پرەمەر-مينيستر اسقار مامين ەڭبەك جانە حالىقتى الەۋمەتتىك قورعاۋ مينيسترلىگىنىڭ ۇجىمىنا جاڭا مينيستر ءبىرجان نۇرىمبەتوۆتى تانىستىردى. بۇل تۋرالى primeminister.kz حابارلادى.
ۇكىمەت باسشىسى بەردىبەك ساپارباەۆقا قازاقستاندىقتاردىڭ الەۋمەتتىك ءال-اۋقاتىن جاقسارتۋعا قوسقان ۇلەسى ءۇشىن العىس ءبىلدىردى. ونىڭ باسشىلىعىمەن ەڭبەك جانە حالىقتى الەۋمەتتىك قورعاۋ مينيسترلىگى قر تۇڭعىش پرەزيدەنتى - ەلباسى نۇرسۇلتان نازارباەۆتىڭ جانە مەملەكەت باسشىسى قاسىم-جومارت توقاەۆتىڭ الەۋمەتتىك سالانى جاڭعىرتۋ بويىنشا قويعان مىندەتتەرىن شەشۋگە قاتىستى جۇيەلى جۇمىستى ۇيىمداستىردى.
جاڭا ءمينيستردى تانىستىرۋ كەزىندە اسقار مامين ءبىرجان نۇرىمبەتوۆتىڭ الەۋمەتتىك سالاداعى 20 جىلدىق جۇمىس تاجىريبەسىن اتاپ ءوتتى. ءتۇرلى جىلدارى ول ەڭبەك جانە حالىقتى الەۋمەتتىك قورعاۋ ۆيتسە-ءمينيسترى بولىپ جۇمىس ىستەدى, قر پرەمەر-ءمينيسترى كەڭسەسىنىڭ باسشىسىنىڭ ورىنباسارى لاۋازىمىندا بولدى. 2017 جىلدان باستاپ قر كاسىپوداقتار فەدەراتسياسى توراعاسىنىڭ ءبىرىنشى ورىنباسارى قىزمەتىن اتقاردى.