مۇحتار تىلەۋبەردى سىرتقى ىستەر مينيسترلەرىنىڭ بەيرەسمي كەزدەسۋىنە قاتىستى

كەزدەسۋ قاتىسۋشىلارى اعىمداعى جىلدىڭ ماۋسىم ايىندا دۋشانبە قالاسىندا وتكەن اوسشك 5-ءشى ءسامميتىنىڭ قورىتىندىسىن تالقىلادى, ال ءىس-شارانىڭ دەكلاراتسياسىندا ازياداعى قاۋىپسىزدىك پەن ىنتىماقتاستىقتىڭ نەگىزگى ماسەلەلەرى جونىندەگى كەڭەس مۇشەلەرىنىڭ ۇستانىمدارى مەن كوزقاراستارى كورىنىس تاپتى, سونداي-اق, قازاقستاننىڭ تۇڭعىش پرەزيدەنتى - ەلباسى نۇرسۇلتان نازارباەۆتىڭ اوسشك نەگىزىن قالاۋشى رەتىندەگى جەكە ءرولى جانە ونىڭ كەڭەس الەۋەتىن ارتتىرۋعا قوسقان ەلەۋلى ۇلەسى اتاپ ءوتىلدى.

اوسشك-تەگى قازاقستاننىڭ الداعى توراعالىعىنا ەرەكشە نازار اۋدارىلدى. سىرتقى ىستەر ءمينيسترى مۇحتار تىلەۋبەردى 2020-2022 جىلدارى قازاقستاننىڭ توراعالىق ەتۋگە كەڭەستە ارنالعان ءوتىنىمىن ءبىراۋىزدان قولداعانى ءۇشىن اوسشك مۇشە مەملەكەتتەرىنە العىس ءبىلدىردى.

دەلەگاتسيا باسشىلارى قازاقستاندى اوسشك-ءتىڭ كەلەسى توراعاسى رەتىندە قۇتتىقتاپ, كەڭەس شەڭبەرىندە ىنتىماقتاستىقتى دامىتۋداعى ەلىمىزدىڭ جەتەكشى ءرولىن اتاپ ءوتتى.

مينيستر ءوز سوزىندە اوسشك-ءتى دامىتۋ كوزقاراسىمەن جانە فورۋمعا توراعالىق ەتۋ كەزەڭىندە قازاقستاننىڭ نازارىن اۋداراتىن باسىمدىقتارىمەن ءبولىستى. ولاردىڭ قاتارىندا – اوسشك-ءتى دايەكتى ينستيتۋتسيونالدىق دامىتۋ, سەنىم شارالارى كاتالوگىنىڭ بەس ولشەمىنىڭ شەڭبەرىندە فورۋمنىڭ قىزمەتىن مازمۇندى تولىقتىرۋ, سونداي-اق باسقا دا حالىقارالىق جانە وڭىرلىك ينستيتۋتتارمەن ءوزارا ءىس-قيمىلدى ودان ءارى كۇشەيتۋ.

اوسشك قىزمەتىنىڭ قازىرگى زامانعى سىن-قاتەرلەر جاعدايىندا جوعارى وزەكتىلىگى جانە زور ەكونوميكالىق جانە ادامي الەۋەتكە يە ازياداعى قاۋىپسىزدىك پەن ءوزارا بايلانىستى نىعايتۋ ءۇشىن وڭىرلىك كووپەراتسيانىڭ ءتيىمدى پلاتفورماسى رەتىندەگى ماڭىزدىلىعى اتاپ ءوتىلدى.

1992 جىلعى 5 قازاندا قازاقستاننىڭ تۇڭعىش پرەزيدەنتى – ەلباسى ن.نازارباەۆ ازياداعى قاۋىپسىزدىك پروبلەمالارى بويىنشا كونسەنسۋس نەگىزىندە ديالوگ, كونسۋلتاتسيالار, شەشىمدەر قابىلداۋ جانە شارالاردى جۇزەگە اسىرۋ ءۇشىن مەملەكەتارالىق فورۋم بولىپ تابىلاتىن اوسشك-ءتى شاقىرۋعا باستاما جاسادى. بۇگىنگى تاڭدا اوسشك-كە ازيانىڭ 27 مەملەكەتى مۇشە, 8 ەل مەن 5 حالىقارالىق ۇيىم باقىلاۋشى بولىپ تابىلادى.