قازاقستان رەسپۋبليكاسى ۇكىمەتىنىڭ الاڭىندا وتكەن ءباسپاسوز كونفەرەنتسياسى بارىسىندا قر اۋىل شارۋاشىلىعى ءمينيسترى ساپارحان وماروۆ استىق نارىعىنداعى احۋال مەن نان باعاسى تۋرالى ايتىپ بەردى. بۇل تۋرالى primeminister.kz حابارلادى.
ونىڭ ايتۋىنشا, نان باعاسى تۇراقتى بولىپ قالادى, باعانىڭ ايتارلىقتاي اۋىتقۋ جاعدايلارى كۇتىلمەيدى.
«جىل باسىندا مەن نان باعاسىنىڭ ءوسۋىن تەجەۋ تۋرالى ايتتىم. ازىق-ت ۇلىك كورپوراتسياسى ارزانداتىلعان استىقتى ناۋبايحانالارعا 100-دەن 150 مىڭ تونناعا دەيىن ساتادى. ءبىز 100 مىڭ توننا استىق ساتتىق. سودان بەرى نان باعاسى تۇراقتى», — دەدى س. وماروۆ.
سونىمەن بىرگە, اۋىل شارۋاشىلىعى ءمينيسترى اۋا-رايى جاعدايلارىنا بايلانىستى بيىل 1-1,5 تونناعا از ءونىم جيناۋ بولجالعانىن اتاپ ءوتتى. بۇل جاعداي ىشكى نارىققا اسەر ەتپەيدى.
«ەگەر ءبىز 19 ملن توننا استىق جيناساق, ونىڭ 9 ميلليونى ىشكى نارىقتا قالادى, ءبىز 7-8 ميلليون تونناسىن ەكسپورتتايمىز, 2 ميلليون توننا استىق قالادى. سونىمەن قاتار, بىزدە بىلتىرعىدان قالعان استىق بار. ونىڭ كولەمى – 1,5 ميلليون توننانى قۇرايدى. جالپى, بىزدە ىشكى نارىقتى قامتاماسىز ەتۋ ءۇشىن استىق جەتكىلىكتى», — دەدى مينيستر.
سونىمەن قاتار, س. وماروۆ اتاپ وتكەندەي, ازىق-ت ۇلىك كەلىسىمشارت كورپوراتسياسى ساتىپ الاتىن 1 ميلليون توننا استىقتىڭ ىشىندە نان وندىرۋشىلەر ءۇشىن 150 مىڭ توننا كولەمىندە, قۇس فابريكالارۆ ءۇشىن 100 مىڭ توننا كولەمىندە رەزەرۆ بار.