بۇل تۋرالى ء«تورتىنشى دەڭگەيدەگى بيۋدجەت: اۋىلدىق وكرۋگتەردى وڭتايلاندىرۋدان باستاپ, ءبىرىنشى باسشىلاردىڭ جاۋاپكەرشىلىگىنە دەيىن» دەگەن تاقىرىپتا قاراسۋ اۋدانىنىڭ بازاسىندا وتكەن دوڭگەلەك ۇستەل ماجىلىسىندە ايتىلدى. وتكەن جىلى وبلىستا 2 مىڭ تۇرعىنى بار 45 اۋىلدىق-سەلولىق وكرۋگتەر ءتورتىنشى دەڭگەيدەگى بيۋدجەتكە وتكەن بولاتىن. جەرگىلىكتى ءوزىن ءوزى باسقارۋعا كوشكەندە ولاردىڭ بارلىعىندا قارجىلاندىرۋ, كولىكپەن, كومپيۋتەرمەن جابدىقتاۋ جاقساردى, نەگىزىنەن كوپ جولاقتى قۋاتتى ينتەرنەت جەلىسىنە قوسىلدى. بىراق پروبلەمالار جوق ەمەس, ونىڭ ەڭ باستىسى كادرمەن قامتاماسىز ەتۋگە بايلانىستى. 45 اۋىلدىق وكرۋگتە 27 مامان جەتىسپەيدى.
ال الداعى جىلى وبلىستا تاعى 195 اۋىلدىق وكرۋگ دەربەس بيۋدجەتكە وتەتىن بولادى. وسىعان وراي بۇل اۋىلداردا كوپتەگەن ماسەلەلەر, ونىڭ ىشىندە وڭتايلاندىرۋ مەن اۋىلداردى ىرىلەندىرۋ ماسەلەلەرى الدىمەن شەشىمىن تاباتىن بولادى.
«مىسالى, از عانا تۇرعىنى قالعان اۋىلداردا اۋىلدىق وكرۋگ باسشىلىعىن ۇستاۋ ءتيىمدى ەمەس, ول ءۇشىن قانشاما قارجى كەتەدى. اۋىلداردى ىرىلەندىرىپ, قارجىنى ۇنەمدەسەك, ول سول جەردەگى الەۋمەتتىك ماسەلەلەردىڭ شەشىمىن تابۋعا جۇمسالاتىن بولادى. مۇنى اۋىلداعى اعايىنعا بارىنشا ءتۇسىندىرۋ كەرەك» دەدى «دوڭگەلەك ۇستەل» ءماجىلىسىنىڭ مودەراتورى بولعان وبلىس اكىمىنىڭ ورىنباسارى ەرلان سپانوۆ.
ماجىلىستە اۋىل اكىمدەرى سۇراقتارىنا جاۋاپ الدى. سونىمەن قاتار ەكىنشى جىل ءتورتىنشى دەڭگەيدەگى بيۋدجەتپەن جۇمىس ىستەپ جاتقان اۋىلدىق وكرۋگتەردىڭ جاقسى تاجىريبەسى دە ورتاعا سالىندى.
قوستاناي وبلىسى
قاراسۋ اۋدانى