ارىس قالاسىنداعى بالالار ءۇيىنىڭ ءتورت تاربيەلەنۋشىسى 8 قىركۇيەكتە مولدوۆا استاناسىنا ۇشىپ باردى. بالدىرعاندار ساياحات اياسىندا وسى ەلدىڭ تاريحي-گەوگرافيالىق, سونداي-اق ەتنومادەني ەرەكشەلىكتەرىمەن تانىسۋدا.
قازاقستاندىق جاسوسپىرىمدەردىڭ دۇنيەتانىمىن كەڭەيتىپ, رۋحاني بايىتۋعا ىقپال ەتەتىن شارانى وقۋ جىلىنىڭ باسىندا وتكىزۋ باستاماسىن Nur Otan پارتياسىنىڭ سىرتقى ىستەر مينيسترلىگىندەگى باستاۋىش پارتيا ۇيىمىنىڭ ۇيلەستىرۋىمەن قازاقستاننىڭ كيشينەۆ قالاسىنداعى باس كونسۋلدىعى ۇسىنعان.
باستاماشىلاردىڭ قايىرىمدىلىق اكتسياسىنا «KMG International» كومپانياسىنىڭ بولىمشەلەرى: «Rompetrol مولدوۆا», «KAZROM FLOUR» جشس, «Cricova-vin» جانە «SupremaLex» كومپانيالارى دەمەۋشىلىك كورسەتتى.
ساپار باسىندا بالالار جاڭا پىسكەن جەمىستەر مەن كوكونىستەرگە باي ۇلتتىق تاعامداردان ءدام تاتىپ, داستارقان باسىندا العاشقى اسەرلەرىمەن ءبولىستى. بولاشاقتا ەسترادا جۇلدىزى بولۋدى ارماندايتىن ورالبەك ءجۇسىپوۆ بۇل ساپارى تۋرالى بىلايشا اڭگىمەلەدى: «بىزگە مولدوۆاعا شاقىرىلعانىمىز تۋرالى حابار كۇتپەگەن جەردەن كەلدى. ەستىگەن كۇننەن باستاپ ءبىز ۇشاققا وتىرۋدى اسىعا كۇتتىك. ءبىز اۋەجايدان شىققان كەزدە اۋا-رايى تاماشا بولدى. ماعان مولدوۆانىڭ ۇلتتىق مۋزىكاسى وتە ۇنادى. مەن ونىمەن بولاشاقتا جاقىنىراق تانىسامىن دەگەن ۇمىتتەمىن, مۇمكىن ءبىر ءانىن ۇيرەنىپ الارمىن».
اڭگىمە بارىسىندا بالالار وزدەرىنىڭ ومىرلەرى مەن بولاشاققا جوسپارلارى تۋرالى ىقىلاسپەن ايتتى. ولار ەرەسەك ومىرگە وپتيميستىك كوزقاراسپەن قاراپ, تاڭداعان ماماندىقتارى بويىنشا جوعارى مامان بولۋدى ارماندايدى. مىسالى, تولعاناي ماساليەۆا ماتەماتيكا ءپانىنىڭ مۇعالىمى بولۋدى جوسپارلاعان, ال بەكسۇلتان الىبەك قازاقستان ۇلتتىق قاۋىپسىزدىك كوميتەتى قىزمەتكەرىنىڭ جولىن تاڭداعان.
حيرۋرگ بولۋدى ارمانداعان كارينا سۋلايمانوۆا شەتەلگە العاشقى ساپارى جايلى, ەستە قالعان ساتتەرى تۋرالى بايانداپ بەردى. «مولدوۆا بىزگە وتە ۇنادى – كليماتى سونداي جىلى, اۋا دا تازا. كيشينەۆتىڭ ءوزى وتە جاسىل جانە ادەمى قالا ەكەن. ءبىز وسى ەلدىڭ تاريحى تۋرالى مۇمكىندىگىنشە كوپ بىلگىمىز كەلەدى, ولارعا ءبىزدىڭ قازاقستان تۋرالى ايتىپ بەرگىمىز كەلەدى», – دەيدى كارينا.
«بۇلدىرشىندەرىمىزدىڭ باقىتتى, شابىتتانعان جۇزدەرىن كورۋ مەن ءۇشىن ۇلكەن قۋانىش. بۇل ساپار ءبىزدىڭ وقۋشىلارىمىزدىڭ عانا ەمەس, سونىمەن بىرگە وسى جازدا ۇلكەن سىناقتى باستان كەشكەن ارىس قالاسىنىڭ بارلىق تۇرعىندارىنىڭ جۇرەگىنە جول تاباتىنىنا سەنىمدىمىن. ءبىزدى قولداعان بارلىق قازاقستاندىقتارعا العىسىمىز شەكسىز. مولدوۆاعا بالالارعا ارنالعان تۋر ۇيىمداستىرۋعا كومەكتەسكەن قازاقستاننىڭ باس كونسۋلدىعىنا, سىرتقى ىستەر مينيسترلىگىنە جانە Nur Otan پارتياسىنا ەرەكشە العىس بىلدىرگىم كەلەدى», – دەيدى بالالار ءۇيىنىڭ ديرەكتورى مەرۋەرت سۇيىندىكوۆا.
ساياحات بارىسىندا ارىستىق جەتكىنشەكتەر مولدوۆا مۇراجايلارىن, مادەني جانە تاريحي ورتالىقتارىن, ەۋرو-2020 ىرىكتەۋ كەزەڭىندە وينايتىن مولدوۆا-تۇركيا فۋتبول ماتچىن كورۋدى جانە قارا تەڭىزگە بارۋدى جوسپارلاپ وتىر. وتكەن دۇيسەنبىدە بالالار مولدوۆانىڭ وڭتۇستىگىندەگى گاگاۋزيا اۆتونوميالىق-تەرريتوريالدىق بولىگىنىڭ استاناسى كومراتتاعى ەلباسى نۇرسۇلتان نازارباەۆتىڭ ءمۇسىنى ورنالاسقان داڭق اللەياسىنا باردى جانە ونىڭ اۋماعىنداعى وزگە دە بەلگىلى نىسانداردا بولدى.