيدەنت نۇرسۇلتان نازارباەۆتىڭ ءتيىمدى باسشىلىعىمەن سەمەي پوليگونىن جاپتى جانە قۋاتى جاعىنان الەمدەگى ءتورتىنشى يادرولىق ارسەنالدان ءوز ەركىمەن باس تارتتى.بۇل ءىس-قيمىل ءبىزدىڭ يادرولىق قارۋسىزدانۋ مەن ونى تاراتپاۋ سالاسىنداعى ۇزاق ءارى تابىستى جاھاندىق كوشباسشىلىق جولىمىزداعى تۇڭعىش قادامىمىز بولدى.
بۇل يگى ىسكە كومەكتەسۋدىڭ باسقا دا ءىس-شارالارى اراسىنان ورتالىق ازيادا يادرولىق قارۋدان ازات ايماق قۇرۋ, ماگاتە-ءنىڭ تومەن بايىتىلعان ۋران بانكىن ورنالاستىرۋ, يادرولىق سىناقتارعا قارسى ءىس-قيمىلدىڭ حالىقارالىق كۇنى تۋرالى باس اسسامبلەيانىڭ قارارىن قابىلداۋ جانە جۋىرداعى يادرولىق قارۋعا تىيىم سالۋ تۋرالى شارتتى راتيفيكاتسيالاۋدى اتاپ وتكىم كەلەدى.
بارشامىز قاۋىپسىز بولاشاق جولىنداعى جول كارتاسى رەتىندە يادرولىق قارۋدان ازات الەم قۇرۋ تۋرالى جالپى دەكلاراتسيانى تاباندىلىقپەن ىلگەرىلەتۋگە ءتيىستىمىز.
ءبىز سونداي-اق يادرولىق قارۋدان ازات جانە سول سياقتى جاڭا ايماقتار قۇرۋعا, اۋماقتار اراسىنداعى ارىپتەستىكتى كەڭەيتۋگە ۇمتىلۋىمىز كەرەك.
قازاقستان يران بويىنشا ءىس-قيمىلدىڭ جانە كورەي تۇبەگىن دەنۋكلەاريزاتسيالاۋدىڭ جان-جاقتى بىرىككەن جوسپارى توڭىرەگىندەگى اعىمداعى ماسەلەلەردى بارلىق مۇددەلى تاراپتاردىڭ الاڭداۋشىلىعى مەن مۇددەلەرىن ەسەپكە الاتىن ەرەكشە ساياسي قۇرالدار ارقىلى رەتتەۋ قاجەت دەپ سانايدى.
قۇرمەتتى دەلەگاتتار!
مەنىڭ ەلىم ءاردايىم الەمدىك ارەناداعى پرەۆەنتيۆتى ديپلوماتيا مەن ارااعايىندىقتىڭ دايەكتى جاقتاۋشىسى بولدى.
سوناۋ 1992 جىلى قازاقستاننىڭ تۇڭعىش پرەزيدەنتى وسى مىنبەردەن قاۋىپسىزدىك ماسەلەسىن شەشۋدىڭ ۇجىمدىق تاسىلىنە ارنالعان الاڭ رەتىندە ازياداعى ءوزارا ءىس-قيمىل جانە سەنىم شارالارى جونىندەگى كەڭەس شاقىرۋدى ۇسىندى. ۋاقىت وتە اوسشك ءوزىنىڭ قاجەتتىلىگى مەن ومىرشەڭدىگىن دالەلدەدى. ءبىز بۇل ۇدەرىستى قولداعان بارشا سەرىكتەستەرىمىزگە العىس ايتامىز.
ازيانىڭ ءوسىپ كەلە جاتقان ەكونوميكالىق قۋاتى قۇرلىقتىق قاۋىپسىزدىكتىڭ اناعۇرلىم بىرىكتىرىلگەن ارحيتەكتۋراسىن تالاپ ەتەدى.
اوسشك-ءنى قاۋىپسىزدىك پەن دامۋ بويىنشا تولىققاندى وڭىرلىك ۇيىم رەتىندە قايتا قۇرۋدىڭ ۋاقىتى كەلدى. ءبىز 2020 جىلى اوسشك توراعاسى رەتىندە ءوز كۇشىمىزدى وسى باعىتتا شوعىرلاندىرامىز.
