قاراعاندى وبلىسى تەمىرتاۋ قالاسىنداعى «مەتاللۋرگ كمك» ساياجاي قوعامىنىڭ اۋماعىندا الاپات ءورت بولدى. سالدارىنان جۇزدەگەن ءۇي جانىپ كەتتى, دەپ حابارلايدى «قازاقپارات» حاا ءتىلشىسى.
جالىن 29 تامىز كۇنى ءتۇس ۋاقىتىندا شىققان. ونى اۋىزدىقتاۋعا ءورت ءسوندىرۋ پويىزى, 7 ارنايى تەحنيكا جانە 64 ءورت ءسوندىرۋشى جۇمىلدىرىلدى.
«نەگىزگى كۇش تۇرعىن ۇيلەردى, تەمىرجول قاتىناس جولدارىن, «جاڭا اۋىل» ستانساسىنىڭ جانە «مەتاللۋرگيچەسكايا» قوسالقى ستانساسىنىڭ نىساندارىن ساقتاپ قالۋعا جۇمسالدى. ءورت سوندىرۋشىلەردىڭ كاسىبيلىگىنىڭ ارقاسىندا بۇل ماڭىزدى نىساندارعا قاۋىپ تونگەن جوق», - دەدى توتەنشە جاعدايلار باسقارماسىنان.
40 گا اۋماقتا شارۋاشىلىق قوقىستارى مەن اعاش شارباقتار, سونداي-اق ساياجاي قوعامىنا جاقىن جەردە قۇرعاق ءشوپ ورتەندى. ءتىلسىز جاۋ بارلىعى 160 گا اۋماقتى جايلادى. ءورت 20.25-تە ءسوندىرىلدى. وقيعا ورنىنان تەمىرتاۋ قالاسىنىڭ ورتالىق اۋرۋحاناسىنا 1932 جىلى تۋعان ازاماتشا جەتكىزىلدى.
توتەنشە جاعدايلار باسقارماسىنىڭ مالىمەتىنشە, الدىن الا اقپاراتقا سايكەس, يەلەرى بار - 20 جانە يەن جاتقان 700-دەن استام ساياجاي ءۇيى جەرمەن جەكسەن بولدى.