قازاقستان پرەمەر-ءمينيسترىنىڭ ورىنباسارى بەردىبەك ساپارباەۆ ارمەنيا رەسپۋبليكاسىنا جۇمىس ساپارىمەن باردى. سونداي-اق, قازاقستاندىق دەلەگاتسيا قۇرامىنا قر تۇڭعىش پرەزيدەنتى – ەلباسى قورىنىڭ اتقارۋشى ديرەكتورى اسەت يسەكەشەۆ پەن قر ءبىلىم جانە عىلىم ءمينيسترى اسحات ايماعامبەتوۆ كىردى. بۇل تۋرالى primeminister.kz حابارلادى.
بەردىبەك ساپارباەۆ پەن ارمەنيا پرەمەر-ءمينيسترىنىڭ ورىنباسارى تيگران اۆينياننىڭ كەزدەسۋى بارىسىندا ەكىجاقتى ىنتىماقتاستىقتىڭ كوپتەگەن ماسەلە قارالدى.
«قازاقستان ارمەنيامەن ءوزارا ءتيىمدى سەرىكتەستىكتى دامىتۋعا, ونىڭ ىشىندە ساۋدا-ەكونوميكالىق جانە مادەني-گۋمانيتارلىق سالالاردا ىنتىماقتاستىقتى كەڭەيتۋگە ۇلكەن ءمان بەرەدى, سوندىقتان ءبىز پرەمەر-ءمينيستردىڭ تاپسىرماسى بويىنشا ءبىلىم, دەنساۋلىق ساقتاۋ جانە اقپاراتتىق تەحنولوگيالار سالاسىنداعى ءوزارا ءىس-قيمىل مۇمكىندىكتەرىن تالقىلاۋعا كەلدىك», — دەدى ب. ساپارباەۆ.
ءوز كەزەگىندە ارمەنيانىڭ ۆيتسە-پرەمەرى ەكىجاقتى بايلانىستاردى تەرەڭدەتۋگە قىزىعۋشىلىق تانىتىپ, ەلدەرىمىز اراسىنداعى تاۋار اينالىمىن ۇلعايتۋدىڭ ەلەۋلى الەۋەتىن اتاپ ءوتتى.
كەزدەسۋ قورىتىندىسى بويىنشا بەردىبەك ساپارباەۆ ارميان ارىپتەسىنە كىتاپتار سىيلادى, اتاپ ايتساق: اباي شىعارمالارىنىڭ جيناعى, ءال-ءفارابيدىڭ «تاڭدامالى تراكتاتتارى» جانە قر تۇڭعىش پرەزيدەنتى – ەلباسى ن. نازارباەۆتىڭ «تاۋەلسىزدىك ءداۋىرى» كىتابى.
سونىمەن قاتار, ەرەۆان قالاسىندا قازاقستاندىق دەلەگاتسيا «TUMO» كرەاتيۆتى تەحنولوگيالار ورتالىعىندا بولدى. ورتالىقتا 12-18 جاس ارالىعىنداعى بالالار زاماناۋي تەحنولوگيالاردى قولدانا وتىرىپ, اT-سالاسىنداعى جۇمىستارعا وقىتىلادى. وقىتۋ ءتورت باعىتتا ۇيىمداستىرىلعان: انيماتسيا, ويىندار ازىرلەۋ, ۆەب-ازىرلەۋ جانە تسيفرلىق بۇقارالىق اقپارات قۇرالدارى, مۇندا بي, سپورت جانە مۋزىكامەن اينالىسۋعا كوڭىل بولىنەدى. 2016 جىلى «TUMO» فرانتسۋزدىق «We demain» جۋرنالى قۇراستىرعان الەمدەگى يننوۆاتسيالىق مەكتەپتەر رەيتينگىندە ءبىرىنشى ورىن الدى. ورتالىقتىڭ بولىمشەلەرى پاريجدە, ماسكەۋدە, بەيرۋتتە جانە باسقا قالالاردا جۇمىس ىستەيدى.
سونىمەن قاتار, ۆيتسە-پرەمەر «ارمەنيا بالالارى» (COAF) قايىرىمدىلىق قورىنىڭ جۇمىس تاجىريبەسىمەن تانىستى. COAF نەگىزىنەن بالالارمەن جانە جاستارمەن جۇمىس جاساي وتىرىپ, اۋىلداعى كەدەيلىك پروبلەمالارىن جان-جاقتى شەشۋ ءۇشىن ءبىلىم بەرۋ, دەنساۋلىق ساقتاۋ جانە الەۋمەتتىك-ەكونوميكالىق دامۋ باعدارلامالارىن جۇزەگە اسىرادى.
ەرەۆان مەملەكەتتىك ۋنيۆەرسيتەتىن ارالاۋ بارىسىندا بەردىبەك ساپارباەۆ قازاق ءتىلى, مادەنيەتى جانە تاريحى ورتالىعىندا بولدى. مۇندا ۆيتسە-پرەمەر قازاق حالقىنىڭ مادەنيەتى مەن سالت-ءداستۇرىن زەرتتەپ, ۇيرەنىپ جۇرگەن ستۋدەنتتەرمەن اڭگىمەلەستى, سونداي-اق ورتالىققا قازاق, ورىس جانە اعىلشىن تىلدەرىندەگى 50 كىتاپتى سىيعا تارتتى. ولاردىڭ ىشىندە اباي, م. اۋەزوۆ, ش. قۇدايبەردى ۇلى, ءا. كەكىلباەۆ, ا. جۇبانوۆ جانە ت. ب. ءىرى تۇلعالاردىڭ شىعارمالارى بار.
بەردىبەك ساپارباەۆ ارمەنيا ۇلتتىق كىتاپحاناسىنا جانە «ماتەناداران» ەجەلگى قولجازبالار ينستيتۋتىنا تاعى 50 كىتاپتى سىيلادى.
سونىمەن قاتار, قازاقستاندىق دەلەگاتسيا ستوماتولوگيا جانە ەستەتيكالىق مەديتسينا سالاسىنداعى جاڭا باعدارلامالار مەن تاسىلدەردى قولدانۋدى ىنتالاندىراتىن جانە دامىتاتىن «اۆانتا» يننوۆاتسيالىق مەديتسينا ورتالىعىنا باردى. بۇگىندە كلينيكاعا الەم ەلدەرىنەن 77 مىڭنان استام ەمدەلۋشى كەلگەن.