قوستاناي وبلىسىنىڭ پوليتسيا دەپارتامەنتى مەن 6 ءىرى جوو اراسىندا ءوزارا ىنتىماقتاستىق تۋرالى مەموراندۋمعا قول قويىلدى. بۇل جونىندە وبلىستىق پوليتسيا دەپارتامەنتىنىڭ ءباسپاسوز قىزمەتى حابارلادى.
پوليتسيا دەپارتامەنتى باستىعىنىڭ ورىنباسارى پوليتسيا پولكوۆنيگى ارداق ىنتىقباەۆتىڭ ايتۋىنشا, قۇجات وبلىستىڭ وقۋ ورىندارى مەن ىشكى ىستەر مينيسترلىگى اراسىنداعى عىلىمي ىنتىماقتاستىقتى رەتتەمەك.
«اعىمداعى جىلدىڭ 1 شىلدەسىنەن باستاپ پاترۋلدىك پوليتسيا قىزمەتكەرلەرىنە جالاقى 65 پايىزعا, جەدەل قىزمەتتەرگە 55 پايىزعا ءوستى. سونداي-اق تۇرعىن ءۇيدى جالعا الۋ ءۇشىن 20 مىڭ تەڭگەدەن 50 مىڭ تەڭگەگە دەيىن وتەماقى قاراستىرىلعان. سونىمەن قاتار, پوليتسيا قىزمەتكەرلەرى مەن ولاردىڭ وتباسى مۇشەلەرىنە, قۇقىق قورعاۋ ورگاندارىنىڭ ارداگەرلەرىنە تەگىن مەديتسينالىق قىزمەت كورسەتىلەدى», دەدى پوليتسيا پولكوۆنيگى.
قۇجاتقا «2019-2021 جىلدارعا ارنالعان ىشكى ىستەر ورگاندارىن جاڭعىرتۋ جونىندەگى جول كارتاسىن» جۇزەگە اسىرۋ شەڭبەرىندە قول قويىلدى, جۇرتشىلىقپەن ءتيىمدى ءوزارا ءىس-قيمىل, حالىقپەن جۇمىستىڭ جاڭا فورماتى, قۇقىق قورعاۋ ورگاندارىنىڭ كادرلارىن ىرىكتەۋ جانە دايارلاۋ ونداعى باسىم باعىتتاردىڭ ءبىرى بولىپ تابىلادى.
ء«بىز مەموراندۋم اياسىندا ءبىز جوو-نىڭ ستۋدەنتتەرىن جۇمىسقا ورنالاستىرۋ جانە تاجىريبەدەن ءوتۋ تۋرالى ناقتى كەلىسىمدەرگە قول جەتكىزدىك. ىنتىماقتاستىق شەڭبەرىندە ءبىز وقۋ جوسپارلارىن تۇزەتىپ, جۇمىس بەرۋشىنىڭ تىلەكتەرىن ەسكەرەمىز. جىل سايىن ەكى مىڭنان استام زاڭگەر دايارلايمىز جانە بۇل باعىت ەسەپتىك مەكەمەدە اسا تالاپ ەتىلگەن», دەدى چەليابى مەملەكەتتىك ۋنيۆەرسيتەتىنىڭ قوستاناي فيليالى ديرەكتورىنىڭ ورىنباسارى ناتاليا ناليزكو. بۇدان ءارى مەموراندۋمنىڭ مىندەتتەرىن ىسكە اسىرۋ ءۇشىن بىرلەسكەن ءىس-شارالار جوسپارى جاسالادى.
قوستاناي