ارىس قالاسىنداعى ايتىپ كەلمەگەن اپات ارقا جۇرتىن بەي-جاي قالدىرمادى. توتەنشە جاعداي تۋرالى اقپارات جەتكەن بەتتە قاراعاندى وبلىسى العاشقىلاردىڭ ءبىرى بولىپ ارىستىقتارعا قول ۇشىن بەرۋگە اسىققان بولاتىن.
جارىلىس بولعان كۇننىڭ ەرتەڭىندە-اق كەنشىلەر استاناسىنىڭ اۋەجايىنان 10 توننادان استام گۋمانيتارلىق جۇك تيەگەن ۇشاق تۇركىستان وبلىسىن بەتكە الىپ ۇشىپ شىقتى. قارلىعاشتىڭ قاناتىمەن سۋ سەپكەنىندەي بولعان بۇل شاراپاتتى ءىستى ارىس حالقى ءاردايىم ريزاشىلىقپەن ەسكە الىپ جۇرەرى ءسوزسىز.
كۇنى كەشە قاراعاندى وبلىسىنىڭ قۇرىش قولدى قۇرىلىسشىلارى ارىس قالاسىندا جۇرگىزگەن جوندەۋ جانە قۇرىلىس جۇمىستارىن تولىقتاي اياقتاپ, ۇلكەن ابىرويمەن ۇيلەرىنە ورالدى. ولار ءبىر ايعا جۋىق ۋاقىت ىشىندە قىرۋار ءىس تىندىرىپ, 519 پاتەر مەن 72 جەكەمەنشىك ءۇيدى جوندەۋدەن وتكىزدى.
جالپى, الاپات جارىلىستان زاقىمدانعان تۇرعىن ۇيلەردى قالپىنا كەلتىرۋ جۇمىستارىنا وبلىستىڭ 20-دان استام قۇرىلىس فيرماسى اتسالىسقان ەكەن. ءتورت جۇزگە جۋىق جۇمىسشى كۇن-ءتۇن دەمەي ەڭبەك ەتىپ, مويىنعا الىنعان مىندەتتى ابىرويمەن ورىنداپ شىقتى.
– ءبىز مۇندا 28 ماۋسىمدا كەلگەن بولاتىنبىز. بۇل جۇمىستارعا ءارتۇرلى قۇرىلىمدار مەن 25 مەردىگەرلىك ۇيىم تارتىلدى. ءاربىر بەكىتىلگەن ءۇي بويىنشا ءىس-شارالار جوسپارى جاسالدى, – دەدى قاراعاندى وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ باسشىسى تايحان قالماحانوۆ.
ايتا كەتۋ كەرەك, جوندەۋ جۇمىستارىندا جۇرگەن مەردىگەرلەر ارىس تۇرعىندارىنىڭ تراگەدياسىن جۇرەكپەن سەزىنىپ, اپاتتىڭ سالدارىن جويۋ ىسىنە بار ىنتا-شىنتاسىمەن كىرىسكەن بولاتىن. سونداي مەردىگەردىڭ ءبىرى – «جيلكومحوز-2030» جشس ديرەكتورىنىڭ ورىنباسارى تالعات قاسىمحانوۆ قايىرىمدىلىق شاراسىنان قالىس قالماي, ساۋاپتى ىسكە وزدەرىنىڭ دە سۇبەلى ۇلەس قوسقاندىقتارىن ورىندى ماقتان ەتتى.
– ءبىز كوپقاباتتى 11 ۇيگە جاۋاپتى بولدىق. قاجەتتى جوندەۋدەن باسقا, تۇرعىنداردىڭ ءوتىنىش-تىلەكتەرىن ورىندادىق. ءبىزدىڭ ماماندارمەن بىرگە جەرگىلىكتى تۇرعىندار دا تىزە قوسا جۇمىس ىستەدى. جالپى, ارىس قالاسىنداعى جوندەۋ جۇمىستارى كەزىندە 200-گە جۋىق ادامدى قابىلداپ, قولدان كەلگەن كومەكتى كورسەتتىك, – دەيدى ت.قاسىمحانوۆ.
