دىنمۇحامەد قوناەۆتىڭ ءومىرى مەن قىزمەتىنە ارنالعان سايت اشىلدى

سايت قورىنا قايراتكەر ءومىرىنىڭ بارلىق جىلدارىن قامتيتىن بەينە ماتەريالدار, ومىرنامالىق دەرەكتەر, ەرەكشە سۋرەتتەرى مەن زامانداستارىنىڭ ەستەلىكتەرى, سول جىلدارداعى ەلدىڭ الەۋمەتتىك-ەكونوميكالىق كورسەتكىشتەرى, سويلەگەن سوزدەرى مەن جاريالاعان ماقالالارى ەنگىزىلگەن. وسى تۋرالى جانە جوبا تۋرالى وزگە دە اقپاراتپەن قازاقستان جۋرناليستيكا اكادەمياسىنىڭ اكادەميگى ۆالەري جانداۋلەتوۆ ءبولىستى.

«اۋەزوۆ ءۇيى» عىلىمي-مادەني ورتالىعىنىڭ جەتەكشىسى, د.قوناەۆتىڭ جيەنى ديار قوناەۆ  «دىنمۇحامەد احمەت ۇلىنىڭ ەسىمى ۇلىقتالىپ, اتىنا كوشەلەر, جوعارى وقۋ ورىندارى, مۋزەيلەر بەرىلگەنىمەن دە وسى سايتتى جاساۋ بارىسىندا تۇلعانىڭ ءومىرى مەن قىزمەتىنە قاتىستى مالىمەتتەردىڭ از ەكەندىگىنە كوز جەتكىزگەندەي بولدىق. سوندىقتان دا ناقتى دەرەكتەر, اقپاراتتارمەن قامتاماسىز ەتۋ ماقساتىندا جاقىندارى بولىپ, قوردىڭ قولداۋىمەن سايتتى كوپشىلىك نازارىنا ۇسىنىپ وتىرمىز.  قوناەۆتىڭ بار ءومىرى مەملەكەت ومىرىمەن تىعىز بايلانىستا ءوتتى. سايت قورىنا ورتالىق مەملەكەتتىك ءارحيۆى, سونداي-اق قر پرەزيدەنتىنىڭ ارحيۆىنەن كوپتەگەن دەرەكتەر ىزدەستىرىلىپ, ەكى جىل كولەمىندە بىرنەشە مىڭداعان مالىمەت جينالدى» دەپ اتاپ ءوتتى.

ديار قوناەۆتىڭ ايتۋىنشا, بۇل قۇجاتتاردىڭ ىشىندە اسىرەسە, قازاق كسر مينيسترلەر كەڭەسى توراعاسىنىڭ ورىنباسارى بولىپ قىزمەت ەتكەن جىلدار ەرەشەلەنەدى. قىزمەت بارىسىندا دىنمۇحاممەد احمەت ۇلى قورعانىس ونەركاسىبىنە جەتەكشىلىك ەتتى.  جاسى وتىزدىڭ ۇستىندەگى جاس باسشى ءۇشىن جاۋاپتى جۇمىستاردى اتقارۋ ارينە وڭايعا سوقپاعانى انىق.

