جاقىندا عانا «ەگەمەندە» جاريالانعان «قولدان جاسالعان بيلەت تاپشىلىعى» اتتى ماقالادا جولاۋشىلار پويىزدارىنا بيلەت الۋدىڭ قيىندىعى جان-جاقتى جازىلىپ, بۇل ماسەلەگە مەملەكەت باسشىسى قاسىم-جومارت توقاەۆ نازار اۋدارىپ, ماقالانى تۋيتتەردەگى پاراقشاسىندا بولىسە وتىرىپ, ۇكىمەتكە بيلەت ساتۋ جۇيەسىندەگى قولدان جاسالعان تاپشىلىقتى جويۋ جونىندە تاپسىرما بەرگەن بولاتىن.
مىنە, يندۋستريا جانە ينفراقۇرىلىمدىق دامۋ مينيسترلىگىنىڭ بۇل قادامى پرەزيدەنت تاپسىرماسىن ورىنداۋ باستامالارىنىڭ ءبىرى بولسا كەرەك.
«قازىرگى ۋاقىتتا بيلەتتەردى زاڭسىز قايتا ساتۋ «اكىمشىلىك قۇقىق بۇزۋشىلىق تۋرالى» كودەكستىڭ 449-بابىنداعى «قوعامدىق ورىنداردا ءتيىسۋ» بويىنشا عانا اكىمشىلىك جاۋاپكەرشىلىكتى كوزدەيدى. باسقا جاۋاپكەرشىلىك ازىرشە جوق», دەلىنگەن رەسمي حابارلامادا. بۇل باپتا «قوعامدىق ورىنداردا زاتتاردى وزگەشە تاسىلمەن ساتىپ الۋ, ساتۋ, ايىرباستاۋ نەمەسە يەمدەنۋ ماقساتىندا كاسىپكەرلىك سۋبەكتىسى بولىپ تابىلمايتىن ادام جاساعان, سونداي-اق بال اشۋ, قايىرشىلىق, سەكسۋالدىق سيپاتتا قىزمەتتەر كورسەتۋ نە وزگە دە قىزمەتتەر كورسەتۋدى كۇشتەپ تاڭۋ ماقساتىندا ءتيىسۋ, ياعني مازالاپ ءوتىنىش ءبىلدىرۋ – جەكە تۇلعالارعا ەسكەرتۋ جاساۋعا نە بەس ايلىق ەسەپتىك كورسەتكىش مولشەرىندە ايىپپۇل سالۋعا اكەپ سوعادى» دەلىنىپ, ارەكەت ءبىر جىلدىڭ ىشىندە قايتالانعان جاعدايدىڭ وزىندە ون ايلىق ەسەپتىك كورسەتكىش مولشەرىندە ايىپپۇل سالۋعا نە بەس تاۋلىككە دەيىنگى مەرزىمگە اكىمشىلىك قاماققا الۋ جازاسىمەن عانا شەكتەلەدى.
مينيسترلىكتىڭ حابارلاماسىندا قازاقستاندىق تاسىمالداۋشىلارعا تۇراقتى نەگىزدە جولاۋشىلار ۆاگوندارى پاركىن جاڭارتۋ ءۇشىن جاعداي جاسالىپ جاتقانى ايتىلعان.
رەسمي مالىمدەمە: «بۇدان باسقا تاسىمالداۋشىلار جىل سايىن جازعى كەزەڭدە نەگىزگى باعىتتار بويىنشا قوسىمشا پويىزدار سانىن قوسادى. سونىمەن قاتار جولاۋشىلار اعىمىنىڭ ۇلعايۋىنا بايلانىستى نەگىزگى باعىتتار بويىنشا بيلەتتەردىڭ جاساندى تاپشىلىعى بايقالادى, بۇل رەتتە ولاردى ساتۋ بويىنشا زاڭسىز دەلدالدار جاندانا تۇسەدى. بيلەتتەردىڭ زاڭسىز ساتىلۋىنا توسقاۋىل قويۋ ءۇشىن وسى جىلدىڭ ناۋرىز ايىندا يدم, سىبايلاس جەمقورلىققا قارسى ءىس-قيمىل اگەنتتىگى جانە «قازاقستان تەمىر جولى» ۇلتتىق كومپانياسى» اق اراسىندا تەمىرجول تاسىمالداۋى سالاسىندا تۇرمىستىق سىبايلاس جەمقورلىق ماسەلەلەرىن بولدىرماۋ كوزدەلگەن جول كارتاسىنا قول قويىلدى. وسى قۇجاتقا سايكەس «قتج» ۇك» اق بيلەتتەردى ساتۋ جانە جولاۋشىلاردى پويىزعا وتىرعىزۋ كەزىندە زاڭسىز ءىس-قيمىلدار جاساۋدى باقىلاۋ جانە شەكتەۋ ادىستەرىن قاراستىرا وتىرىپ, بيلەت ساتاتىن «Mobius» جۇيەسىن جەتىلدىرۋ قاجەت دەپ تاپتى. الايدا بيلەتتەردى زاڭسىز ساتۋ فاكتىلەرى جالعاسۋدا» دەپ تولىقتىرىلا تۇسكەن.
سونىمەن بىرگە 28 شىلدە كۇنى يدم كولىك كوميتەتى قوعامدىق ۇيىمدارمەن جانە قۇقىق قورعاۋ ورگاندارىمەن بىرلەسىپ وتكىزگەن رەيدتەر كەزىندە شىمكەنت, الماتى, نۇر-سۇلتان, اتىراۋ جانە تاراز قالالارىنىڭ ۆوكزالدارىندا بيلەتتەردى جوعارى باعامەن ۇسىناتىن, سونداي-اق قاجەتتى پويىزعا بيلەتسىز-اق وتىرعىزۋعا ۋادە بەرگەن دەلدالدار بولعانى تۋرالى دەرەكتەر انىقتالعان. وسىعان بايلانىستى 6 ادام اقبتك-ءنىڭ 449-بابى نەگىزىندە «قوعامدىق ورىنداردا ءتيىسۋ» بويىنشا اكىمشىلىك جاۋاپكەرشىلىككە تارتىلعان.
انىقتالعان فاكتىلەر بويىنشا مينيسترلىك «قتج» ۇك» اق «جولاۋشىلار تاسىمالى» اق مەن ماگيسترالدىق جەلى ديرەكتسياسىنىڭ لاۋازىمدى تۇلعالارىنا قاتىستى شارالار قابىلداۋ قاجەتتىگىن, سونداي-اق بيلەتتەردى زاڭسىز ساتۋعا قاتىسقان جەكە بيلەت كاسسالارىمەن شارتتى بۇزۋ قاجەتتىگىن اتاپ ءوتتى.