پرەمەر-مينيستر اسقار ءماميننىڭ توراعالىعىمەن وتكەن «بايتەرەك» ۇلتتىق باسقارما حولدينگى» اق ديرەكتورلار كەڭەسىنىڭ وتىرىسىندا حولدينگتىڭ ينۆەستيتسيالىق ساياساتىنىڭ تالاپتارىن ورىنداۋ ماسەلەسى قارالدى. بۇل تۋرالى primeminister.kz حابارلادى.
2018 جىلى «بايتەرەك» ۇبح» اق-نىڭ ەنشىلەس كومپانيالارى ەكونوميكانىڭ شيكىزاتتىق ەمەس سالالارىنداعى كاسىپورىندارعا 715,2 ملرد تگ كولەمىندە قولداۋ كورسەتتى. الدىڭعى جىلمەن سالىستىرعاندا قارجىلىق قولداۋ كولەمى 14%-عا (89 ملرد تگ) ءوستى.
ەكونوميكانىڭ جەكە سەكتورىن دامىتۋ ماقساتىندا كۆازيمەملەكەتتىك سەكتور سۋبەكتىلەرىنە نەمەسە ولارمەن ۇلەستەس زاڭدى تۇلعالارعا قاتىسى جوق 3590 كومپانيا مەن ۇيىمعا 541 ملرد تەڭگە كولەمىندە قولداۋ كورسەتىلدى.
ەكسپورتقا باعىتتالعان ءوندىرىستى قولداۋ شارالارىنىڭ ارقاسىندا 2018 جىلى كاسىپورىنداردىڭ ەكسپورت كولەمى 750 ملرد تەڭگەدەن استى, بۇل وتكەن جىلمەن سالىستىرعاندا 5,1%-عا (36,8 ملرد تگ) ارتىق.
2018 جىلى «بايتەرەك» ۇبح» اق يندۋستريالدى-يننوۆاتسيالىق قىزمەت سۋبەكتىلەرىنە جالپى سوماسى 4,7 ملرد تەڭگەگە 18 گرانت بەردى. سالىستىرۋ ءۇشىن — 2017 جىلى جالپى قۇنى 1,7 ملرد تەڭگە بولاتىن يننوۆاتسيالىق گرانتتار بەرۋ تۋرالى 9 كەلىسىم جاسالدى.
وتكەن جىلى حولدينگ بيزنەس-ينكۋباتورلارعا شىعىندارىن بىرلەسىپ قارجىلاندىرۋ تۇرىندە قارجىلىق قولداۋ كورسەتتى, سونىمەن قاتار, يننوۆاتسيالىق قىزمەتتى كەڭىنەن دارىپتەۋ بويىنشا جۇمىستار جۇرگىزدى.
وتىرىستا «بايتەرەك» ۇبح» اق-نىڭ 2019 جىلدىڭ ەكىنشى توقسانىنداعى تاۋەكەلدەرى تۋرالى ەسەپ, سونداي-اق, حولدينگتىڭ ىشكى اۋديت قىزمەتى قىزمەتكەرلەرىنىڭ 2019 جىلدىڭ ءبىرىنشى جانە ەكىنشى توقساندارىنداعى قىزمەتىنىڭ قورىتىندى ناتيجەلىلىگى تۋرالى ەسەپ بەكىتىلدى.