ء«بىز حالىقتىڭ بولىنۋىنە , تۇراقسىزدىق ورناۋىنا جول بەرمەيمىز», دەپ مالىمدەدى قىرعىزستان پرەزيدەنتى سوورونباي جەەنبەكوۆ پارلامەنتتىڭ كەزەكتەن تىس وتىرىسىندا. بۇل تۋرالى «كابار» اگەنتتىگىنە سىلتەمە جاساپ قازاقپارات ءتىلشىسى حابارلادى.
ونىڭ ايتۋىنشا, ەلدە زاڭدىلىق, بەيبىتشىلىك پەن قاۋىپسىزدىك ۇستەمدىك ەتۋى ءۇشىن بارلىق شارالار قولدانىلادى. «اتامباەۆتىڭ تارابى اتىس قارۋىن قولدانعانىنا قاراماستان, ارنايى كۇشتەر اتىس پاتروندارىن پايدالانعان جوق», - دەپ اتاپ ءوتتى قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ بۇگىن, 8 تامىزدا جوگوركۋ كەنەشتىڭ كەزەكتەن تىس وتىرىسىندا.
مەملەكەت باسشىسى جاعدايدى ۋشىقتىرۋعا جول بەرمەۋ ءۇشىن شارالار مەن رەزەڭكە وقتار قولدانىلعانىن ەرەكشە اتاپ ءوتتى.
«ەگەر كەشەگى كۇنگە دەيىن اتامباەۆتى تەرگەۋگە كۋاگەر رەتىندە شاقىرسا, ەندى وعان اسا اۋىر قىلمىس جاساعانى ءۇشىن كۇدىكتى رەتىندە قارايتىن بولادى», - دەدى جەەنبەكوۆ.
سونداي-اق, كەشە اتامباەۆتىڭ ۇيىنە شابۋىل جاساۋ كەزىندە تۇتقىنعا الىنعان ارنايى قىزمەت قىزمەتكەرلەرى بوساتىلدى. بۇل تۋرالى پارلامەنتتىڭ وتىرىسىندا دەپۋتات مىكتىبەك ابدىلداەۆ حابارلادى.