ەۋروپا ەلدەرىندەگى قازاقستاننىڭ دوستارى اتانعان ساياحاتشى توپ مۇشەلەرى « ۇلى دالا ەلىندە» اتتى ەكسپەديتسيا قۇرامىندا بولىپ, ەلىمىزدىڭ كيەلى جەرلەرىن ارالاپ شىقتى. جيھانگەزدەر ءتورت مىڭ شاقىرىم جولدى باسىپ ءوتىپ, ون ءتورت كۇندە بەس وبلىس اۋماعىنا ساپار شەككەن.
ۇلى دالا جەرىنە ساياحاتتى قازاقستان مەن اۋستريا ەلشىلىكتەرى, قازاق گەوگرافيالىق قوعامى ۇيىمداستىرىپ وتىر. قازاقستاننىڭ ەۋروپالىق دوستارى ۇلىتاۋ, قارقارالى, شىڭعىستاۋ, الاكول, التىن ەمەل مەن بالقاش وڭىرلەرىن ارالادى. ەكسپەديتسياعا قازاقستاننىڭ بەلگىلى جيھانگەزى, قازاق گەوگرافيالىق قوعامىنىڭ مۇشەسى, «قازاقستاننىڭ 100 جاڭا ەسىمىنە» ەنگەن ماعجان ساعىمباەۆ جەتەكشىلىك ەتكەن. ول وسىدان ءتورت جىل بۇرىن جەر شارىن ۆەلوسيپەدپەن ارالاپ شىققان بولاتىن.
« ۇلىتاۋدا جۇرگەنىمىزدە ەكسپەديتسيامىزعا ەقىۇ-نىڭ قازاقستانداعى ەلشىسى دجوردج سابو مەن شۆەيتساريا ەلشىسى و.سميت قوسىلدى. جوشى حان مەن الاشا حاننىڭ, دومباۋىلدىڭ كەسەنەسىن ارالاپ, قارقارالى ۇلتتىق پاركىندە دە بولدىق. شايتانكول دوستارىمىزعا قاتتى ۇنادى. كەيىن جيدەبايداعى اباي مۋزەيىن تاماشالادىق. جيدەبايدا ەقىۇ پارلامەنت اسسامبلەياسىنىڭ بۇرىنعى پرەزيدەنتى كريستين مۋتتونەن ابايدىڭ «جاز» ولەڭىن نەمىس تىلىندە وقىپ, ۇلى اقىننىڭ 175 جىلدىعىنا وراي باستالعان چەللەندجدى جالعاستىردى», دەدى ماعجان ساعىمباەۆ.
اۋستريالىق قوناقتار گەرولد بەلگەر اۋدارعان ابايدىڭ «جاز» ولەڭىنىڭ كوشىرمەسىن اباي مۋزەيىنە تاپسىرىپتى. ءتىلى بولەك, ءدىنى باسقا قوناقتاردىڭ بۇل قارەكەتىن قازاقتىڭ ءبىرتۋار اقىنىنا كورسەتكەن قۇرمەت دەپ بىلسەك بولاتىنداي.
دەلەگاتسيا قۇرامىندا شەتەلدىك تۋريستەرمەن بىرگە قازاقستاننىڭ اۋسترياداعى توتەنشە جانە وكىلەتتى ەلشىسى قايرات سارىباي, پارلامەنت ءماجىلىسىنىڭ دەپۋتاتى ساپار احمەتوۆ, قازاقستاننىڭ بادەن-ۆيۋرتەمبەرگ جەرىندەگى قۇرمەتتى كونسۋلى دوروتەيا حاللەر-ليايبلە مەن جارى يۋرگەن ليايبلە, اۋستريا-قازاقستان قوعامىنىڭ پرەزيدەنتى, ەقىۇ پارلامەنت اسسامبلەياسىنىڭ بۇرىنعى پرەزيدەنتى كريستين مۋتتونەن جانە ونىڭ جارى پەككا مۋتتونەن بولدى.