قوستانايداعى قۋاڭشىلىقتىڭ استىق پەن جەم-شوپكە كەرى اسەرى بولاتىن ءتۇرى بار

بيىل وبلىس وڭىرىندە 600 مىڭ گەكتار القاپتىڭ ەگىنى قۋاڭشىلىقتان سىن كوتەرمەيتىن وتە ناشار كۇيدە تۇر. بارلىق القاپتىڭ تەك 18 پروتسەنتى عانا قالىپتى جاعدايدا. كوپتەگەن اۋدانداردا كوكتەمنەن بەرى كوكتەن تامشى تامعان جوق. ىلعالدىڭ ازدىعى داقىلدىڭ بارلىق تۇرىنە كەرى اسەرىن تيگىزىپ وتىر. وبلىستا بيىل بارلىعى 5 ميلليون گەكتار جەرگە ءدان ءسىڭىرىلدى. ونىڭ ىشىندە 3 ملن 266 مىڭ گەكتارى بيداي, قالعانى بۇرشاق تۇقىمداس, مايلى داقىلدار, جەمدىك شوپتەر.

وبلىستا قۋاڭشىلىقتىڭ سالدارىنان استىق ءتۇسىمىنىڭ ازايۋ قاۋپىمەن قاتار, مال ازىعىنىڭ كەمشىن بولۋى ىقتيمال دەگەن دە قاۋىپ جوق ەمەس. مال ازىعى قىمباتتاۋى دا مۇمكىن.

«بيىل ءشوپ ءتۇسىمى وتە تومەن. كەيبىر اۋدانداردا ول گەكتارىنا 1,5 جانە 3,5 توننادان اينالدى.      شىلدە ايىنىڭ اياعىندا وبلىس بويىنشا 980000 توننا پىشەن جينالدى», دەيدى وبلىستىق اۋىل شارۋاشىلىعى باسقارماسىنىڭ باسشىسى جانسۇلتان تاۋكەنوۆ.

قازىر وبلىستا ءشوپتىڭ ءبىر تونناسى 20 مىڭ تەڭگەنى قۇرايدى. باسقارما باسشىسىنىڭ ايتۋىنشا, وبلىستا كوپتەگەن شارۋاشىلىقتار وتكەن جىلى جەم-ءشوپتىڭ 1,5 جىلدىق قورىن جاساپ قويعان. بيىل ءشوپتى از جيناسا دا قىستان قىسىلماي شىعۋعا مۇمكىندىكتەرى بار.       بىراق قوراسىنداعى بىرەر ءىرى قاراسىنا قاراپ وتىرعان اۋىل تۇرعىندارىنا قۋاڭشىلىق جىل جەڭىل بولمايتىن ءتۇرى بار. كوپتەگەن اۋىلداردا تۇرعىندار جەم-ءشوپتىڭ ازدىعى مەن قىمباتتىعىنا ازىردەن الاڭداپ وتىر.

قوستاناي