قوستانايعا كورشى رەسەيدىڭ چەليابى وبلىسىنان كەلگەن قوناقتارمەن ل.تولستوي اتىنداعى وبلىستىق امبەباپ كىتاپحانادا «مادەنيەت جاراستىعى» اتتى كەزدەسۋ ءوتتى. ول ورىستىڭ ۇلى اقىنى ا.س.پۋشكيننىڭ تۋعانىنا 220 جىل تولۋىنا ارنالدى.
بۇل شاراعا ەكى ەلدىڭ شەكارالاس وبلىستارى ىنتىماقتاستىعى اياسىندا قوستاناي جانە چەليابى جاستارىنىڭ كوشباسشىلارى مەن ۇلتتىق-مادەني بىرلەستىكتەر جەتەكشىلەرى جانە ۇكىمەتتىك ەمەس ۇيىمدار بەلسەندىلەرى قاتىستى. چەليابى وبلىستىق دوستىق ءۇيى ديرەكتورى يۋليا لاپيدۋس وتكىزىلىپ وتىرعان شارانىڭ باستى مىندەتى جاستار ۇيىمدارى بەلسەندىلەرىنىڭ اراسىنداعى بايلانىستى نىعايتۋعا باعىتتالعان الەۋمەتتىك باستامالارعا قولداۋ كورسەتۋ ەكەنىن ايتتى.
«ەكى شەكارالاس وبلىستاردىڭ «دوستىق ۇيلەرى» 2013 جىلدان باستاپ تىعىز بايلانىستا جۇمىس ىستەپ كەلەدى. باستى تاقىرىبىمىز, ارينە دوستىق, جاستار اراسىنداعى ىنتىماقتى ناسيحاتتاۋ, جاستاردىڭ اراسىنداعى بايلانىستاردى نىعايتۋ بولىپ تابىلادى. بۇرىنىراق ەكى وبلىس فيلارمونيالارىنداعى وركەستەرلەردى, شىعارماشىلىق جاستاردى كەزدەستىردىك. بۇل جولى الەمدىك مۇرا پۋشيكيننىڭ تۋعانىنا 220 جىل تولۋىن شەكارالاس جاستار كەزدەسۋىنىڭ باستى تاقىرىبىنا اينالدىردىق. «ۆىمىسەل» تەاترىنىڭ ارتىستەرى كەلىپ, پۋشكين شىعارمالارىن وقىدى. وسى ارقىلى شىعارماشىلىق جاستار ءبىر-بىرىمەن ارالاسادى, تاجىريبەلەرىن ۇيرەنەدى. ال ءبىز ۇلى ابايدىڭ 175 جىلدىعىنا وراي ۇيىمداستىرىلعان چەللەندجگە قاتىسىپ جاتىرمىز», دەدى يۋليا الەكساندروۆنا.
ء«بىزدىڭ بايلانىسىمىز جىل سايىن, اي سايىن جاقسى ىستەرمەن نىعايىپ كەلەدى. ەكى جاقتاعى جاقسى ىستەردى الماسامىز. جاقىندا عانا چەليابى وبلىسىندا وتكەن «تۋعان جەر» فەستيۆالىنە قاتىسىپ قايتتىق. بىزدەگى شارالارعا ولار كەلىپ قاتىسادى. «بارماساڭ, كەلمەسەڭ – جات بولارسىڭ» دەگەن عوي», دەيدى قازاقستان حالقى قوستاناي وبلىستىق اسسامبلەياسى توراعاسىنىڭ ورىنباسارى-حاتشىسى بيبىگۇل اققوجينا.
قوستاناي