ساۋلەتتىك جوبانىڭ سالتاناتتى اشىلۋ راسىمىنە قالا اكىمى عابيدوللا ءابدىراحىموۆ, ءماسليحات دەپۋتاتتارى, سونداي-اق, شاھار تۇرعىندارى, زيالى قاۋىم وكىلدەرى, ونەر مەكتەبىنىڭ وقىتۋشىلارى مەن شاكىرتتەرى قاتىستى. القالى جيىندا شاھار باسشىسى دومبىرا كۇنىنىڭ ماڭىزىنا توقتالىپ, قالالىقتاردى جاڭا ەسكەرتكىشتىڭ اشىلۋىمەن قۇتتىقتادى.
«وسىدان 1 جىل بۇرىن ەلباسى نۇرسۇلتان ءابىش ۇلى نازارباەۆتىڭ شەشىمىمەن شىلدە ايىنىڭ ءبىرىنشى جەكسەنبىسى – قازاقتىڭ كيەلى دە قاسيەتتى قازىناسى – ۇلتتىق دومبىرا كۇنى بولىپ بەلگىلەنگەن بولاتىن. ۇلتتىق ءداستۇر, مادەنيەت جانە بىرەگەيلىك يدەيالارىنىڭ توڭىرەگىندە قوعامىمىزدى ودان ءارى بىرىكتىرۋ ءۇشىن جاسالعان وسىناۋ مەرەكەگە وراي اكىمشىلىك-ىسكەرلىك ورتالىعى اۋماعىندا دومبىرا ەسكەرتكىشى بوي كوتەرىپ وتىر. بۇل بارشا شىمكەنتتىكتەر ءۇشىن قۋانىشتى كۇن. ءار ءۇيدىڭ تورىندە ءىلۋلى تۇراتىن xالقىمىزدىڭ جان سەرىگى ۇلتتىق اسپابىمىزدىڭ قوڭىر ءۇنى ءماڭگىلىك ۇزىلمەسىن. دومبىرا اسپاپ قانا ەمەس, قازاقتىڭ جانى, فيلوسوفياسى دەۋگە بولادى. دومبىرانىڭ ۇنىنەن-اق كوپ جايتتى تۇسىنەمىز. بۇل قۇندىلىق قالا تۇرعىندارىنا, جاس ۇرپاققا سەرپىن بەرەدى دەپ ويلايمىن», دەدى عابيدوللا راحماتوللا ۇلى.
مەرەكەگە وراي ەسكەرتكىش الدىندا كۇمبىرلەگەن دومبىرا ۇنىمەن ۇندەسىپ حالىق اندەرى, قازاقستان كومپوزيتورلارىنىڭ شىعارمالارى ورىندالدى. مەرەكەنىڭ سالتاناتىن اسىرا تۇسكەن ايتىسكەر اقىن ءبىرجان بايتۋوۆ ارناۋ ايتىپ, دومبىرا كۇنى ۇلتتىق رۋحىمىزدى اسقاقتاتاتىن مەرەكە بولۋى ءتيىس ەكەنىن تىلگە تيەك ەتتى. بيىكتىگى 7 مەتردى قۇرايتىن تۇعىر ۇلتتىق ناقىشتارمەن بەزەندىرىلگەن. بۇل حالقىمىزدىڭ مۋزىكالىق اسپابىن دارىپتەۋگە ارنالعان شىمكەنتتەگى العاشقى ءىرى ەسكەرتكىش. ايتا كەتەرلىگى, ەسكەرتكىشتى ورناتۋعا قالا ءماسليحاتىنىڭ دەپۋتاتتارى, اتىمتاي جومارت مەتسەناتتار قولداۋ كورسەتكەن. شىمكەنت