بۇۇ قاۋىپسىزدىك كەڭەسىنىڭ تۇراقتى ەمەس مۇشەسى مارتەبەسىندە وتكەن ەكى جىل ىشىندە ءبىز بەيبىتشىلىك ءىسىن جاقتايتىنىمىزدى راستاي وتىرىپ, قاۋىپسىزدىكتى نىعايتۋعا, تاراتپاۋعا جانە وڭىرلىك ارىپتەستىككە نازار اۋداردىق.
قازاقستان ليۆانداعى بۇۇ ۋاقىتشا كۇشتەرىنىڭ اياسىندا ۇندىستاندىق سەرىكتەستەرمەن بىرگە 120 اسكەري قىزمەتكەردەن تۇراتىن بولىمشەسىن جىبەرۋ, سونداي-اق اسكەري باقىلاۋشىلارىن باعىتتاي وتىرىپ, بۇۇ-نىڭ بىتىمگەرلىك وپەراتسيالارىنا ۇلەس قوستى.
ءبىز قازاقستاننىڭ دىندەر مەن وركەنيەتتەر ۇنقاتىسۋىنىڭ جاھاندىق ورتالىعىنا اينالعانىن ماقتان تۇتامىز. 2003 جىلدان باستاپ ەلىمىز بۇۇ قولداۋىمەن ءار 3 جىل سايىن الەمدىك جانە ءداستۇرلى دىندەر كوشباسشىلارىنىڭ سەزىن شاقىرۋ قۇرمەتىنە يە بولدى.
حانىمدار مەن مىرزالار!
ءبىز بارلىعىمىز ءوزارا وشپەندىلىك پەن وزبىرلىقتان جاپا شەگىپ جاتقان ادامزات وركەنيەتىنىڭ بەسىگى – تاياۋ شىعىستاعى وقيعالاردىڭ ءورىس الۋىنا قاۋىپتەنە قارايمىز. وسىعان وراي ءبىز بەيبىتشىلىك ورناتۋعا جانە سەنىمدى نىعايتۋعا ارنالعان ومىرشەڭ شەشىمدەر ىزدەۋگە باعىتتالعان ەكىجاقتى جانە كوپجاقتى ءىس-قيمىلداردى قولداۋعا دايىنبىز.
ينكليۋزيۆتىك ديالوگتى جاقتاۋدىڭ جاقسى مىسالى رەتىندە قازاقستان سيريالىق كەلىسىمگە ارنالعان الاڭ ۇسىندى. سوعان سايكەس ءبىزدىڭ استانامىزدا ون ءۇش راۋند ءوتتى.
جەنەۆا كەلىسىمىن تولىقتىراتىن استانا پروتسەسى ارقىلى اسكەري ءىس-قيمىلداردى توقتاتۋعا قول جەتكىزىلدى. سونداي-اق بوسقىنداردىڭ قايتۋ قاۋىپسىزدىگىنە ارنالعان جاعداي ءۇشىن دەەسكالاتسيا ايماعى قۇرىلدى.
بارشامىز جانجالدىڭ قيراتۋشى كۇشى بار ەكەنىن جانە تەرروريزم مەن ەكسترەميزمدى تۋدىراتىنىن بىلەمىز. بۇل قاۋىپ-قاتەردى بۇۇ-نىڭ جاھاندىق تەرروريزمگە قارسى جەلىسىنىڭ قامقورلىعى اياسىنداعى بىرلەسكەن ءىس-قيمىلمەن عانا جەڭۋگە بولادى.
كونترتەرروريستىك ءىس-شارالار رەتىندە قازاقستان بۇۇ-نىڭ 2045 جىلى بولاتىن 100 جىلدىعى قارساڭىندا تەرروريزمنەن ازات الەمگە قول جەتكىزۋ بويىنشا مىنەز-ق ۇلىق كودەكسى باستاماسىن كوتەردى جانە وعان قوسىلۋعا شاقىردى.
