22 تامىز كۇنى اتىراۋداعى ماحامبەت اتىنداعى اكادەميالىق قازاق دراما تەاترىنىڭ عيماراتىنان ءورت شىقتى. وبلىس ورتالىعىنىڭ ەڭ كورنەكتى جەرىندە ورنالاسقان ونەر ورداسى قاس پەن كوزدىڭ اراسىندا وتقا وراندى. وبلىستىق توتەنشە جاعدايلار دەپارتامەنتى باسشىسىنىڭ ورىنباسارى راشيد بليالوۆتىڭ ايتۋىنشا, ءورتتىڭ شىعۋىنا عيماراتتىڭ ەكىنشى قاباتىنداعى ەلەكترقالقاننىڭ اقاۋى سەبەپ بولعان. ءورت تۋرالى حابار اتالعان دەپارتامەنتكە كۇندىزگى ساعات 13.30-دا ءتۇسىپ, ساعات 18.00-دە تولىعىمەن ءوشىرىلدى. قىزىل جالىن 1800 شارشى مەتر اۋماقتى شارپىپ ۇلگەردى.
وقىس وقيعاعا بايلانىستى جەدەل شتاب قۇرىلدى. «قازىر تەاتر عيماراتىنىڭ شاتىرى, ەلەكتر جەلىلەرى مەن سىرتقى قاسبەتىن قالپىنا كەلتىرۋ, ىشكى ارلەۋ جۇمىستارى ءجۇرىپ جاتىر»,-دەيدى وبلىستىق قۇرىلىس باسقارماسىنىڭ باسشىسى مالىك امانوۆ. توتەنشە جاعدايدان كەيىن ايماقتاعى مادەنيەت مەكەمەلەرىنىڭ قىزمەتكەرلەرى, جەرگىلىكتى تۇرعىندار ارنايى سەنبىلىك ۇيىمداستىرىپ, تەاتر ءىشىن تازالاۋ جۇمىستارىنا قاتىستى. ورتتەن كەيىنگى جاسالىپ جاتقان جۇمىستاردى تەكسەرگەن وبلىس اكىمى نۇرلان نوعاەۆ قىس ماۋسىمى تۇسكەنشە تەاتر عيماراتىن قالپىنا كەلتىرۋ جۇمىستارىن اياقتاۋدى تاپسىردى.
- قازىر نىساندا 22 كومپانيا جۇمىس ىستەپ جاتىر. ولار تەاتردى ءوز قاراجاتتارىنا جوندەپ بەرۋگە باستاما كوتەردى. ونەر ورداسى تولىقتاي جەكە ينۆەستيتسيالار ەسەبىنەن قالپىنا كەلتىرىلەدى,-دەيدى وبلىس اكىمىنىڭ ءبىرىنشى ورىنباسارى سەرىك شاپكەنوۆ.
تەاتر عيماراتى بيىل عانا كۇردەلى جوندەۋدەن ءوتىپ, مامىر ايىندا پايدالانۋعا بەرىلگەن بولاتىن.
اتىراۋ