«سوعىس جىلدارىندا قازاقستاننىڭ قورعانىس ونەركاسىبىنىڭ الەۋەتى سەنىمدى تىل رەتىندە قىزمەت ەتە وتىرىپ, مايدانعا جىبەرىلگەن ون وقتىڭ توعىزى قازاقستان جەرىندە ءوندىرىلدى. قوناەۆ ەل ەكونوميكاسىنىڭ ەڭ كۇردەلى سالالارىن باسقاردى. تۇلعا  قىزمەتىنىڭ ءار كەزەڭىنە ءتان وزىندىك سيپاتى بار.  ال قازاقستان عىلىم اكادەمياسىنىڭ پرەزيدەنتى بولعان جىلداردا دا يىعىنا اۋىر جۇك ءتۇستى. تاۋ-كەن سالاسىنىڭ ەڭ ءىرى ءارى كورنەكتى وكىلى رەتىندە وزىنە  ارتىلعان جۇكتى ءمىنسىز اتقارىپ شىقتى. ورتالىق كوميتەتكە كەلگەندە دە الماتىنى سەلدەن ساقتاپ قالۋدا ىرگەلى جۇمىستار جۇرگىزدى. سونىڭ ناتيجەسىندە سۋ بوگەتى سالىندى. ول ەلدىڭ باسشىسى عانا ەمەس, عالىم بولعاندىقتان دا قالانى سەلدەن قورعاپ قالدى. الايدا وسىنداي اۋىرتپالىقتاردىڭ سالدارىنان جۇرەك تالماسىنا ۇشىرادى» دەگەن ويىمەن بولىسكەن ديار قوناەۆ سايت ماتەريالدارىنىڭ ءالى دە تولىعا تۇسەتىندىگىن جەتكىزدى.   

«د.ا.قوناەۆ اتىنداعى حالىقارالىق قور قۇرىلعالى بەرگى ارالىقتا تۋعان ءارى ومىردەن قايتقان كۇنى مىندەتتى تۇردە ەسكە الىپ, تۇلعانىڭ ارتىندا قالدىرعان مول مۇراسىن جاستار اراسىندا ناسيحاتتاۋعا بايلانىستى جۇمىستاردى جالعاستىرىپ كەلەمىز. بۇگىندە قالىڭ كوپشىلىك دىنمۇحاممەد قوناەۆ تۋرالى تەك عالامتور جەلىسىنەن الاتىندىقتان, ماتەريالداردىڭ ناقتىلىعىنا, دالدىگىنە كۇمان تۋىندايدى. سوندىقتان دا ارنايى سايتتىڭ اشىلۋى تۇلعا ءومىرىنىڭ بارلىق كەزەڭدەرىنەن ناقتى مالىمەتتەر بەرەدى ءارى وسى باعىتتا بىزدەر جۇمىس ىستەيتىن بولامىز» دەپ اتاپ ءوتتى  حالىقارالىق قوردىڭ باس ديرەكتورىنىڭ ورىنباسارى تيمۋر جۇمانوۆ.

ال تۇلعانىڭ جيەن نەمەرەسى مۇحتار قوناەۆ قايراتكەر مۇراسىن جاستار اراسىندا ناسيحاتتاۋدا الەۋمەتتىك جەلىلەر بويىنشا دا جۇمىستاردىڭ جۇرگىزىلىپ جاتقاندىعىن جەتكىزدى. بۇگىندە جاستار تاراپىنان مەملەكەتتىگىمىزدىڭ قالىپتاسۋى مەن دامۋى جولىندا ەڭبەك ەتكەن تۇلعالار ومىرىنە دەگەن قىزىعۋشىلىق بايقالادى. سوندىقتان دا زاماناۋي اقپارات كوزدەرىن قازاقستاننىڭ قالىپتاسۋ تاريحىن ناسيحاتتاۋ ءۇشىن پايدالانۋ قاجەتتىگىن اتاپ ءوتتى.

شارا بارىسىندا قازاقستان جۋرناليستيكا اكادەمياسىنىڭ پرەزيدەنتى, اكادەميك ساعىمباي قوزىباەۆ,  قازاقستان ديپلوماتتارى بىرلەستىگى جەتەكشىسىنىڭ ورىنباسارى ماقسات نۇرماعامبەتوۆ, قر ءسىم الماتى قالاسى وكىلدىگىنىڭ باسقارما جەتەكشىسى الماشا ارەنوۆا ءسوز سويلەپ, قوناەۆتار اۋلەتىنە قاتىستى ەستەلىكتەرىمەن ءبولىستى.

جوبا جەتەكشىلەرى الداعى ۋاقىتتا د.ا.قوناەۆتىڭ  قىزمەتى مەن ءومىرىن زەرتتەۋ, ناسيحاتتاۋ ماقساتىندا ارىپتەستىككە دايىن ەكەندىكتەرىن ءبىلدىردى.

الماتى