بيىل قازاقستان ءبىزدىڭ حالىقارالىق سەرىكتەستەرمەن ارىپتەستىك اياسىندا «جۋسان» ارنايى گۋمانيتارلىق ميسسياسىن تابىستى وتكىزدى. ناتيجەسىندە تەرروريستىك ۇگىت-ناسيحاتتىڭ تۇزاعىنا تۇسكەن 595 قازاقستاندىق, ونىڭ ىشىندە 406 بالا سيرياداعى اسكەري ءىس-قيمىلدار ايماعىنان ۇيىنە قايتا ورالدى. ءبىز ءوز تاجىريبەمىزدى باسقا ەلدەرمەن بولىسۋگە جانە ولاردى بالامالى قادام قابىلداۋعا شاقىرامىز.
توراعا مىرزا!
ونجىلدىقتار بويى ورتالىق ازيا مەملەكەتتەرىنىڭ ەكونوميكالىق بايلانىسى ءالسىز بولدى, بۇل ولاردىڭ تۇراقتى وسۋىنە كەدەرگى كەلتىردى. قازىر ورتاق مۇددەلەر مەن سىن-قاتەرلەرگە قاراي ءبىزدىڭ ايماعىمىز دامۋدىڭ جاڭا ساتىسىنا قادام باستى.
بۇل ورايدا ايماقتاعى بارلىق بەس ەلدىڭ اراسىنداعى تىعىز ءارى سىندارلى ساياسي ديالوگ ساۋدا, ەكونوميكالىق, ينۆەستيتسيالىق جانە ادامزاتتىق قارىم-قاتىناستارعا وڭ ىقپالىن تيگىزەتىن بولادى. ايماق ءۇشىن جاڭا مۇمكىندىكتەر وتكەن جىلى ءبىزدىڭ استانامىزدا وتكىزىلگەن العاشقى جوعارى دەڭگەيدەگى بەيرەسمي كونسۋلتاتسيالاردان كەيىن پايدا بولدى.
مەن ورتالىق ازيانىڭ «جاھاندىق اكتسيونەرگە» اينالاتىنىنا نىق سەنىمدىمىن. ءبىزدى ورتاق تاريحي جانە مادەني مۇرالاردىڭ بەرىك ءجىبى, سونىمەن قاتار ورتاق بولاشاق بايلانىستىرادى. قازاقستان ورتالىق ازيانىڭ اسا ءىرى ەكونوميكاسى رەتىندە بولاشاقتا بارلىق مەملەكەتتەرمەن ارادا ءوزارا ءتيىمدى قارىم-قاتىناستى نىعايتۋعا اسا مۇددەلى.
ءبىزدىڭ ايماققا اۋعانستانداعى احۋال تىكەلەي اسەر ەتەدى. ءبىز اۋعاندىقتارعا تيەسىلى جانە ولار باسقاراتىن بەيبىت پروتسەسس, بارلىق نەگىزگى مۇددەلى تاراپتاردىڭ اتسالىسۋىمەن وسى ەلدە تۇراقتى بەيبىتشىلىك پەن گۇلدەنۋدى قامتاماسىز ەتەدى دەپ ۇمىتتەنەمىز.
قازاقستان اۋعان حالقىنا ءوز مەملەكەتىن قالپىنا كەلتىرۋدە قولداۋ كورسەتۋدى جالعاستىرادى. بەرىك جاھاندىق جانە ايماقتىق ارىپتەستىك, ۇزاقمەرزىمدى ينۆەستيتسيالار مەن ايماقتىق توعىسۋ بۇل ەلدىڭ بەيبىت بولاشاعىن قالىپتاستىرۋدا شەشۋشى ماڭىزعا يە.
قۇرمەتتى دەلەگاتتار!
بۇۇ-نىڭ نەگىزگى مىندەتىن ورىنداۋ قابىلەتى وتكىر سىناقپەن بەتپە-بەت كەلىپ وتىر.
وسى سەبەپكە بايلانىستى باس حاتشىنىڭ بۇۇ-نى رەفورمالاۋ تۋرالى باتىل ءارى ناقتى ۇستانىمى مۇشە مەملەكەتتەردىڭ بارلىعىنىڭ كەڭ قولداۋىنا لايىق.
