بۇل تۋرالى قوستانايدا «قايىرىمدىلىق كەرۋەنى» رەسپۋبليكالىق كونكۋرسى تۋرالى جۋرناليستەرگە بريفينگ وتكىزگەن قوستاناي وبلىسى ىسكەر ايەلدەر قاۋىمداستىعىنىڭ وكىلدەرى ايتىپ بەردى. 2019 جىلدىڭ 2 قىركۇيەگىنەن باستاپ «قايىرىمدىلىق كەرۋەنى» ءىى رەسپۋبليكالىق كونكۋرسىنا وتىنىمدەر قابىلداۋ باستالادى. ونى قر تۇڭعىش پرەزيدەنتى – ەلباسى قورى, قازاقستاننىڭ ىسكەر ايەلدەر قاۋىمداستىعى, «حابار اگەنتتىگى» اق, «كتك» تەلەارناسى جانە «وقجەتپەس» ەمدەۋ-ساۋىقتىرۋ كەشەنى ۇيىمداستىرىپ وتىر.
«ەكىنشى جىل قاتارىنان وتكىزىلىپ كەلە جاتقان بۇل كونكۋرس ارقىلى ەلباسى قورى ادامگەرشىلىك قۇندىلىقتارىن, قايىرىمدىلىق جانە گۋمانيزم يدەيالارىن ناسيحاتتايدى. ءبىز جۇرەگى كەڭ ازاماتتارىمىزدى, بۇگىنگى كۇننىڭ ناعىز باتىرلارىن حالىققا كورسەتىپ, تانىستىرعىمىز كەلەدى. «قايىرىمدىلىق كەرۋەنى» جوباسى ازاماتتاردىڭ ۇلكەن ىقىلاسىنا يە بولعانى قۋانتادى» دەدى قوستاناي وبلىسى ىسكەر ايەلدەر قاۋىمداستىعىنىڭ اتقارۋشى ديرەكتورى بالبوپە ەرتاەۆا.
ءباسپاسوز كونفەرەنتسيا بارىسىندا كونكۋرسقا قاتىسۋ ەرەجەلەرى ناقتىلاندى. وعان الەۋمەتتىك ماسەلەلەردى شەشۋگە ۇلەس قوسىپ جۇرگەن, وزدەرىنىڭ يگى ىستەرىمەن باسقالاردى ىنتالاندىراتىن جەكە جانە زاڭدى تۇلعالار قاتىسا الادى.
قوستاناي وبلىسى ىسكەر ايەلدەر قاۋىمداستىعىنىڭ باسقارما مۇشەسى, وبلىستىق ءماسليحات دەپۋتاتى گۇلميرا قاپەنوۆا قوستانايلىقتاردى كونكۋرسقا قاتىسۋعا شاقىردى.
«قايىرىمدىلىق كەرۋەنى» ءبىزدىڭ ەلىمىزدە كوپشىلىككە تانىمال بولا بەرمەيتىن ادامدار, باتىرلاردىڭ كوپ ەكەنىن كورسەتەدى. ولاردىڭ ءىس-ارەكەتتەرى بارشامىزدى تاڭداندىرا وتىرىپ, مىسال بولا الادى. ەگەر ءسىز مۇقتاج ادامدارعا كومەكتەسىپ, قيىن جاعدايدا باتىلدىق تانىتىپ, پايدالى ءىس-شارانى وتكىزۋگە كومەكتەسكەن بولساڭىز, بۇل سايىس ءسىز ءۇشىن!» دەدى گۇلميرا قاپەنوۆا.
وبلىستا بايقاۋعا قاتىسۋ ءۇشىن وتىنىمدەردى قابىلداۋ 29 قاراشاعا دەيىن جالعاساتىن بولادى.
قوستاناي