«جاڭىلمايتىن جاق جوق» دەسەك تە...

ءومىر بويى ساياساتپەن اينالىسىپ, سونىڭ ىشىندە 36 جىلداي سەناتور, 8 جىلداي ۆيتسە-پرەزيدەنت بولعان د.بايدەن 2020 جىلى سايلاۋعا تۇسسە, جاسى 78-دە بولادى ەكەن. ال د.ترامپتىڭ جاسى ول كەزدە 74-تە بولادى. ءبىر كەزدە سوتسياليستىك ەلدەر ليدەرلەرى ەگدە تارتىپ امەريكالىقتار ونى ءتۇرلى اڭگىمەنىڭ, ءتىپتى ءازىل مەن ءاجۋانىڭ, كەلەكەنىڭ كەيىپكەرىنە اينالدىرىپ جۇرسە, ەندى وزدەرىندە دە سونداي جاعداي بولىپ وتىر.

ارينە جاسى تىم ۇلكەن ادامنىڭ فيزيو­لوگيالىق, بيولوگيالىق قۋاتى قايتپاعان بولسا, مەملەكەت باسقارۋدا ەش كەدەرگىسى بولمايدى. كەرىسىنشە, ومىرلىك تاجىريبەسى مول بولعاندىقتان, بىردەن-ءبىر دۇرىس شەشىم قابىلداي الادى. تولە, قاز داۋىستى قازىبەك, بۇقار جىراۋ سياقتى قازاقتىڭ دانالارى 90-نان اسقان شاقتارىندا دا سوزدەن جاڭىلماي, جاس ادامداردىڭ باسىنا كەلمەيتىن دانالىقتاردى اعىن سۋداي تاسىتقان...

الايدا بايدەن مەن ترامپتىڭ سوزدەن ءجيى جاڭىلىپ, جادتارىنىڭ ولقىلىق تانىتا باستاعانى تۋرالى جۋىردا «امەريكا داۋىسى» اشىق جاريالادى. ماسەلەن, جۋىردا بايدەن ايوۆا شتاتىنا ءوزىنىڭ جاقتاستارىمەن بىرگە بارىپ, دەموكراتيالىق پرايمەريزدە (پارتيا ىشىلىك تاڭداۋ) جەڭىپ شىعۋعا تالپىنىس جاساۋ ماقساتىمەن كەزدەسۋلەر وتكىزىپ, ءسوز سويلەگەن. سوندا ترامپتى مۇقاتپاق بولعان: ء«بىز فانتاستيكانى ەمەس, عىلىمدى تاڭدايمىز. ءبىز فاكتىلەردى ەمەس, شىندىقتى تاڭدايمىز» دەگەن سوزدەرى قالاي ءتۇسىنۋدى بىلمەگەن تىڭداۋشىلارىن ءارى-ءسارى قىلعان. شىنىندا فاكتىلەردى شىندىققا قارسى قويۋدىڭ ءوزى ورالىمسىز دۇنيە ەكەنى ءسوزسىز. وزىنە پايدالى مۇنداي سىباعانى ترامپ تا شاپ ەتىپ ۇستاي الىپ, ءوزىنىڭ تۋيتتەردەگى پاراقشاسىنا: «ونىڭ اقىل-وي ساپاسى پرەزيدەنتتىك لاۋازىمعا لايىقتى ەكەنىنە ءالى دە سەنەتىندەر بار ما؟ ءبىز وتە ۇلكەن جانە كۇردەلى الەمدە «ويناۋدامىز», ال ونىڭ نە ەكەنى تۋرالى دجونىڭ ەشقانداي تۇسىنىگى جوق» دەپ جازدى. ال وتكەن جۇما كۇنى ءوزىنىڭ نيۋ-دجەرسيدەگى گولف-كۋرورتىنا دەم الۋعا ۇشىپ بارا جاتىپ ول بايدەننىڭ «باسى ىستەيتىنىنە كۇمان كەلتىرەتىنىن» ايتىپ كەتتى.

سوزدەن جاڭىلۋعا كەلگەندە د.ترامپتىڭ ءوزى دە «وڭىپ» تۇرعان جوق. وتكەن اپتاداعى 31 ادامنىڭ ءومىرىن جالماعان اتىس تۋرالى ول «تولەدودا قۇربان بولعاندارعا قۇدايدان جەڭىلدىك سۇراپ سىيىنامىن» دەپ جاريالادى. ال بۇل وقيعا تولەدودا ەمەس, وگايو شتاتىنىڭ دەيتون قالاسىندا بولعان ەدى. ەكەۋىنىڭ اراسى 240 شاقىرىم...