ءبىز ورتاشا تابىسى بار ەلدەردىڭ دۇرلىككەن تۇزاعىنا تۇسپەۋگە تىرىسىپ, 2030 جىلعا دەيىنگى كۇن ءتارتىبىن تولىق يمپلەمەنتاتسيالاۋعا ەرەكشە نازار اۋدارامىز.
تۇراقتى دامۋ ماقساتتارىنىڭ 80%-ى ءبىزدىڭ ستراتەگيالىق مەملەكەتتىك باعدارلامالارىمىزبەن ىقپالداسقان.
وسى جىلدىڭ مامىر ايىندا مەن قازاقستانداعى حالىقارالىق ۇيىمداردىڭ جاڭا عيماراتىن اشتىم. وندا بۇۇ-نىڭ 16 اگەنتتىگى ورنالاستى.
كەلەسى قادام رەتىندە ءبىز سونىڭ بازاسىندا تۇراقتى دامۋ ماقساتتارى بويىنشا ورتالىق ازيا ەلدەرى مەن اۋعانستانعا قولداۋ كورسەتۋ مانداتى بار بۇۇ-نىڭ ورتالىعىن قۇرۋدى ۇسىنامىز.
ەۋرازياداعى اسا ءىرى ترانزيتتىك-كولىك تەرريتوريالارىنىڭ ءبىرى بولىپ تابىلاتىن قازاقستان ەۋرازيالىق ەكونوميكالىق وداقتىڭ قاتىسۋشىسى جانە ء«بىر بەلدەۋ, ءبىر جولدىڭ» سەنىمدى ارىپتەسى رەتىندە ءاردايىم ترانسقۇرلىقتىق ساۋدانى ىلگەرىلەتۋ بويىنشا شەشۋشى ءرول اتقاراتىن بولادى.
حانىمدار مەن مىرزالار!
وسى كۇردەلى ۋاقىتتا ءبىز «ساباقتاستىق, ادىلدىك, دامۋ» دەگەن ۇرانمەن قوعامىمىزدى جان-جاقتى جاڭعىرتۋ جولىمەن العا جىلجۋدى جالعاستىرۋىمىز كەرەك.
مەنىڭ قازاقستاننىڭ ساياسي جۇيەسىندەگى فورمۋلام – بۇل قۋاتتى ءارى الىستى كورەتىن پرەزيدەنت, ىقپالدى پارلامەنت جانە ەسەپ بەرۋشى ۇكىمەت. مەن بۇل تۇجىرىمداما ءبىزدىڭ ۇلتىمىزدىڭ نەگىزگى قاجەتتىلىكتەرىنە جاۋاپ قايتاراتىنىنا جانە ونىڭ بەيبىت ءارى تۇراقتى بولاشاعىنا كەپىلدىك بەرەتىنىنە نىق سەنىمدىمىن.
جاڭا پرەزيدەنت رەتىندە مەن ءبىرىنشى كەزەكتە جالپىعا ورتاق يگىلىكتى زاماناۋي مەملەكەت قۇرۋدى كوزدەيمىن.
مەنىڭ نەگىزگى ماقساتىم ءوزىمنىڭ ميلليونداعان وتانداسىمنىڭ كەڭ اۋقىمدى رەفورمالاردىڭ تيىمدىلىگىن كادەسىنە جاراتۋىنا, ينكليۋزيۆتى قوعامنىڭ, قارقىندى ەكونوميكانىڭ, جوعارى ساپالى ءبىلىم بەرۋدىڭ جانە وزىق دەنساۋلىق ساقتاۋدىڭ جەمىسىن كورۋىنە جاعداي جاساۋ بولىپ تابىلادى.
قازاقستان تەرەڭ ساياسي وزگەرىستەردى سوڭىنا دەيىن جۇرگىزبەيىنشە ءوزىنىڭ الەۋمەتتىك-ەكونوميكالىق دامۋىندا تابىسقا جەتە المايدى.
