قاراعاندى وبلىسى اكىمىنىڭ ورىنباسارى ابزال نۇكەنوۆ ە.بوكەتوۆ اتىنداعى قارمۋ-دىڭ ستۋدەنتتەرىنە مەملەكەت باسشىسىنىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىن ءتۇسىندىرۋ بويىنشا ءدارىس وقىدى.
ەركىن پىشىمدە وتكەن كەزدەسۋ بارىسىندا بولاشاق ساياساتتانۋشىلار, پسيحولوگتار, جۋرناليستەر جانە الەۋمەتتانۋشىلار وبلىس اكىمىنىڭ ورىنباسارىنا وزدەرىن قىزىقتىرعان سۇراقتارىن قويىپ, ولارعا تولىققاندى جاۋاپ الدى.
ابزال نۇكەنوۆ ەلىمىزدىڭ قالىپتاسقان مەملەكەتتىڭ جاڭا ساياسي باعىتىنا اينالعان «قازاقستان-2050» ستراتەگياسى اياسىندا دامىپ كەلە جاتقانىن اتاپ ءوتتى.
– ەرتەڭ سىزدەر ءوز سالالارىڭىزدىڭ ماماندارى بولاسىزدار جانە ەلىمىزدىڭ دامۋىنا ۇلەس قوساسىزدار. سوندىقتان بۇل ستراتەگيالار ءبىزدىڭ بولاشاعىمىزدى ايقىنداۋعا كومەكتەسەدى. سىزدەر, ءبىزدىڭ جاستارىمىز, مەملەكەتتىڭ دامۋى ءۇشىن قانداي باعىتتا ىلگەرىلەۋ كەرەكتىگىن تۇسىنۋلەرىڭىز قاجەت. تەك سوندا عانا سىزدەر قازاقستاننىڭ تۇراقتىلىعى مەن وركەندەۋى ءۇشىن نە قاجەت ەكەنىن ناقتى بىلەتىن بولاسىزدار, – دەدى ول.
كەزدەسۋ سوڭىندا وبلىس اكىمىنىڭ ورىنباسارى ۋنيۆەرسيتەتتە جۇمىسىنا قىزىعۋشىلىق تانىتقان مەملەكەتتىك ورگان قىزمەتكەرلەرى دە قاتىسا الاتىن پىكىرتالاس الاڭىن – جاستاردىڭ زياتكەرلىك كلۋبىن قۇرۋدى ۇسىندى.
قاراعاندى وبلىسى