قازاقستان حالقى اسسامبلەياسى مەن قازاقستان وزبەكتەرى ەتنومادەني بىرلەستىكتەرىنىڭ «دوستىق» قاۋىمداستىعى ۇيىمداستىرعان شارادا وزبەك حالقىنىڭ ۇلتتىق تاعامدارى مەن قولونەر بۇيىمدارىنىڭ كورمەسى ۇيىمداستىرىلىپ, ارنايى كونتسەرتتىك باعدارلاما كوپشىلىكتىڭ نازارىنا ۇسىنىلدى. مەرەكەلىك شاراعا كورشىلەس وزبەكستان, قىرعىزستان, تاجىكستان جانە ەلىمىزدىڭ بارلىق ايماعىنان قوناقتار قاتىستى.
كوپشىلىك الدىندا قۇتتىقتاۋ ءسوز سويلەگەن قازاقستان حالقى اسسامبلەياسى توراعاسىنىڭ ورىنباسارى شەرزود پۋلاتوۆ, وزبەكستاننىڭ قازاقستانداعى توتەنشە جانە وكىلەتتى ەلشىسى سايديكرام نيازحودجاەۆ جانە ەكى ەلدىڭ زيالى قاۋىم وكىلدەرى ەلدىڭ بەرەكەلى بىرلىگىن نىعايتۋدىڭ ماڭىزىنا توقتالدى.
– ەلىمىزدى مەكەندەگەن ءتۇرلى ەتنوس وكىلدەرىن كوك تۋدىڭ استىنا جيناپ, ەل تىنىشتىعىن, بەرەكە-بىرلىگىن ساقتادىق. بۇل جەتىستىككە قازاق حالقىنىڭ كەڭ ىقىلاس-پەيىلىنىڭ, باۋىرمال دوستىعىنىڭ ارقاسىندا جانە ەل باسقارعان ازاماتتاردىڭ سارابدال ساياساتىنىڭ ناتيجەسىندە قول جەتكىزدىك. وسى باعىتىمىزدان تايماي, ءبىر ءۇيدىڭ بالاسىنداي جۇمىلا جۇمىس ىستەسەك, تالاي اسۋلاردى باعىندىرارىمىز ءسوزسىز, – دەدى جيىندا ءسوز سويلەگەن قوعام قايراتكەرى روزاقۇل حالمۋرادوۆ.
وزبەكستاننىڭ قازاقستانداعى توتەنشە جانە وكىلەتتى ەلشىسى سايديكرام نيازحودجاەۆ قازاقستاندا بارشا ەتنوستىڭ ءتىلى مەن مادەنيەتىنىڭ ساقتالۋىنا بارىنشا جاعداي جاسالعانىنا ريزاشىلىعىن ءبىلدىرىپ, مۇنداعى يگى باستامالار جالپى تۇركى الەمىنە ۇلگى ەكەنىن تىلگە تيەك ەتتى.
ايتا كەتۋ كەرەك, ميلليوننان استام تۇرعىننىڭ ورتاق شاڭىراعى بولعان شىمكەنت قالاسى جۇرتشىلىعىنىڭ 17 پايىزدان استامىن وزبەك ەتنوسىنىڭ وكىلدەرى قۇرايدى.
قالادا وزبەك ەتنومادەني بىرلەستىگى 1989 جىلى قۇرىلىپ, وتىز جىلعا جۋىق ۋاقىت بويى تۇركىستان وبلىسىنىڭ قوعامدىق-ساياسي, مادەني ومىرىنە بەلسەنە ارالاستى.
بىلتىر وسى ەتنومادەني بىرلەستىك قالالىق مارتەبەسىن الىپ, وسىنداعى 178 مىڭ وزبەك ەتنوسى وكىلدەرىنىڭ قازاقستاندىق قوعامنىڭ ورتاق قۇندىلىقتارىن قاستەرلەۋىنە ۇيىتقى بولىپ وتىر.
بىرلەستىك جانىنداعى اقساقالدار القاسى, جاستار قاناتى, «باحور», «فەرۋز» شىعارماشىلىق ۇجىمدارى شىمكەنتتىڭ دارا ءداستۇرىن جالعاپ, قوعامدىق-مادەني تۇرمىسىن بايىتىپ كەلەدى.
شىمكەنت