سونىمەن قاتار قازاقستاندا دەموكراتيا ءالى دە دامۋ پروتسەسىندە ەكەنىن جانە ۇنەمى تالداۋدى تالاپ ەتەتىنىن ەستە ساقتاعان ءجون. ءبىز وڭ تاجىريبەگە سۇيەنىپ جانە وتكەننىڭ قاتەلىكتەرىنەن ساباق الا وتىرىپ, ءاردايىم ونى جەتىلدىرۋدىڭ جولىن ىزدەستىرەمىز.
ءوزىمنىڭ رەفورمالىق باعدارلامالارىمنىڭ اياسىندا مەن ۇكىمەت پەن قوعامنىڭ اراسىنداعى سىندارلى ۇنقاتىسۋعا ىقپال ەتۋ ءۇشىن ۇلتتىق قوعامدىق سەنىم كەڭەسىن قۇردىم.
مەنىڭ ۇستانىمىم «الۋان پىكىر – ءبىر ۇلت» قاعيداسىنا نەگىزدەلگەن. وسىلايشا ءتۇرلى پىكىر الماسۋ مەن ۇنقاتىسۋ ارقىلى ءبىز العا جىلجۋىمىز كەرەك.
بارلىق سالادا جانە ازاماتتارىمىزدىڭ كۇندەلىكتى ومىرىندە زاڭنىڭ ۇستەمدىگىن قامتاماسىز ەتۋ ءۇشىن قۇقىق قورعاۋ ورگاندارى مەن سوتتارعا ماڭىزدى وزگەرىستەردىڭ اسەرى بولادى.
پوپۋليزم – دارىنسىز ساياسات. مەن قۇرعاق ۋادە بەرۋگە ەمەس, ناقتى جۇمىستاردى جۇزەگە اسىرۋعا مۇددەلىمىن. مەن ءوزىمنىڭ رەفورمالىق باعدارلامالارىمدى تياناقتى جۇزەگە اسىرامىن.
حانىمدار مەن مىرزالار!
كەلەسى جىلى بۇۇ قاۋىمى ءوز تاريحىنداعى ماڭىزدى بەلەستى اتاپ وتەدى.
بۇل وقيعا ءبىزدىڭ وشپەندىلىكتى, سەنىمسىزدىكتى جانە جاۋگەرشىلىكتى جويۋ جولىنداعى كەڭ اۋقىمدى حالىقارالىق ارىپتەستىگىمىز بويىنشا ورتاق كۇش-جىگەرىمىزگە جاڭا سەرپىن بەرۋگە ءتيىس.
مەن حالىقارالىق قوعامداستىق پەن ءبىزدىڭ بارلىق ارىپتەستەرىمىزدى قاۋىپسىزدىككە, ارىپتەستىككە جانە ءوزارا سەنىمگە باعىتتالعان بەيبىتشىلىكتى نىعايتۋ ءۇشىن بىرىگۋگە شاقىرامىن.
بارشامىز بولاشاق ۇرپاقتاردىڭ جاڭا ەكونوميكا مەن تەحنولوگيانى دامىتۋعا ءادىل قاتىسۋىن قامتاماسىز ەتۋ ءۇشىن قامقور بولۋىمىز كەرەك.
ءبىز قورشاعان ورتاعا قامقورلىق كورسەتىپ, عىلىمي دامۋدى ىلگەرىلەتىپ, بارشاعا ارنالعان ءبىلىم بەرۋ مەن دەنساۋلىق ساقتاۋعا قول جەتكىزۋگە كەپىلدىك تانىتۋىمىز كەرەك.
كەلە جاتقان ۇرپاقتىڭ بولاشاعى ءبىزدىڭ قازىرگى نازىك الەمىمىزدەگىدەن الدەقايدا جاقسى بولۋعا لايىق.
حالىقارالىق قوعامداستىقتىڭ جاۋاپتى مۇشەسى بولا وتىرىپ, قازاقستان بەيبىتشىلىك پەن قۇقىقتىق قامتاماسىز ەتۋ, ادامنىڭ ار-نامىسى مەن يگىلىگىن ىلگەرىلەتۋ جونىندەگى ۇجىمدىق كۇش-جىگەرگە بارىنشا ۇلەس قوسۋىن جالعاستىرادى.
نازار اۋدارعاندارىڭىزعا راحمەت!