قازاقستان كيوكۋسينكاي كاراتە تۇرىنەن KWU IV الەم چەمپيوناتىن قابىلدايدى

7-8 جەلتوقسان كۇندەرى نۇر-سۇلتان قالاسىندا تولىق كونتاكتىلى كاراتە بويىنشا ەرلەر مەن ايەلدەر اراسىندا سالماق دارەجەلەرى بويىنشا بۇكىلالەمدىك كاراتە وداعىنىڭ 4-ءشى  الەم چەمپيوناتى وتەدى. چەمپيونات ۇيىمداستىرۋشىلارى – قازاقستاننىڭ جاۋىنگەرلىك ونەر قاۋىمداستىعى, سونداي-اق, 2011 جىلى قۇرىلىپ, شۆەيتساريادا تىركەلگەن «Kyokushin World Union» حالىقارالىق قاۋىمداستىعى.

ەستەرىڭىزگە سالايىق, قازاقستاننىڭ جاۋىنگەرلىك ونەر قاۋىمداستىعى - وتكەن جىلى قۇرىلعان سپورتتىق ۇيىم. ونىڭ قۇرامىنا وليمپيادالىق ەمەس سپورت تۇرلەرى بويىنشا 20 اككرەديتتەلگەن سپورتتىق فەدەراتسيا ەندى. ونىڭ باسشىسى بولىپ كارىم ءماسىموۆ سايلاندى.

قاۋىمداستىق ءتورت باعىت بويىنشا: كاراتە, جەكپە-جەك, تولىق كونتاكتىلى سپورت تۇرلەرى جانە مما ارالاس جەكپە-جەك بويىنشا جۇمىس ىستەيدى.

كيوكۋسيننىڭ نەگىزىن سالعان بەلگىلى شەبەر - ماسۋتاتسۋ وياما. ول كاراتە وتانى سانالاتىن جاپونيادا عانا ەمەس, سونىمەن قاتار الەمنىڭ تۇكپىر-تۇكپىرىندە دە تانىمال سانالادى. كيوكۋسين نەگىزىنە تەك سپورتتىق قانا ەمەس, سونداي اق, جەكپە-جەكتىڭ قولدانبالى اسپەكتىلەرى دە جاتادى.   

كيوكۋسين جاۋىنگەرلەرىنىڭ مىقتى رۋحى مەن ۇتىمدى تەحنيكاسى ارالاس جەكپە-جەكتەردە, ك-1 سەريالى جارىستار مەن الەمنىڭ ارنايى جاساق قىزمەتتەرىن دايارلاۋ كەزىندە بىرنەشە رەت دالەلدەندى. الەم چەمپيوناتى حالىقارالىق Kyokushin World Union قاۋىمداستىعى اياسىندا وتكىزىلەدى. بۇل ۇيىم 2011 جىلى قۇرىلىپ, شۆەيتساريانىڭ لوزاننا قالاسىندا تىركەلگەن. KWU ۇيىمىنىڭ باستى مىندەتى – بارلىق كيوكۋسين فەدەراتسيالارىن ءبىر تۋدىڭ استىنا بىرىكتىرۋ.  

KWU الەم چەمپيوناتى وياما پرينتسيپتەرىن تۇسىنەتىن, كەز كەلگەن حالىقارالىق ۇيىمنىڭ جاۋىنگەرىن قابىلداۋعا دايىن.

2019 جىل بارىسىندا الەمنىڭ 60-تان استام مەملەكەتىندە ۇلتتىق ىرىكتەۋ تۋرنيرلەرى ءوتتى, قورىتىندىسىندا اتالعان الەم چەمپيوناتىنا قاتىساتىن ۇلتتىق قۇرامالار قۇرالادى. بۇل چەمپيوناتقا الەمنىڭ تۇكپىر-تۇكپىرىنەن ەڭ مىقتى دەگەن كاراتەشىلەر قاتىسا الادى. ولار ءوز مەملەكەتتەرىن – جاپونيا, يسپانيا, پولشا, بولگاريا, برازيليا, وار, اۆستراليا, رەسەي جانە ت.ب. تانىستىرادى.