وسى وقيعالار تۋرالى د.بايدەننىڭ مالىمدەمەسى دە قارسىلاسىنان الىسقا كەتپەدى. ول العاشقى اتىستى حيۋستوندا بولدى دەپ سويلەدى, ال شىن مانىندە وقيعا تەحاس شتاتىنىڭ ەل-پاسو قالاسىندا بولعان ەدى. ال ەكىنشى اتىستى ميچيگاندا بولدى دەپ مالىمدەپ, ونىڭ تۇرعىندارىنا كوڭىل ايتتى. ال وقيعا ميچيگاننىڭ كورشىسى وگايو شتاتىندا بولعان.

ايوۆا شتاتىنا جاساعان ساپارىنداعى سايلاۋشىلار الدىندا سويلەگەن سوزدەرىندە د.بايدەن, ءتىپتى «قاتىردى». وقۋ, ءبىلىم ماسەلەلەرىنە قاتىستى سويلەگەندە ول: «كەدەي بولساق, بۇل ماسەلەنى ەڭسەرە المايمىز دەپ ايتىلاتىن پىكىرلەر بار. كەدەي بالالار دا اق ءتۇستى بالالار سياقتى اقىلدى جانە تالانتتى بولا الادى» دەگەن. بۇل سوزدەر قارا تۇستىلەردىڭ ءبارى كەدەي بولعانى ما دەگەن وي تۋعىزىپ, سايلاۋشىلار اراسىندا ءىشىنارا نارازىلىقتار تۋعىزعان... ءوزىنىڭ سوزدەن جاڭىلىپ كەتكەنىن ۇققان بايدەن ودان ءارى: «باي بالالار سياقتى قارا ءتۇستى بالالار دا, ازيادان شىققاندار دا... مەن شىن ايتىپ تۇرمىن, سىزدەر ءبىزدىڭ وسى ماسەلە بويىنشا قالاي ويلايتىنىمىز تۋرالى ويلانىڭىزدار» دەپ ودان ءارى شاتاسقان.

ارينە قالجىراعان قارت ادامنىڭ كوپ ساعاتتىق مالىمدەمەلەر جاساپ, ءسوز سويلەپ تۇرعانىندا جاڭىلىس كەتۋى زاڭدى. بىراق بۇل قاراپايىم ادامدارعا كەشىرىمدى بولعانىمەن, ەلدىڭ بيلىگىنىڭ باسىنا كەلەتىن ادامعا كەشىرىمسىز. د.بايدەن سياقتى ساياساتكەردىڭ باسقان قادامىن اڭدىپ جۇرەتىن قارسىلاستارى قازىر ونىڭ سوزدەرىنەن قاتەلىكتى كوپ تاۋىپ, ونى قۋانا جاريالاپ جاتىر. بۇل دا سايلاۋ الدىنداعى ساياسي تەحنولوگيانىڭ ءبىر امالى. جۋىردا دەموكراتيالىق پارتيانىڭ الەۋەتتى كانديداتتارىنىڭ دەباتىندا ونىڭ «ترامپ تاعى سايلانسا, بيلىكتە ءالى سەگىز جىل وتىراتىن بولادى» دەگەن قاتەلىگى دە ۇلكەن اڭگىمەگە ارقاۋ بولدى. دۇرىسى ءتورت جىل ەكەنىنەن قارت ادام جاڭىلىپ كەتكەن... ول ول ما, ءسوزىنىڭ سوڭىندا بايدەن ءوزىن قولدايتىن سايلاۋشىلاردى Joe 30330 سايتىنا ەنىپ, ۇسىنىس-پىكىرلەرىن ايتۋعا شاقىرعان. سويتسە, بۇل سايت ءالى اشىلا قويماعان ەكەن. الايدا ونى ءبىر پىسىق تەزىرەك قولدانا قويىپ, وسى سايتتى اشىپ جىبەرىپ, بايدەن جاقتاستارىنىڭ وي-پىكىرلەرىن جيناۋعا جەدەل كىرىسكەن... ال شىن مانىندە بايدەن ءوزىنىڭ جاقتاستارىن 30330 نومىرىنە ءماتىنى بار حابارلامالار جىبەرۋگە شاقىرماق بولعان ەكەن...

وسىنداي شالىس باسۋلار قازىر دەمو­كراتيالىق پارتيانىڭ جاقتاستارىن دا ويلاندىرىپ تاستاعان. بۇرىنعى ساۋالنامالاردا دج.بايدەننىڭ سايلاۋدا ترامپتى جەڭەتىنى تۋرالى ءجيى ايتىلاتىن ەدى. قازىر وسى پارتيادان كانديداتۋرالارىن ۇسىنۋعا تىرىسقانداردىڭ ءوزى ونىڭ جاڭىلىستارىن جاقتارى تالماي جاريالاپ جاتىر.

قالاي بولعاندا دا, اقش ۇكىمەتىنىڭ باسىنا قاتەلەسپەيتىن ادامنىڭ كەلگەنى دۇرىس-اۋ...