قاراعاندى وبلىسىنداعى ۇلىتاۋ اۋدانىنىڭ بولاتساي دەگەن جەرىندە 23-24 تامىز كۇندەرى «رۋحاني جاڭعىرۋ» باعدارلاماسى بويىنشا Jezkiik ەتنو-مادەني مۇرا فەستيۆالى وتەدى.
وسىمەن ەكىنشى رەت وتپەكشى حالىقارالىق مادەني شاراعا ەلىمىزدىڭ بەلگىلى ارتىستەرىنەن بولەك يسپانيانىڭ Carmen Guerrero Flamenco ءانسامبلى, سەربيانىڭ ۇلتتىق «ابراشەۆيچ» وركەسترى, DUHAJ وركەسترى, يتاليانىڭ MORESCA NOVA توبى سياقتى شەتەلدىك ونەر ۇجىمدارى دا قاتىسادى.
فەستيۆالدىڭ العاشقى كۇنىندە رومانتيكانى جانى سۇيەتىندەر ءۇشىن الاۋ جانىندا كونتسەرت ۇيىمداستىرىلادى. سول كۇنى قوناقتارعا «قازاقفيلم» مەن DAR Play ستۋديوسى تۇسىرگەن «Amire» ءفيلمىنىڭ كورسەتىلىمىن ۇسىنۋ جوسپاردا بار.
كەلەسى كۇنى فەستيۆال باعدارلاماسى «اتادان قالعان اسىل مۇرا» اتتى كونتسەرتپەن جالعاسادى. سونداي-اق, بەلگىلى ايتىس اقىندارى امانجول التاەۆ پەن سارا توقتامىسوۆا « ۇلى دالا ءدۇبىرى» اتتى جىر سايىسىندا ونەر جارىستىرادى. بۇدان بولەك, باعدارلاماعا ساي قوناقتارعا قازاق حالقىنىڭ تۇساۋكەسەر, بەسىككە بولەۋ, بەتاشار جانە باسقا دا سالت-ءداستۇر تۇرلەرىن كورسەتۋ جوسپارلانعان.
ال Jezkiik ەتنوفەستيۆالىنىڭ سوڭعى كۇنىن «ارلان» ۇلتتىق ءداستۇر تەاترى, ەسترادا جۇلدىزدارى قىدىرالى بولمانوۆ پەن قاراقات ءابىلدينا, «دوس-مۇقاسان» ءانسامبلى, « ۇلىتاۋ» ەتنو-روك توبى, Alatauserileri, «نازار» ۇجىمدارى, «التىن باتىر» ستەپ-توبى قاتىساتىن گالا-كونتسەرت تۇيىندەيدى.
قاراعاندى وبلىسى