پرەزيدەنتىمىز قاسىم-جومارت توقاەۆ 2020 جىلدى «ۆولونتەرلەر جىلى» دەپ جاريالاعانى ءمالىم. بۇل جاڭالىققا ەل اراسىندا ەكپىندى ەڭبەك ەتىپ جۇرگەن ەرىكتى جاستار ەلەڭ ەتە قالعانىن دا بىلەمىز. سونداي جاستاردىڭ ءبىرى – اقبوتا كادىربەك.
ونىڭ ءۇش ءسىڭلىسى جانە ەكى ءىنىسى بار. ءوز بويىنداعى جاۋاپكەرشىلىكتى بالا كەزىنەن باستاپ, باۋىرلارىنا قارايلاسا ءجۇرىپ قالىپتاستىرعان. ۇنەمى ۇلكەنگە قۇرمەتپەن, كىشىگە ىزەتپەن قارايدى. ءبىلىم وردالارىنىڭ ىشىندەگى قارا شاڭىراق سانالاتىن ىبىراي التىنسارين ورتا مەكتەبىن بىتىرگەن ول, بۇگىندە ارقالىق قالاسىنداعى ى.التىنسارين اتىنداعى پەداگوگيكالىق ينستيتۋتتىڭ پەداگوگيكا-پسيحولوگيا كافەدراسىنىڭ ەكىنشى كۋرس ستۋدەنتى. ونىڭ الدىندا عانا قالالىق كوللەدجدەن مەكتەپكە دەيىنگى ءبىلىم بەرۋ جانە تاربيەلەۋ ماماندىعىن الىپ شىققان ەدى. كوللەدجگە كەلگەننەن باستاپ قوعامدىق جۇمىستارمەن ءجيى اينالىسۋعا مۇمكىندىكتەر بولدى. ول ەرىكتىلەر جۇمىسى مەن پىكىرسايىس ويىندارىنىڭ بەلسەندى قاتىسۋشىسىنا اينالىپ شىعا كەلدى. ستۋدەنت بولا سالىسىمەن كوللەدجدىڭ جاستار ءىسى-جونىندەگى كومەتيتەتىندە «ناعىز كوشباسشىلار وداعى» ەرىكتىلەر توبىن قۇرادى. ۆولونتەرلەرمەن بىرگە تاجىريبە جيناۋ ماقساتىندا كوپتەگەن اكتسيالار وتكىزەدى. قوعامعا جانە قورشاعان ورتاعا كومەك قولىن سوزۋ ماقساتىندا «ارداگەرلەردى ارداقتايىق», «حەلپەر ۆوح», «تازا قالا» سىندى اكتسيالاردىڭ باسى-قاسىندا جۇرەدى. اقبوتا جىل سايىن وتكىزىلەتىن «الەۋمەتتىك ماڭىزى بار يدەيالار مەن جوبالار بايقاۋىنا» قاتىسىپ, گرانت ۇتىپ العان ەكەن. سونىڭ ارقاسىندا وسىدان ءتورت جىل بۇرىن ونىڭ ۇيىمداستىرۋىمەن وتكىزىلگەن وبلىستىق پىكىرسايىس ءتۋرنيرى اۋقىمىن ارتتىرىپ, ءداستۇرلى جارىسقا اينالىپ كەلەدى.
سونىمەن قاتار ول بىلىكتىلىگىن ارتتىرۋ ماقساتىندا پاۆلودار, قوستاناي جانە قارقارالى قالالارىنا بارىپ «ۆولونتەرلىك قىزمەتتى دامىتۋ» اتتى وقۋ-سەمينارلارىنان تاجىريبە جيناپ قايتقان. ىزدەنىسى جەمىستى بولىپ, 2017 جىلى وبلىستىق «ۇزدىك ۆولونتەر» بايقاۋىنا قاتىسقان كەيىپكەرىمىز باس جۇلدەنى يەلەندى. كوپ ۋاقىت وتپەي ول ارقالىق قالاسى جاستارىنىڭ التىن كىتابىنا «جاستار كوشباسشىسى» نوميناتسياسى بويىنشا ەندى.
̶ مەن وسى جەتىستىكتەرىم ارقىلى ءوزىمدى تانىپ-بىلە تۇسەمىن. قوعامعا پايداسى تيەتىن ىستەرىمدى قازاق ورەندەرىنىڭ ءومىر ءسۇرۋ قاعيدالارى رەتىندە تانىستىرعاندى ۇناتامىن. ال ءار جەتىستىگىم وتباسىم مەن ەلىمە ارنالادى, – دەيدى قوستاناي وبلىسىنىڭ ەڭ ۇزدىك ەرىكتىسى اتانعان قىز.
جاقىندا تاعى ءبىر جاقسى جاڭالىق ەستىدىك. اقبوتا ومىرلىك سەرىگىن تاۋىپ, تۇرمىسقا شىققان ەكەن. قالا اكىمى ەلدار كۇزەنباەۆ جاستار جىلى اياسىندا شاڭىراق كوتەرگەن جاس جۇبايلاردى قۇتتىقتاپ, العىس حات تابىستاپتى. ارقالىق قالاسىنىڭ دامۋى مەن جاڭعىرۋىنا ولشەۋسىز ۇلەس قوسىپ جۇرگەن اقبوتا سىندى جاستار ءبىر قالانىڭ عانا ەمەس, ەلىمىزدىڭ دە دامۋىنا وزىندىك سەپتىگىن تيگىزىپ جۇرگەنىن ءبىلۋى ءتيىس.