سولتۇستىك قازاقستاندا ەگىن وراعى قارقىن الىپ كەلەدى

سوڭعى جىلدارى استىق ءوندىرىسىن ءارتاراپتاندىرۋ بەلسەندىلىكپەن جۇرگىزىلىپ, رەنتابەلدىلىگى جوعارى مايلى داقىلداردىڭ كولەمى ءبىر ميلليون گەكتارعا دەيىن ۇلعايتىلدى. 15 مىڭ گەكتار القاپقا العاش رەت سويا ەگىلدى.

«استىقتىڭ شىعىمدىلىعى جاقسى.  مەملەكەتتىڭ قولداۋ ايرىقشا. وسىمدىك شارۋاشىلىعىن دامىتۋعا 13,4 ميلليارد تەڭگە ءبولىندى. ەگىنشىلىكپەن اينالىساتىن اگروقۇرىلىمدار  مول ءارى ساپالى ءونىم الۋدىڭ قىر-سىرىن جەتىك مەڭگەرگەن. مينەرالدىق  تىڭايتقىشتار مەن گەربيتسيدتەردى ءتيىمدى قولدانۋدىڭ ارقاسىندا  كەي شارۋاشىلىقتار رەكوردتىق ءونىم  الىپ وتىر», دەيدى اۋىل شارۋاشىلىق باسقارماسىنىڭ ماماندارى.

جامبىل اۋدانىنا قاراستى «شاتيلو جانە ك» جشس-ءنىڭ ءۇش بريگاداسى كۇزدىك بيدايدان گەكتار باسى 50 تسەنتنەردەن ءونىم جيناپ وتىر.  سەرىكتەستىك  ديرەكتورى ولەگ ادامنىڭ ايتۋىنشا, كەي تاناپتاردا ونىمدىلىك 70- 100 تسەنتنەردەن اينالعان.

«نەگىزگى ينۆەستورىمىز «اتامەكەن اگرو» اق-مەن 2008 جىلدان بەرى قويان-قولتىق جۇمىس ىستەپ كەلەمىز. تەحنيكالار جاڭا. تسيفرلاندىرۋ جۇيەسى ەنگىزىلگەن. كومباينشىلار مەن مەحانيزاتورلاردىڭ قالىپتى ەڭبەك ەتۋىنە بارلىق جاعداي تۋدىرىلعان», دەيدى تاجىريبەلى باسشى.

سەرىكتەستىك  34 مىڭ گەكتار جەردىڭ 24 مىڭ گەكتارىنا ءداندى, ال 10 مىڭ گەكتارىنا  مايلى داقىلدار سەپكەن.  ماڭداي تەرمەن وسىرىلگەن ريزىقتى شاشپاي-توكپەي جيناپ الۋعا 7 «ۆەكتور», 10 «CLAAS»  كومباينى  تارتىلعان.

اۋداندىق اۋىل شارۋاشىلىعى ءبولىمى جەتەكشىسىنىڭ مىندەتىن اتقارۋشى پەتر پەتروۆ بەرگەن مالىمەتتەر بويىنشا 524 كومباين ەگىنگە شالعى ءتۇسىرىپ, 42 سەرىكتەستىك, 185 شارۋا قوجالىعى 185 مىڭ القاپتىڭ ەگىنىن ورىپ, باستىرۋعا بىلەك سىبانا كىرىسىپ كەتكەن.  

اققايىڭ اۋدانىندا ورنالاسقان «دايىندىق-اگرو جشس-ءى «ەۆروحيم»  مينەرالدىق-حيميالىق كومپانياسىنىڭ تىڭايتقىشتارىن عىلىمي نەگىزدە  پايدالانىپ, مول ءونىم نەگىزىن قالاپ ءجۇر.

«بيدايدىڭ شىعىمدىلىعى- 20, ارپا- 25, زىعىر 12 تسەنتنەردەن كەم بولمايدى دەگەن سەنىمدەمىز», دەيدى ءوز تاجىريبەسىمەن بولىسكەن ءبىرجان ءابدىلمان ۇلى.

«جاڭعىرۋ»  قايتادان دايارلاۋ جانە بىلىكتىلىكتى ارتتىرۋ ينستيتۋتى بۇعان دەيىن تەك  مۇعالىمدەر ءۇشىن ارنايى كۋرستار وتكىزىپ كەلسە, ەندى اۋىل شارۋاشىلىعى سالاسى ماماندارىنىڭ دا بىلىكتىلىگىن كوتەرۋگە بەت بۇرعان. وقۋ باعدارلاماسىنا «باسشىنىڭ تۇلعا بولىپ قالىپتاسۋى», «وڭىردە وسىمدىك سالاسىنىڭ بولاشاعى جانە قازىرگى جايى», «تىڭايتقىشتار مەن وسىمدىكتەردى قورعاۋعا ارنالعان قۇرالدار» سەكىلدى كۋرستار ەنگىزىلىپتى. ءوز كەزەگىندە بۇل دارىستەر تىڭداۋشىلاردىڭ بىلىكتىلىگىن, كاسىبي شەبەرلىگىن شىڭداۋعا زور سەپتىگىن تيگىزەرى, العان تەوريالىق بىلىمدەرىن تاجىريبەدە قولدانۋعا, اۋىلدىق جەرلەردە اۋىل شارۋاشىلىق ماماندارىن تۇراقتاندىرۋعا ىقپال جاسارى انىق.

سولتۇستىك قازاقستان وبلىسى