ماشينا جاساۋ وندىرىسىندە ءوسىم بار

سوڭعى جىلدارى ماشينا جاساۋ سالاسىندا تۇراقتى ءوسىم بايقالادى. بىلتىرعى قورى­تىندى ءوندىرىس كولەمى العاش رەت 1 ترلن تەڭگەلىك مەجەنى ەڭسەردى. بيىل دا جوعارى ديناميكا ساقتالىپ وتىر.

− قازاقستاندا اۆتو­كولىك قۇرالدارىنىڭ بارلىق ساناتتارى قۇراستىرىلادى. جالپى 167 مودەل قۇراس­تىرىلسا, ونىڭ ىشىندە 39-ى جەڭىل كولىك, 22-ءسى الەمدىك برەندكە جاتادى. 10 جىلدىڭ ىشىندە اۆتوموبيل جاساۋ قازاقستاننىڭ ماشينا جاساۋ سالاسىنداعى درايۆەرلەردىڭ بىرىنە اينالدى, − دەدى ا.ەرجانوۆ. ونىڭ ايتۋىنشا, يندۋستريالاندىرۋ باعدارلاماسىن جۇزەگە اسىرۋ جىلدارىنىڭ ىشىندە ماشينا جاساۋ سالاسىندا جالپى سوماسى 276 ملرد تەڭگەنى قۇرايتىن 114 جوبا جۇزەگە اسىرىلىپ, شامامەن 11 مىڭ جۇمىس ورنى قۇرىلعان. ناتيجەسىندە لوكوموتيۆ, ترانسفورماتور, كوممۋنالدىق جابدىق­تار, وپتيكالىق قۇرالدار سىندى جاڭا ونىمدەر شىعارىلا باستادى.

− مۇنىڭ بارلىعى دا مەم­لەكەتتىڭ تابىستى ونەر­كا­سىپتىك ساياساتى ارقىلى جاسالىپ جاتىر. يندۋستريالىق دامۋعا باسىمدىق بەرۋ ارقىلى قازاقستان ەكونوميكاسى دامىپ كەلەدى. ءاۆتووندىرىس جانە تەمىرجول ماشينا جاساۋ سالاسى بەلسەندى دامىپ, اۋىل شارۋاشىلىعى, ەلەكتروتەحنيكالىق, تاۋ-كەن جانە مۇناي-گاز ماشينا جاساۋ سالالارى ايتارلىقتاي جاڭاردى. سالانى دامىتۋعا Alstom, General Electric, سمس – JAC Motors, Hyundai جانە باسقالار سياقتى ءىرى ترانسۇلتتىق كورپوراتسيالار تارتىلدى, − دەدى.

جيىندا بەلگىلى بول­عانداي, كووپەراتسيالىق بايلانىستاردى دامىتۋ ءۇشىن اعىمداعى جىلدىڭ ساۋىرىندە قازاقستان مەن رەسەي اراسىندا بىرلەسكەن ءىس-قيمىل باعدارلاماسى قابىلداندى.

اعىمداعى جىلدىڭ ءساۋىر ايىندا «Hyundai Trans Kazakhstan» جشس-نىڭ «Hyundai» ماركالى جەڭىل اۆتوكولىكتەرىن وندىرەتىن جاڭا زاۋىتىنىڭ ىرگە تاسى قالاندى. قىتاي سەرىكتەستەرىمەن ىنتىماقتاستىق اياسىندا شينالار مەن قوزعالتقىش شىعاراتىن زاۋىتتى ىسكە قوسۋ جوسپارلانىپ وتىر.