سوناۋ ءبىر جىلدارى, ناقتىراق ايتساق, وسىدان 43 جىل بۇرىن ءانۋار ءالىمجانوۆ اعامىز جازۋشىلار وداعى باسقارماسىنىڭ توراعاسى بولىپ تۇرعان كەزدە ازيا, افريكا جازۋشىلارىنىڭ كونفەرەنتسياسى بولعان دەپ ەستيتىنبىز. كەڭەستىك كەزەڭنىڭ دە جاقسى دۇنيەلەرى بولدى. كەڭەستىك يدەولوگيا ادەبيەتتى باستى قارۋى رەتىندە, تاربيە قۇرالى رەتىندە پايدالاندى ءارى ۇلكەن قولداۋ كورسەتتى, جازۋشىلارعا قامقورلىق جاسادى.
كەيىنگى جىلدارى ادەبيەتتەر بايلانىسى ءۇزىلىپ قالدى. دۇنيەجۇزىلىك ادەبي پروتسەستىڭ قۇرامداس بولىگى رەتىندە قازاق ادەبيەتى دە دامىپ كەلەدى. ەندى وسى وتكىزىلگەلى وتىرعان ازيا ەلدەرى جازۋشىلارىنىڭ ءى فورۋمى 4-6 قىركۇيەك اراسىندا نۇر-سۇلتان قالاسىندا باستالماقشى. نەگىزگى ماقسات – جالپى قوعامداعى ادەبيەتتىڭ ءرولىن كوتەرۋ, جازۋشى مارتەبەسىن اسقاقتاتۋ. سول ارقىلى ادەبيەتتى باستى تاربيە قۇرالىنا اينالدىرۋعا ىقپال ەتۋ.
فورۋمدا كوپتەگەن ماسەلە كوتەرىلەدى. ماسەلەن, وڭتۇستىك كورەيانىڭ تانىمال جازۋشىسى كو ىن ء«ححى عاسىر پوەزياسىنداعى جالعىزدىق ماسەلەسى» دەگەن تاقىرىپتا بايانداما جاسايدى. قاتار ەلىنەن كەلەتىن نوبەل سىيلىعىنا ۇمىتكەر موزا ءال-مالكي «الەمدىك ادەبيەتتەگى ازيا ادامىنىڭ بەينەسى», دۇنيەجۇزىلىك اقىندار كونگرەسىنىڭ پرەزيدەنتى, مونعوليالىق مەند – «ازيا پوەزياسىنىڭ الەمدىك ادەبيەتكە اسەرى» دەگەن تاقىرىپتا اڭگىمە وربىتەدى.
ازەربايجان جازۋشىلار وداعىنىڭ توراعاسى انار رزاەۆ, ەۋرازيا جازۋشىلار وداعىنىڭ توراعاسى ياكۋب بەي ومەروعلى تۇركى تەكتەس ادەبيەتتىڭ بۇگىنگى حال-احۋالى تۋرالى ءسوز قوزعايدى.
قازاقستاننان ولجاس سۇلەيمەنوۆ, تولەن ابدىك, قابدەش ءجۇمادىلوۆ, انەس ساراي, بەكسۇلتان نۇرجەكە ۇلى, ت.ب. جازۋشىلارىمىزدىڭ ءسوز سويلەۋى كۇتىلۋدە.
ەلىمىزدىڭ بارلىق وڭىرلەرىنەن, الماتى مەن استانادان 200-دەي قالامگەر قاتىسادى. ازيانىڭ جاپونيا, مالايزيا, قىتاي, ساۋد ارابياسى, يوردانيا, وڭتۇستىك كورەياسىندى 40-قا جۋىق ەلىنەن دەلەگات كەلمەكشى.
ءبىزدىڭ قالامگەرلەرىمىزدىڭ شىعارمالارى سول ەلدەرگە, ال ازيا مەملەكەتتەرى جازۋشىلارى شىعارمالارى ءبىزدىڭ تىلىمىزگە اۋدارىلماقشى. مۇنداي ۇلكەن حالىقارالىق باسقوسۋدىڭ ادەبيەتىمىزدىڭ كوشىنىڭ ىلگەرى دامۋىنا ايتارلىقتاي ىقپال ەتەتىنىنە سەنەمىن.
باۋىرجان جاقىپ,
اقىن