قورعانىس ءمينيسترى پريوزەرسك پەن بالقاش گارنيزوندارىنا كەلىپ, ولاردىڭ ىشكى اۋماعىندا شوعىرلانعان قۇرلىق اسكەرلەرى مەن اۋە قورعانىسى كۇشتەرىنىڭ اسكەري بولىمدەرىن تەكسەردى. بۇل تۋرالى ۆەدومستۆونىڭ ءباسپاسوز قىزمەتى حابارلادى.
پريوزەرسك جانە بالقاش گارنيزوندارىندا ولاردىڭ گەوگرافيالىق ورنالاسۋىن ەسكەرە وتىرىپ, قارۋلى كۇشتەردىڭ مۇددەسىندە ستراتەگيالىق مىندەتتەر جۇكتەلگەن اسكەري بولىمدەر ورنالاسقان. ولاردىڭ ءارتۇرلى ارنالىمى بار. اتاپ ايتقاندا, ارتيللەريالىق بولىمدەر, قامتاماسىز ەتۋ پولكى جانە باسقالارى.
اتالعان گارنيزوندار قازاقستاننىڭ قارۋلى كۇشتەرى جوعارعى باس قولباسشىسى ستاۆكاسىنىڭ رەزەرۆىسى بولاتىن «استانا» وڭىرلىك قولباسشىلىعىنىڭ قۇرامىنا كىرەدى. وڭىرلىك قولباسشىلىق اقمولا, قاراعاندى, قوستاناي جانە سولتۇستىك قازاقستان وبلىستارى اكىمشىلىك شەكارالارىنىڭ ايماعىندا ورنالاسقان. اسكەري بولىمدەردەن باسقا مۇندا بولىمشەلەر ءىس جۇزىندە ءارتۇرلى قارۋلى قاقتىعىستاردىڭ ستسەناريلەرىن پىسىقتايتىن قۇرلىق اسكەرلەرىنىڭ وقۋ-جاتتىعۋ ورتالىعى, سونىمەن قاتار ۇشۋ قۇرامىن دايىندايتىن اۋە قورعانىسى كۇشىنىڭ ورتالىعى مەن «جاس ۇلان» رەسپۋبليكالىق اسكەري مەكتەبى بار.
پريوزەرسك پەن بالقاش گارنيزوندارىنىڭ اسكەري بولىمدەرىندە قورعانىس ۆەدومستۆوسىنىڭ باسشىسى جاۋىنگەرلىك ماشينالار پاركىن, قارۋ-جاراق قويماسى مەن اسكەري تەحنيكالاردى, باسقارۋ پۋنكتتەرىن تەكسەردى, سونداي-اق ايماقتاردى ارالاپ شىقتى.