بالقاشتا قالالىق سوتتىڭ فرونت-كەڭسەسى اشىلدى. مۇندا كەلۋشىلەرگە ماماندار كەڭەس بەرەدى جانە قاجەتتى كومەك كورسەتەدى. جاڭا نىساندا ازاماتتاردى قابىلداۋ ءۇشىن بارىنشا قولايلى جاعدايلار جاسالعان. بۇل تۋرالى قاراعاندى وبلىسى اكىمدىگىنىڭ ءباسپاسوز قىزمەتى حابارلادى.
فرونت-كەڭسەنىڭ اشىلۋ سالتاناتىنا قاراعاندى وبلىستىق سوتىنىڭ توراعاسى نۇرسەرىك ءشارىپوۆ, بالقاش قالاسىنىڭ اكىمى وراز تاۋىربەكوۆ, سوت اكىمشىسىنىڭ ورىنباسارى ماقسات يسين, پروكۋرورلار, ادۆوكاتتار, مەدياتورلار جانە بيلەر كەڭەسىنىڭ مۇشەلەرى قاتىستى.
- جاڭا جۇمىس فورماتىن ەنگىزۋ ازاماتتاردىڭ سوت جۇيەسىنە دەگەن سەنىم دەڭگەيىن ارتتىرۋعا, سوتقا جۇگىنۋ كەزىندە اكىمشىلىك كەدەرگىلەردى جويۋعا مۇمكىندىك بەرەدى. باستى ماقسات - سوت قىزمەتىنىڭ اشىقتىعى مەن مولدىرلىگىن قامتاماسىز ەتىپ, ازاماتتاردى قابىلداۋ بويىنشا قولايلى جاعداي جاساۋ,- دەپ اتاپ ءوتتى نۇرسەرىك ءشارىپوۆ.فرونت-كەڭسە اقپاراتتىق ورتالىقتى, كۇتۋ زالىن, كىرىس حات-حابارلار مەن وزىنە-ءوزى قىزمەت كورسەتۋ ايماعىن, ازاماتتىق ىستەردى قاراۋعا ارنالعان سوت وتىرىسى زالىن قامتيدى. بۇل جەردە مەدياتورلار مەن ادۆوكاتتارعا ارنالعان جەكە كابينەتتەر بولىنگەن.
وزىنە-ءوزى قىزمەت كورسەتۋ سەكتورىندا ازاماتتار «سوت كابينەتى» اج قىزمەتىن ەركىن پايدالانا الادى. سونىمەن قاتار WI-FI وتكىزىلىپ, گادجەتتەر ءۇشىن زاريادتاۋ قۇرىلعىلارى ورناتىلعان.
جاڭا فرونت-كەڭسەدە وبلىستىق سوت توراعاسى ازاماتتاردى قابىلدادى. وسىنداي فرونت-كەڭسەلەر قاراعاندى, شاحتينسك, اباي, وساكاروۆ اۋدانىنىڭ سوتتارىندا جۇمىس ىستەيدى. وبلىستا ولاردىڭ جەلىسى ءالى دە ۇلعايادى.