الماتى قالاسىنىڭ اكىمدىگى ارىس قالاسىنداعى توتەنشە جاعدايدان زارداپ شەككەن بالالارعا قولداۋ كورسەتۋ ماقساتىندا اعىمداعى جىلعى 12 شىلدە مەن 3 تامىز ارالىعىندا الماتى قالاسىنداعى وقۋشىلار سارايىنىڭ «ورنەك» جازعى ساۋىقتىرۋ لاگەرىنە جالپى 150 وقۋشىعا, 14 جەتەكشىگە دەمالىس ۇيىمداستىردى.
بۇگىن تاڭەرتەڭ 1 اعىن بويىنشا 75 وقۋشى ساعات 13.05-تە الماتى قالاسىنداعى «ۆوكزال-2» بەكەتىنە كەلىپ ءتۇستى. ۆوكزالدا بالالاردىڭ كوڭىلدەرىن كوتەرۋ ءۇشىن ەستەلىك سىيلىقتار بەرىلىپ, ءار-ءتۇرلى قويىلىمدارمەن انيماتورلار, تسيرك ءارتىسى مۇرات مۇتۇرعانوۆ وتباسىمەن جانە كوللەدج ستۋدەنتتەرى «ارىس, ءبىز بىرگەمىز!» اتتى فلەش-موبىن ۇيىمداستىرىپ, قارسى الدى.
بالالاردىڭ قاۋىپسىزدىگىن ساقتاۋ ماقساتىندا پوليتسيا قىزمەتى تاراپىنان ۆوكزالدان لاگەرگە دەيىن اۆتوبۋستاردى جولدا سۇيەمەلدەۋ بويىنشا ىقپال ەتىلەدى.
23 شىلدە كۇنى 2 اعىن بويىنشا ارىس قالاسىنىڭ تاعى 75 وقۋشىسى اتالعان لاگەرگە كەلەدى دەپ كۇتىلۋدە.