شىمكەنتتە قازاقستان مەن وزبەكستان جاستارىنىڭ قاتىسۋىمەن «دارىندى جاستار – ەل تىرەگى» تاقىرىبىندا حالىقارالىق فورۋم ءوتتى. وعان كورشىلەس وزبەكستاننان جانە نۇر-سۇلتان, الماتى, شىمكەنت قالالارى مەن تۇركىستان وبلىسىنان بارلىعى 800-دەن استام جاس جينالدى.
ەلىمىزدەگى جاستار جىلى اياسىندا وتكەن فورۋمدى قازاقستان وزبەكتەرى ەتنومادەني بىرلەستىكتەرى «دوستىق» قاۋىمداستىعى مەن شىمكەنت قالالىق قازاقستان حالقى اسسامبلەياسى ۇيىمداستىردى. جيىنعا قازاقستان حالقى اسسامبلەياسى توراعاسىنىڭ ورىنباسارى شەرزود پۋلاتوۆ, وزبەكستاننىڭ قازاقستانداعى توتەنشە جانە وكىلەتتى ەلشىسى سايديكرام نيازحودجاەۆ قاتىستى.
فورۋمدا ەكى ەل جاستارى اراسىنداعى دوستىقتى نىعايتۋ ماسەلەلەرى قارالىپ, جاستاردىڭ 10-نان استام يننوۆاتسيالىق جوباسى مەن جەتىستىكتەرى تانىستىرىلدى.
«قازاقستاننىڭ وزبەكستانداعى جىلى جانە قازاقستانداعى جاستار جىلىن ساباقتاستىرا ۇيىمداستىرىلعان فورۋم ەكى ەلدىڭ جاستارى اراسىنداعى ءوزارا تۇسىنىستىككە ىقپال ەتەرى ءسوزسىز. ۇزدىك جوبالاردى تانىستىرۋعا باعىتتالعان ءىس-شارالار ءبىر-بىرلەرىمەن تاجىريبە الماسۋعا زور مۇمكىندىك بەرەدى. بيىل قازاقستانداعى جاستار جىلى اياسىندا جاڭا باعدارلامالىق قۇجاتتار مەن جوبالار ءساتتى ىسكە اسىرىلۋدا. يگى باستامالارعا ەلدەگى بىرلىك پەن بەرەكەنىڭ ۇيىتقىسىنا اينالعان قازاقستان حالقى اسسامبلەياسى دا ەلەۋلى ۇلەس قوسىپ كەلەدى, – دەدى جيىندا ءسوز سويلەگەن قازاقستان حالقى اسسامبلەياسى توراعاسىنىڭ ورىنباسارى ش.پۋلاتوۆ.
ال ەكى ەل اراسىنداعى سان عاسىرلىق دوستىعىمىز بەن ىنتىماقتاستىعىمىزدىڭ ودان ءارى بەكي تۇسكەنىن ايتقان وزبەكستان ەلشىسى سايديكرام نيازحودجاەۆ جاستار اراسىندا وسىنداي باسقوسۋلاردىڭ ءجيى ۇيىمداستىرىلا باستاعانىنا قۋاناتىنىن جەتكىزدى.
فورۋم سوڭىندا شىمكەنت قالالىق قحا توراعاسىنىڭ ورىنباسارى ءمۇراتالى قالمۇراتوۆ پەن قازاقستان وزبەكتەرى ەتنومادەني بىرلەستىكتەرى «دوستىق» قاۋىمداستىنىڭ توراعاسى يكرام حاشيمجانوۆ بەلسەندى جاستارعا ەرەكشە قۇرمەت كورسەتىپ, سەرتيفيكاتتار مەن سىيلىقتار تابىستادى.
شىمكەنت