1 قىركۇيەكتە نۇر-سۇلتان قالاسىندا «نازار اۋدارىڭىز – بالالار!» جەدەل-الدىن الۋ شاراسى باستالادى, دەپ حابارلايدى قازاقپارات.
رەيد 1 -30 قىركۇيەك ارالىعىندا وتەدى.
پوليتسيا دەپارتامەنتىنەن ءمالىم ەتكەندەي, وقۋ جىلىنىڭ باستالۋىنا وراي پوليتسەيلەر مەكتەپتەر ماڭىنداعى جول بەلگىلەرى مەن جاياۋ جۇرگىنشىلەر جولاقتارىن تەكسەرىپ شىققان.
«قازىرگى كەزدە 91 مەكتەپ, 100-دەن استام بالاباقشا مەن شاعىن ورتالىقتار, 42 كوللەدج ماڭىنا تەكسەرىستەر جۇرگىزىلدى. انىقتالعان كەمشىلىكتەردى جويۋ بويىنشا ءتيىستى مەكەمەلەرگە حاتتامالار جىبەرىلدى. سونىمەن قاتار, وقۋشىلاردى تاسىمالدايتىن مەكتەپ اۆتوبۋستارى تەكسەرىلدى», - دەلىنگەن ءباسپاسوز حابارلاماسىندا.
سونداي-اق يۋۆەنالدىق جانە اكىمشىلىك پوليتسيا قىزمەتكەرلەرى بالالار مەن اتا-انالار ءۇشىن پروفيلاكتيكالىق اكتسيالار وتكىزەدى, جول ءجۇرۋ ەرەجەلەرىنىڭ بۇزىلۋىن بولدىرماۋ ماقساتىندا رەيدتەر ۇيىمداستىرادى.
«ەلوردادا وسى جىلدىڭ جەتى ايى ىشىندە كامەلەتكە تولماعان بالالاردىڭ قاتىسۋىمەن 67 جول-كولىك وقيعاسى بولدى. سالدارىنان 3 بالا مەرت بولدى, 70-ءى ءتۇرلى دەڭگەيدە دەنە جاراقاتىن الدى. ال بالالاردىڭ كىناسىنان بولعان 37 جول-كولىك اپاتى تىركەلدى», - دەدى دەپارتامەنتتەن.