اتىراۋدا اقىن تويى سالتانات قۇردى. پوەزيا پاديشاسى فاريزا وڭعارسىنوۆانىڭ تۋعانىنا 80 جىل تولۋىنا ارنالعان اپتالىق باستالدى. وبلىس ورتالىعىنىڭ ەڭ كورنەكتى جەرىنە ورناتىلعان اقىن ەسكەرتكىشىنە گۇل شوقتارىن قويۋ راسىمىنەن باستاۋ العان شارالار لەگى ءتورت كۇنگە سوزىلادى.
وبلىس اكىمدىگىنىڭ قولداۋىمەن مادەنيەت, ارحيۆتەر جانە قۇجاتتاما باسقارماسىنىڭ تاپسىرىسى بويىنشا «بىرەگەي» قوعامدىق قورى شىعارعان «ار مەن اقىن» دەرەكتى ءفيلمى, «جىر – مەنىڭ جالعىز تارلانىم» اۋديوولەڭدەر جيناعى تانىستىرىلدى.
حالەل دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتى – فاريزا وڭعارسىنوۆا ءبىلىم العان جوعارى وقۋ ورنى. ەلىمىزگە بەلگىلى زيالى قاۋىم وكىلدەرى, وڭىردەگى عالىمدار, اقىن-جازۋشىلار مەن جاستار قاتىسقان رەسپۋبليكالىق عىلىمي-تاجىريبەلىك كونفەرەنتسيانىڭ وسى ءبىلىم ورداسىندا ءوتۋى دە زاڭدىلىق.
– فاريزا وڭعارسىنوۆا اتىراۋ توپىراعىنىڭ ءتول پەرزەنتى, وڭىرىمىزدەگى ءبىلىمنىڭ قارا شاڭىراعى – ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ العاشقى تۇلەكتەرىنىڭ ءبىرى. ول قارىمى مول تالانت يەسى, ءسوز ونەرىنىڭ كەمەلىنە جەتكەن سۋرەتكەر. فاريزا شىعارماشىلىعىنىڭ بۇكىل بولمىسىن, ەرەكشەلىگىن جەتكىزىپ ايتۋ وتە قيىن, بىراق وسى كونفەرەنتسيا فاريزا الەمىنە ايقىن جول اشاتىن, عىلىمي تۇرعىدا باعا بەرىلەتىن, رۋحاني ماڭىزى زور شارا بولادى دەگەن سەنىمدەمىن, – دەدى وبلىس اكىمىنىڭ ورىنباسارى ايگۇل اجىعاليەۆا.
ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ «تۋعان جەر» باعىتى اياسىندا ۇيىمداستىرىلعان «فاريزا وڭعارسىنوۆا – كورنەكتى اقىن, قوعام جانە مەملەكەت قايراتكەرى» اتتى رەسپۋبليكالىق عىلىمي-تاجىريبەلىك كونفەرەنتسيادا العاشقى باياندامانى فيليولوگيا عىلىمدارىنىڭ دوكتورى, اتىراۋ مەملەكەتتىك ۋنيۆەرسيتەتىنىڭ پروفەسسورى قادىر ءجۇسىپ جاسادى. «وتكەن عاسىردىڭ الپىسىنشى جىلدارىنىڭ اياق كەزىندە قازاقتىڭ پوەزيا الەمىندە ءبىر جارقىلداعان نايزاعاي وينادى. باعزى بۇيىعىلىقتى جويىپ, اقىن قىزدار اراسىندا پوەزيا اسپانىنا سول جارىقتى الىپ كەلگەن فاريزا بولاتىن» – دەپ اتاپ ءوتتى عالىم.
فيلولوگيا عىلىمدارىنىڭ دوكتورى, بەلگىلى عالىم امانتاي ءشارىپ تە وسى پىكىردى قۋاتتاپ, «شىن مانىندە, فاريزا وڭعارسىنوۆانىڭ «پوەزيا پلانەتاسى» – ونى كوزى دە, كوڭىلى دە ۇدايى ساعىنا, سارعايا ىزدەپ تۇراتىن ەلىنىڭ رۋحاني گالاكتيكاسىنداعى كومەسكى, كۇڭگىرت تارتپاس شامشىراقتاردىڭ ءبىرى. ءابدىلدا تاجىباەۆ ايتقانداي, «فاريزادا حالىقتىق رۋح بار, ول ەلىمەن بىرگە, قازاعىنان بولىنبەگەن اقىن», – دەدى.
كونفەرەنتسيادا «ف.وڭعارسىنوۆا جانە قازاق پوەزياسىنىڭ كوركەمدىك الەمى», «اقىننىڭ ازاماتتىق ۇستانىمى جانە قوعامدىق قىزمەتى», «اقىن شىعارماشىلىعىن وقىتۋدىڭ وزەكتىلىگى جانە تاربيەلىك ءمانى» سەكتسيالارى بويىنشا باياندامالار تىڭدالدى.
شاراعا قازاقستان جازۋشىلار وداعىنىڭ باسقارما توراعاسى ۇلىقبەك ەسداۋلەت, مەملەكەتتىك سىيلىقتىڭ لاۋرەاتتارى, كورنەكتى جازۋشىلار انەس ساراي, قاجىعالي مۇحامبەتقالي ۇلى, قازاقستان جازۋشىلار وداعى باسقارما توراعاسىنىڭ ورىنباسارى مەرەكە قۇلكەنوۆ, مەملەكەتتىك سىيلىقتىڭ لاۋرەاتى اقۇشتاپ باقتىگەرەەۆا, بەلگىلى اقىن سۆەتقالي نۇرجان, فيلولوگيا عىلىمدارىنىڭ دوكتورلارى امانتاي ءشارىپ, وڭايگۇل تۇرجان, جانات اسكەربەكقىزى قاتىسىپ, ءماندى دە ماعىنالى ءسوز قوزعالدى.
– ورىس اقىنى گاۆريل دەرجاۆيننىڭ «اقىندار ءوزىنىڭ تۋعان جەرىنە ۇقساپ تۇرادى» دەگەن تۇجىرىمى بار ەكەن. ءدال وسى ويدى اۋستريالىق اسقان تالانت يەسى ستەفان تسۆەيگ: «تابيعات قاي جەردە ادامدارعا جايلى بولسا, سول جەردە يديلليالىق پوەزيا ومىرگە كەلەدى» دەپ ناقتىلاي ءتۇسىپتى. ال اقىن تابيعاتى قاتال, وتكەن تاريحى ودان دا قاتال وڭىردە دۇنيەگە كەلسە شە؟ بۇل عۇلامالار سىزعان فورمۋلاعا سالساق, فاريزا پوەزياسىنىڭ جالپى سيپاتى ءوزىنىڭ تۋعان جەرىنىڭ تابيعاتى مەن وتكەن تاريحىنىڭ سيپاتتاماسىنان اۋماي قالعان. فاريزا اقىن پوەزياسى دا ءوزىنىڭ تۋعان جەرىنىڭ تابيعاتىمەن مىنەزدەس, تەكتەس, ورىستەس», – دەيدى بەلگىلى عالىم, اقىن وڭايگۇل تۇرجان.
تۋعان جەردىڭ قۇرمەتىنەن اسقان قانداي باقىت بولۋى مۇمكىن؟ اقىن تويى, پوەزيا مەيرامى, ءسوز مەرەكەسى وسى قۇرمەتكە ابدەن لايىق فاريزا اتىن تاعى ءبىر مارتە اسقاقتاتتى.
اتىراۋ