ءمارمار ەتىن وندىرەتىن كەشەن

مۇندا ەتتى سۇيەكتەن ايىرۋ جانە قاپتاۋ جەلىسىنە جاڭادان جابدىق ورناتىلىپ, ماۋسىم ايىندا بولشەكتەلگەن ستەيك (Skin Pack) ءوندىرىسى اشىلدى. سونىمەن قاتار ەتتىڭ مارمارلىك بىرىزدىلىگىن انىقتاۋعا مۇمكىندىك بەرەتىن قوندىرعى ساتىپ الىنىپ, ەتتى سۇيەكتەن ايىراتىن تاعى ءبىر جەلىنىڭ جۇمىسى جولعا قويىلدى. تاعى ءبىر ايتا كەتەرلىگى, ءبىر ۋاقىتتا 1000 تونناعا دەيىن ءونىمدى ساقتاۋعا قاۋقارلى Metro Cash & Carry ديستريبيۋتورلىق ورتا­لىعى سالىنىپتى. 

– مال شارۋاشىلىعى – اتا كاسىپ بولعاندىقتان ودان تۇسەتىن كىرىستىڭ مولشەرى دە سوعان سايكەس بولۋى قۇبا-قۇپ. ال بۇگىندە اتالعان سالانىڭ ەل ەكونوميكاسى ءۇشىن اۋقىمى جانە ماڭىزدىلىعى مۇناي-گاز سەكتورىنان كەم ەمەس, سونداي-اق ونىڭ دەڭ­گەيىنە جەتۋگە تولىق مۇمكىندىگى مەن قاۋ­قارى بار دەپ ەسەپتەيمىن. ەلىمىزدىڭ قۇنارلى جەرى جانە باي ءداستۇرى, ەت وندىرۋشىلەردىڭ الەمدىك كوشىنە ىلەسە الاتىندىعىن ايعاقتاسا كەرەك, – دەدى Kusto Group ديرەكتورلار كەڭەسىنىڭ توراعاسى ەركىن تاتىشەۆ. 

كاسىپورىننىڭ باس ديرەكتورى بەيبىت ەرۋباەۆ, جاڭا كەشەننىڭ اشىلۋى كومپانيا تاريحىنداعى ايتۋلى كەزەڭ ەكەندىگىن ءارى ول وتاندىق ەت يندۋسترياسىنا تىڭنان تۇرەن سالاتىنىنا سەنىم ءبىلدىردى.

– قازىر ىشكى نارىقتاعى ەتتىڭ 70%-ى قوسالقى شارۋاشىلىقتاردىڭ ۇلەسىنە تيەسىلى. وسى رەتتە ساپاسى جوعارى ءونىمدى لايىقتى باعادا ساتىپ, جاعدايدى وڭ باعىتتا وزگەرتكىمىز كەلەدى. باستى ماق­سات – ازىق-ت ۇلىك قاۋىپسىزدىگىنە باسا ءمان بەرۋ. تۇتىنۋشى ەش قوسپاسىز ساپالى تابيعي ونىممەن قامتىلۋى ءتيىس, – دەپ ناقتىلادى KazBeef Group كومپانيا­سىنىڭ باس ديرەكتورى ب.ەرۋباەۆ.

ارقانىڭ جازيراسىندا كاسىپورىنعا تيەسىلى 120 مىڭ گەكتار جايىلىمدىق جەر بار ەكەنىن ايتا كەتكەن ورىندى. مۇندا اسىل تۇقىمدى انگۋس جانە گەرەفورد ءتولىنىڭ 5 مىڭنان اسا ءىرى قاراسى جايىلىپ ءجۇر. بۇعان قوسا كومپانيا زەرەندى اۋدانىندا قوسىمشا 5 مىڭ مال باستى بورداقىلاۋعا ارنالعان ورىندى قولعا الدى. ونىڭ ۇستىنە بيىل وسى ۇلگىدەگى تاعى ءبىر الاڭدى ىسكە قوسۋ كوزدەلىپ, وسى ارقىلى ءىرى قار­ا­نىڭ سانىن 15 مىڭعا جەتكىزۋ مەجەسى تۇر. وسىلايشا, ىشكى نارىقتا ءوندىرىل­گەن ءمارمار ەتىنىڭ كولەمى 6 مىڭ تونناعا دەيىن جەت­كىزىلمەك, دەيدى ەت وڭدەۋشى كەشەننىڭ وكىلدەرى. اتالعان كاسىپورىننىڭ باس­تى ارتىقشىلىعى – وندىرىلەتىن ءونىم FSSC 22000 حالىقارالىق ازىق-ت ۇلىك قاۋىپسىزدىگى مەنەدجەمەنتىنە سايكەس كەلۋىندە جاتسا كەرەك. 

جاقسىلىق مۇراتقالي,