نۇر-سۇلتاندا 16-20 تامىز ارالىعىندا گارۆارد ۋنيۆەرسيتەتى مەن نازارباەۆ ۋنيۆەرسيتەت بىرلەسىپ ۇيىمداستىرۋىمەن ازيا جانە تىنىق مۇحيتى ەلدەرىنىڭ ءداستۇرلى HPAIR ازيا كونفەرەنتسياسىن ۇيىمداستىردى. ءوزىنىڭ 28 جىلدىق تاريحىندا HPAIR ازيا كونفەرەنتسياسى ورتالىق ازيادا جانە تمد كەڭىستىگىندە العاش رەت وتكىزىلۋدە.
ءىس-شاراعا قاتىسقان نۇر-سۇلتان قالاسى اكىمى التاي كولگىنوۆ نازارباەۆ ۋنيۆەرسيتەت ستۋدەنتتەرى مەن ۇجىمىن ايتۋلى شارانى ۇيىمداستىرىپ وتىرعانىمەن قۇتتىقتاي كەلىپ, قازاقستاندا جاس كوشباسشىلار ءۇشىن ۇلكەن مۇمكىندىكتەردىڭ تۋىپ وتىرعانىن جەتكىزدى.
«نۇر-سۇلتان – جاڭادان سالىنعان جاس قالا. 90-جىلدارى ەلدەگى داعدارىسقا قاراماستان تۇڭعىش پرەزيدەنتىمىز نۇرسۇلتان نازارباەۆ ەلوردانى الماتىدان اقمولاعا كوشىردى. بۇل قيىن ءارى كۇردەلى وزگەرىس بولاتىن. الايدا ارادا 20 جىل وتكەندە قالامىز كۇن ساناپ ءوسىپ كەلە جاتقان ءىرى مەگاپوليسكە اينالدى. قازىر قالاعا شەتەلدەن ميللياردتاعان ينۆەستيتسيا اعىلىپ, تۇرعىن ۇيلەر مەن الەۋمەتتىك نىساندار كۇن ساناپ سالىنىپ جاتىر. وزگەرىستىڭ ۇلكەنى وسى ەمەس پە؟!», دەگەن قالا اكىمى مىڭجىلدىقتارداعى كوشپەندى تاريحىمىزدىڭ ەلوردادا كورىنىس تاپقانىن تىلگە تيەك ەتىپ, شەتەلدىك قوناقتاردى قالانى تاماشالاۋعا شاقىردى.
قالانىڭ عانا ەمەس, جالپى قازاقستاننىڭ ۇلكەن وزگەرىستەرگە ۇمتىلعان جاسامپاز ەل ەكەنىن ايتقان قالا اكىمى ەلدە الەۋمەتتىك ءوسۋ مەن مەريتوكراتياعا تەڭدەسسىز جول اشىلعانىن جەتكىزدى. «مىسالى, تۇڭعىش پرەزيدەنت اشقان «بولاشاق» ءبىلىم بەرۋ ستيپەندياسى قازاقستانداعى كەز كەلگەن ءبىلىمدى جانە ەڭبەكقۇمار جاستىڭ الەمدەگى ەڭ ۇزدىك ۋنيۆەرسيتەتتەردە ءبىلىم الۋىنا مۇمكىندىك بەرەدى. ستيپەنديانىڭ اسىرەسە, اۋىل جاستارىنا باعىتتالعانىن ەسكەرسەك, بۇل وزگەرىسكە ۇمتىلۋ ەمەي نەمەنە؟», دەگەن ا.كولگىنوۆ نازارباەۆ ۋنيۆەرسيتەتتىڭ دە قازاق جاستارىنا الەمدىك دەڭگەيدەگى ءبىلىم مەن تاجىريبە ۇسىنىپ وتىرعانىن جەتكىزدى.
ا.كولگىنوۆ كاسىپكەرلىكپەن اينالىسامىن دەۋشىلەرگە ارنايى اشىلعان ءتۇرلى باعدارلاما مەن گرانتتىڭ دا قازاقستاندا تالاپتى جاسقا جاعداي جاسالعانىنىڭ بەلگىسى ەكەنىن ايتتى.
سونىمەن قاتار ەكسپو-2017, استانا ەكونوميكالىق فورۋمى سەكىلدى ءىرى حالىقارالىق شارالاردىڭ دا جاستاردى قاناتتاندىراتىنىن مالىمدەدى. ال پرەزيدەنت ق.توقاەۆتىڭ باستاماسىمەن اشىلعالى جاتقان 300 ادامدىق پرەزيدەنتتىك كادرلىق رەزەرۆتىڭ دە ەلدى ۇلكەن وزگەرىستەرگە جەتەلەيتىنىن جەتكىزدى.
قالا اكىمىنىڭ ايتۋىنشا, ەلباسىنىڭ بيىلعى جىلدى جاستار جىلى دەپ جاريالاۋى دا جاڭا بۋىننىڭ بولاشاققا دەگەن سەنىمىن ارتتىرا تۇسەتىنى ءسوزسىز.
جىل سايىن ازيا مەن تىنىق مۇحيتى ەلدەرىنىڭ ءار قالاسىندا وتكىزىلەتىن شاراعا بيىل الەمنىڭ تۇكپىر-تۇكپىرىنەن 500-دەن استام دەلەگات جينالدى. ولاردىڭ اراسىندا حالىقارالىق كومپانيا باسشىلارى, قوعام قايراتكەرلەرى, سونىڭ ىشىندە UNICEF كورەيا دوكتورى سونگ سان حيون, ءۇندىستاننىڭ بۇرىنعى سىرتقى ىستەر ءمينيسترى نيرۋپاما راو, تاياۋ شىعىس جانە سولتۇستىك افريكا نارىقتارى بويىنشا Standard Chartered Bank بۇرىنعى باسشىسى دەنيەل اتستسي, بەيبىتشىلىك ءۇشىن نوبەل سىيلىعى يەگەرى راە كۆون چۋنگ, دۇنيەجۇزىلىك McKinsey ينستيتۋتىنىڭ ديرەكتورى دجوناتان ۆوتتسەل, World Bank Group تەحنيكالىق ديرەكتورى لەسلي گو سەكىلدى تانىمال تۇلعالار بار.