ساناۋلى كۇن بۇرىن قازاقستاندىق بەلگىلى ترياتلونشى انەل سىتدىقوۆا لا-مانش بۇعازىن باعىندىرىپ, تاۋەلسىز مەملەكەتىمىزدىڭ كوك بايراعىن جەلبىرەتتى. باتىر قىزدىڭ فرانتسيانىڭ سولتۇستىگى مەن بريتانيا ارالدارىنىڭ وڭتۇستىك-شىعىسىن جالعاپ جاتقان لا-مانش بۇعازىنىڭ 38 شاقىرىمدىق ارالىعىن 15 ساعات 15 مينۋت ۋاقىت ىشىندە گيدروكوستيۋم كيمەي ءجۇزىپ ءوتۋى – الەمدىك دەڭگەيدەگى سەنساتسيا.
بۇعاز سۋىنىڭ سالقىندىعى 15-16 گرادۋس قانا, ال وسىنداي سۋعا ءتۇسىپ قانا قويماي ونى ءجۇزىپ ءوتۋ ەرلىككە – پارا-پار ارەكەت ەكەنى ءسوزسىز. وسى جەتىستىككە وراي مادەنيەت جانە سپورت ءمينيسترى اقتوتى رايىمقۇلوۆا ءوزىنىڭ جۇرەكجاردى لەبىزىن ءبىلدىرىپ, العىس حات جولدادى.
ء«سىز ەرەكشە دارىندىلىعىڭىز بەن ەڭبەكقورلىعىڭىزدىڭ, قايسار, ءورشىل مىنەزىڭىز بەن جەڭىسكە دەگەن قۇلشىنىسىڭىزدىڭ ارقاسىندا ۇلىبريتانيا مەن فرانتسيانىڭ جاعالاۋلارىن جالعاپ جاتقان ايگىلى لا-مانش بۇعازىن ءجۇزىپ ءوتىپ, الەمگە حالقىمىزدىڭ ءورشىل رۋحىن كورسەتە ءبىلدىڭىز. بۇل – ناعىز قايسار قازاق قىزىنىڭ بيىك بەلەسى. العا قويعان ماقساتتارىڭىزعا قول جەتكىزىپ, جاڭا اسۋلاردى باعىندىرا بەرىڭىز!» دەلىنگەن العىس حاتتا.
مەملەكەتىمىزدىڭ مارتەبەسىن بيىكتەتكەن ءا.سىتدىقوۆانى الماتى حالىقارالىق اۋەجايىندا ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ ۇجىمى قوشەمەتپەن قارسى الدى. تۋعان جەرگە ۇلكەن جەڭىسپەن ورالعان انەل الىبەكقىزىنا حالقىمىزدىڭ ىستىق ىقىلاسى مەن اق نيەتىن جەتكىزدى.
«جارايسىڭ, انەل!» دەيمىز ءبىز دە.
الماتى