الەمدەگى ەڭ ءىرى بەيجىڭ حالىقارالىق كىتاپ كورمەسىندە 300-دەن استام وتاندىق كىتاپتار قويىلدى. 1986 جىلدان بەرى تۇراقتى وتەتىن بەيجىڭ حالىقارالىق كىتاپ كورمەسى باسپا جانە پوليگرافيالىق يندۋستريا سالاسىنداعى جەتەكشى پلاتفورما رەتىندە الەمنىڭ جۇزدەن استام ەلىن ءوز الاڭىنا توپتاستىردى. وندا 2,5 مىڭنان استام ەكسپوزيتسيا قويىلىپ, ونىڭ ىشىندە «قازاق ۋنيۆەرسيتەتى» باسپا ءۇيى ۇسىنعان ۋنيۆەرسيتەت عالىمدارىنىڭ 300-دەن اسا عىلىمي ەڭبەكتەرىنە قىزىعۋشىلىق تانىتقاندار قاتارى كوبەيدى.
كىتاپ الەمىندەگى ايتۋلى شاراعا قكپ وك-ءنىڭ ناسيحاتتاۋ ءبولىمىنىڭ ۆيتسە-ءمينيسترى تسزيان تسزيانگو, جەنمين ۋنيۆەرسيتەتىنىڭ رەكتورى ليۋ ۆەي, قحر-داعى قر ەلشىلىگىنىڭ ءبىرىنشى حاتشىسى قالامقاس دۇزباەۆا, قازۇۋ رەكتورى عالىمقايىر مۇتانوۆ, قازۇۋ ءباسپاسوزىنىڭ باسشىسى اسان الماز جانە دە قازاقستاندىق بەلگىلى عالىمدار مەن ماماندار قاتىستى.
وسى كورمە بارىسىندا ءال-فارابي اتىنداعى قازۇۋ رەكتورى, اكادەميك عالىمقايىر مۇتانوۆتىڭ «ەكونوميكالىق جوسپارلاۋ, باسقارۋ جانە بيۋدجەتتەۋدىڭ ماتەماتيكالىق ادىستەرى مەن مودەلدەرى» كىتابىنىڭ قىتاي تىلىندە تانىستىرىلىمى ءوتىپ, سالا بويىنشا عالىمدار پىكىرلەرىن ءبىلدىردى.
قازاقستاندىق عالىمنىڭ ەڭبەگى ەكونوميكا سالاسىنداعى نوبەل سىيلىعىنىڭ لاۋرەاتى دجون نەشتىڭ جوعارى باعاسىن الىپ, زەرتتەۋ ناتيجەلەرىن نوبەل سىيلىعىنىڭ تاعى ەكى لاۋرەاتى كريستوفەر سيمس پەن گارولد كۋننىڭ جۇمىستارىمەن سالىستىرعان. سونداي-اق الەمدەگى ەڭ ءىرى «Springer Nature» باسپاسىندا جارىق كورگەن بۇل ەڭبەك سۇرانىسقا يە كىتاپتار تىزىمىندە تۇر. كىتاپتىڭ ەلەكتروندى نۇسقاسىن 15 مىڭعا جۋىق پايدالانۋشى جۇكتەگەن. سونداي-اق Web of Science Core Collection جەتەكشى عىلىمي جاريالانىمدارىنىڭ بەدەلدى حالىقارالىق بازاسىنا ەنگەن.
جەنمين ۋنيۆەرسيتەتىندەگى قحر-ءدىڭ جەتەكشى باسپاسىندا جارىق كورگەن مونوگرافيا جايىندا جەنمين ۋنيۆەرسيتەتىنىڭ رەكتورى ليۋ ۆەي پروفەسسور عالىم مۇتانوۆتىڭ قازاقستاننىڭ جەتەكشى جوعارى وقۋ ورنىنىڭ باسشىسى عانا ەمەس ءىرى عالىم رەتىندە تانىمال ەكەندىگىن جەتكىزدى. الەمنىڭ بىرنەشە تىلىندە جارىق كورىپ, حالىقارالىق دەڭگەيدە جوعارى باعاسىن العان ەڭبەكتىڭ وزەكتى ءارى يننوۆاتسيالىق ءتاسىلى مەن كوپقىرلىلىعى عىلىمي قوعامداستىق پەن قىتاي عالىمدارى ءۇشىن قىزىعۋشىلىق تۋدىرعاندىعىن اتاپ ءوتتى. وسى شارا بارىسىندا عالىمعا عىلىمي جەتىستىكتەرىنىڭ تانىلۋىنىڭ بەلگىسى رەتىندە سەرتيفيكات تابىستالدى.
الماتى