ارىستاعى تۇرعىن ۇيلەردى جوندەۋ جۇمىستارى بارىسىندا قاراعاندى قۇرىلىسشىلارىنا وبلىستا بولعان توتەنشە جاعدايلار كەزىندە جيناقتاعان جۇمىس تاجىريبەسى كوپ كومەگىن تيگىزىپتى. بۇل تۋراسىندا وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ باسشىسى تايحان قالماحانوۆ بىلاي دەيدى:
– 2015 جىلى قاراعاندى وبلىسىنىڭ ءبىراز ەلدى مەكەندەرى سۋ تاسقىنىنان قاتتى زارداپ شەكتى. سول كەزدە توپان سۋ قۇرساۋىندا قالعان تۇرعىندارعا جەدەل تۇردە كومەكتەسۋ كەرەك بولدى. ءبىزدىڭ قۇرىلىسشىلار دالا جاعدايىندا جۇمىس ىستەۋگە سول كەزدەرى توسەلىپ الدى. ءبىز ءۇشىن مۇنداي جاعداي ۇيرەنشىكتى شارۋا دەپ ايتۋعا بولادى.
قاراعاندىلىق قۇرىلىسشىلار ارىس قالاسىندا كوپقاباتتى ۇيلەردى جوندەۋمەن عانا اينالىسپاي, جۇمىس بارىسىندا تۋىنداعان ماسەلەلەردى شەشۋ ءۇشىن تۇرعىندار اراسىندا قابىلداۋ دا جۇرگىزىپتى. مۇنىڭ ءوزى ادامداردىڭ ۇساق-تۇيەك ماسەلەلەرگە بولا شتابقا بارىپ اۋرە بولماي-اق, شارۋاسىن ءۇيىنىڭ ماڭىندا ءجۇرىپ-اق شەشۋىنە يگى ىقپالىن تيگىزگەن.
قاراعاندىلىقتاردىڭ ارىس تۇرعىندارى ءۇشىن جاساعان تاعى ءبىر جاقسىلىعىن ايتپاي كەتۋگە بولماس. ارقا ازاماتتارى ءوز باستامالارى بويىنشا جەرگىلىكتى جۇرتقا دەمەۋشىلىك قاراجات ەسەبىنەن سپورت الاڭىن جابدىقتاپ بەرىپتى. مۇنداعى دەنە شىنىقتىرۋ جاتتىعۋلارى ءۇشىن قاجەتتى سپورتتىق قۇرالدار كوپقاباتتى ۇيلەر تۇرعىندارىنىڭ كوڭىلىنەن شىعىپ, ولار قاراعاندىلىق قايىرىمدى قۇرىلىسشىلارعا دەگەن العىستارىن شىن جۇرەكتەن جاۋدىرعان.
جالپى, ارىستاعى قاراعاندى وبلىسى اكىمدىگى ۇيىمداستىرعان شتابتىڭ جۇمىسىنا جەرگىلىكتى تۇرعىندار ءدان ريزا بولىپ, جوعارى باعا بەرگەن. شتابتان بولەك مۇندا وڭىردەن كەلگەن تەحنيكالىق قاداعالاۋ ۇيىمدارى مەن مەملەكەتتىك ورگانداردىڭ وكىلدەرى دە ورتاق ىسكە وزدەرىنىڭ ۇلەسىن قوسقانىن ايتا كەتكەن ءلازىم.
ءسويتىپ قيىن جاعدايدا ارىس حالقىنا قول ۇشىن بەرگەن قاراعاندىلىقتار وڭتۇستىكتەن وسىلايشا العىس دەيتىن مول ولجامەن ورالدى.
قاراعاندى وبلىسى