سىبايلاس جەمقورلىققا قارسى ءىس-قيمىل اگەنتتىگىنىڭ الاڭىندا اگەنتتىك توراعاسى اليك شپەكباەۆ پەن نيدەرلاندى كورولدىگىنىڭ قازاقستان رەسپۋبليكاسىنداعى ەلشىسى اندرە كارستەنستىڭ كەزدەسۋى ءوتتى. بۇل تۋرالى اگەنتتىكتىڭ ءباسپاسوز قىزمەتى حابارلادى.
كەزدەسۋ بارىسىندا تاراپتار سىبايلاس جەمقورلىققا قارسى ساياساتتى ىلگەرىلەتۋ شەڭبەرىندە بىرلەسكەن جوبالاردى, سونىڭ ىشىندە ازاماتتىق قوعامنىڭ قاتىسۋىمەن ىسكە اسىرۋداعى ءوزارا ءىس-قيمىل ماسەلەلەرىن تالقىلادى.
اليك شپەكباەۆ «قازاقستان حالقىنىڭ ءال-اۋقاتى ءۇشىن سىبايلاس جەمقورلىقتى جويۋ» ميسسياسىنا نازار اۋدارىپ, سىبايلاس جەمقورلىقتىڭ الدىن الۋ جانە قارسى ءىس-قيمىل سالاسىنداعى جۇرگىزىلىپ جاتقان رەفورمالارىمەن ءبولىستى.
سونىمەن قاتار, اگەنتتىك قىزمەتىندەگى وزگەرىستەر ەڭ الدىمەن سىبايلاس جەمقورلىق تاۋەكەلدەرىن تالداۋعا, سىبايلاس جەمقورلىقتىڭ سەبەپتەرى مەن جاعدايلارىن انىقتاۋعا جانە جويۋعا باعىتتالعانىن اتاپ ءوتتى.
ۆەدومستۆو باسشىسى اتاپ وتكەندەي, سىبايلاس جەمقورلىقتى قابىلداماۋ جانە پاراساتتىلىقتى دامىتۋ ارقىلى ادامداردىڭ ساناسىن وزگەرتۋ باستى مىندەت بولىپ تابىلادى.
اگەنتتىك توراعاسى نيدەرلاندى ەلشىلىگىنە «قازاقستانداعى پارلامەنتاريزمدى دامىتۋ قورى» قق-مەن بىرلەسىپ «اشىق بيۋدجەتتەردىڭ ينتەراكتيۆتى كارتاسى» جوباسىن ىسكە اسىرۋدا گرانتتىق قولداۋ كورسەتكەنى ءۇشىن العىسىن ءبىلدىردى.
ونلاين-كارتا اعىمداعى جىلدىڭ قاراشاسىنا دەيىن رەسپۋبليكا بويىنشا تاراتىلاتىنىن اتاپ ءوتتى. كارتا ناقتى ۋاقىت رەجيمىندە نۇر-سۇلتان قالاسىنىڭ الەۋمەتتىك نىساندارىن سالۋعا, جوندەۋگە جانە ۇستاۋعا بولىنگەن بيۋدجەت قاراجاتى تۋرالى ەگجەي-تەگجەيلى مالىمەتتەردى كورسەتەدى, سونداي-اق جەتكىزۋشىلەر, قۇرىلىس مەرزىمى مەن كەپىلدىك مىندەتتەمەلەرى بويىنشا اقپاراتتى كورسەتەدى.
ءوز كەزەگىندە كارستەنس مىرزا گوللانديالىق ينۆەستورلاردىڭ قازاقستانداعى جۇمىسقا دەگەن قىزىعۋشىلىعى جوعارى ەكەنىن ايتتى. اتاپ ايتقاندا, ول اگەنتتىكتىڭ بيزنەستى جانە ينۆەستيتسيالاردى قورعاۋ اياسىنداعى جۇمىسىنا وڭ باعا بەردى. ەلشى اقتوبە وبلىسىندا اۋىل شارۋاشىلىعى سالاسىنداعى ينۆەستيتسيالىق جوبانىڭ جۇزەگە اسىرىلۋ بارىسى تۋرالى حاباردار ەتتى.
تالقىلاۋ بارىسىندا ديپلوماتتار قازاقستان-گوللاندتىق ارىپتەستىكتى كەڭەيتۋگە كەدەرگى كەلتىرۋى مۇمكىن كەدەن ورگاندارىمەن ءوزارا ءىس-قيمىل كەزىندە بيزنەسمەندەردىڭ تاپ بولاتىن قيىندىقتارىمەن ءبولىستى. اگەنتتىك تاراپىنان ينۆەستيتسيالىق جوبانى ودان ءارى ىسكە اسىرۋعا قاجەتتى قولداۋ كورسەتىلەتىن بولادى.
كەزدەسۋ قورىتىندىسى بويىنشا تاراپتار ىنتىماقتاستىقتى كەڭەيتۋ تۋرالى ۋاعدالاستى, ءارى قاراي سىندارلى ءوزارا ءىس-قيمىل جانە پاراساتتىلىق مادەنيەتىن كۇشەيتۋ جونىندەگى ءىس-شارالاردى بىرلەسىپ وتكىزۋگە ءوزارا سەنىم ءبىلدىردى.
بۇل تۇرعىدا نيدەرلاندىنىڭ قۇزىرەتتى ورگاندارىمەن ءوزارا تۇسىنىستىك, سونداي-اق پاراساتتىلىقتى تەكسەرۋ ينستيتۋتىن (integrity check/testing) ىسكە اسىرۋعا دايىندالۋ جانە اگەنتتىك ءۇشىن سەمينارلار وتكىزۋ ماسەلەلەرىندە گوللانديالىقتار تاراپىمەن ساراپتامالىق قولداۋ كورسەتۋ ماسەلەلەرى تۋرالى مەموراندۋمدار جاساسۋ قارالدى.
نيدەرلاندىدا جوعارى ءبىلىم بەرۋ ستاندارتتارىن نازارعا الا وتىرىپ, ەلشىلىك سىبايلاس جەمقورلىققا قارسى قىزمەت قىزمەتكەرلەرىنىڭ ءتيىستى گوللاندتىق مەكەمەلەر بازاسىندا تاعىلىمدامادان ءوتۋ مۇمكىندىگىن قاراستىراتىن بولادى.
كەزدەسۋ سوڭىندا اگەنتتىك توراعاسى ەلشى كارستەنستى 2-4 قازاندا نۇر-سۇلتان قالاسىندا وتەتىن حالىقارالىق سىبايلاس جەمقورلىققا قارسى اكادەميا اسسامبلەياسىنىڭ (لاكسەنبۋرگ ق., اۆستريا) 8-وتىرىسىنا, سونداي-اق اعىمداعى جىلعى جەلتوقساندا سىبايلاس جەمقورلىققا قارسى كۇرەس ماسەلەلەرى جونىندەگى اگەنتتىكتىڭ جىل سايىنعى كونفەرەنتسياسىنا قاتىسۋعا شاقىردى.