پرەمەر-مينيستر اسقار ءماميننىڭ توراعالىعىمەن وتكەن ۇكىمەتتىڭ سەلەكتورلىق وتىرىسىندا دۇنيەجۇزىلىك بانكتىڭ «Doing Business» رەيتينگىندەگى جانە باسقا دا رەيتينگتەردەگى قازاقستاننىڭ پوزيتسيالارىن جاقسارتۋ شارالارى تالقىلاندى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
بيزنەس احۋالدى جاقسارتۋ بويىنشا اتقارىلىپ جاتقان جۇمىس تۋرالى ۇلتتىق ەكونوميكا ءمينيسترى ر. دالەنوۆ, قۇرىلىسقا رۇقسات الۋ جانە كولىكتىك-لوگيستيكالىق ينفراقۇرىلىمدى دامىتۋ ءتارتىبىن جەڭىلدەتۋ تۋرالى يندۋستريا جانە ينفراقۇرىلىمدىق دامۋ ءمينيسترى ر. سكليار, ءبىلىم بەرۋ سالاسىنداعى حالىقارالىق كورسەتكىشتەردى جاقسارتۋ تۋرالى ءبىلىم جانە عىلىم ءمينيسترى ا. ايماعامبەتوۆ, ساۋداداعى ينديكاتورلاردى ارتتىرۋ شارالارى تۋرالى ساۋدا جانە ينتەگراتسيا ۆيتسە-ءمينيسترى ا. اسقار ۇلى باياندادى.
وسى جىلعى ءساۋىر ايىندا پارلامەنت جەتىنشى زاڭنامالىق تۇزەتۋلەردى قابىلدادى. بۇل تۇزەتۋلەردە قۇرىلىس سالاسىندا ء«بىر تەرەزە» قاعيداتىن ەنگىزۋ, كەلىسىم-شارتتاردى ورىنداۋ ماسەلەسىن وڭتايلاندىرۋ, سالىق سالۋ سالاسىندا رەفورمالاردى ىسكە اسىرۋ شارالارى بار. كاسىپكەرلەر اراسىندا ءتۇسىندىرۋ بويىنشا ۇلكەن جۇمىس اتقارىلدى.
«قازىرگى كەزدە قازاقستان بيزنەس جۇرگىزۋ جەڭىلدىگى بويىنشا رەيتينگتە الەمنىڭ 190 ەلى اراسىندا 28-ورىندا. جالپى, بۇل رەيتينگ بيزنەستى جۇرگىزۋ شارتتارىن جەڭىلدەتۋگە باعىتتالعان رەفورمالاردىڭ قانشالىقتى ءتيىمدى ەكەنىن كورسەتەدى. بۇل, ارينە, ەلىمىزدىڭ ينۆەستيتسيالىق تارتىمدىلىعىنا ىقپال ەتەدى جانە جاڭا جوبالار مەن وندىرىستەردى قۇرۋعا قاتىستى مۇمكىندىكتەردى بىلۋگە جول اشادى», دەدى ا. مامين.
ۇكىمەت باسشىسى دۇنيەجۇزىلىك بانكتىڭ ەلىمىزدىڭ قالالارى مەن وڭىرلەرىندە بيزنەستى جۇرگىزۋ جەڭىلدىگى رەيتينگىنىڭ قورىتىندىسى بويىنشا الماتى قالاسى مەن ماڭعىستاۋ جانە اقتوبە وبلىستارى اكىمدەرى (تيىسىنشە 1, 2 جانە 3-ورىندار) ءتيىمدى جۇمىس جاساعانىن اتاپ ءوتتى.
ء«بىز ەنەرگەتيكا, تەمىر جول كولىگى, اكت سالالارىندا جاقسى كورسەتكىشتەرگە قول جەتكىزدىك. سونىمەن قاتار حالىقارالىق ساۋدا, دەنساۋلىق ساقتاۋ جانە قارجى سەكتورىنداعى كورسەتكىشتەردى جاقسارتۋ بويىنشا جۇمىستى كۇشەيتۋ قاجەت», دەدى پرەمەر-مينيستر.
ۇكىمەت باسشىسى ۇلتتىق ەكونوميكا مينيسترلىگىنە مۇددەلى مەملەكەتتىك ورگاندارمەن بىرلەسىپ, اعىمداعى جىلدىڭ قازان ايىنىڭ سوڭىنا دەيىن بيزنەستى جۇرگىزۋ شارتتارىن جاقسارتۋ بويىنشا سەگىزىنشى تۇزەتۋلەر توپتاماسىن ۇكىمەتكە ۇسىنۋدى تاپسىردى. بۇل توپتاما كاسىپورىنداردى اشۋ جانە مەنشىكتى تىركەۋ, قۇرىلىسقا رۇقسات الۋ جانە ەلەكترمەن جابدىقتاۋ جۇيەلەرىنە قوسۋ كەزىندە ينۆەستورلار ءۇشىن ماڭىزدى بيزنەس-پروتسەستەردى جەڭىلدەتۋ رەفورمالارىن كوزدەيدى.
اسقار مامين, سونداي-اق قازاقستاننىڭ حالىقارالىق رەيتينگتەردەگى پوزيتسياسىن ودان ءارى جاقسارتۋ ءۇشىن ءبىر اي مەرزىمدە قولدا بار ءىس-شارالار جوسپارلارىن وزەكتەندىرىپ, جاڭا ءىس-شارالار جوسپارىن قابىلداۋدى, سونداي-اق باعدارلامالىق قۇجاتتاردا وسى رەيتينگتەردە قازاقستاننىڭ ۇستانىمىن جاقسارتۋ جونىندەگى نىسانالى ينديكاتورلاردى بەكىتۋ ماسەلەسىن پىسىقتاۋدى تاپسىردى.
«قالالار مەن وبلىستاردىڭ اكىمدەرى جۇرگىزىلىپ جاتقان رەفورمالاردى ىسكە اسىرۋ جانە بيزنەس جۇرگىزۋگە, ينۆەستيتسيالار تارتۋعا قولايلى جاعدايلار جاساۋ, ينفراقۇرىلىمدى دامىتۋ بويىنشا جۇمىستى كۇشەيتۋى قاجەت», دەدى پرەمەر-مينيستر.
ۇكىمەت باسشىسى قازاقستاننىڭ حالىقارالىق رەيتينگتەردەگى ورنى ماسەلەسى ۇكىمەتتىڭ جوبالىق كەڭسەسىنىڭ تۇراقتى باقىلاۋىندا بولاتىنىن اتاپ ءوتتى.