مەنىڭ دە تۋىپ-وسكەن اۋىلىم اقباي-قىزىلبايدا سونداي ارداقتى ازاماتتار كوپ. سولاردىڭ ءبىرى – مەدبيكە بولىپ ەڭبەك ەتىپ, ەل قۇرمەتىنە بولەنىپ جۇرگەن مەديتسينا سالاسىنىڭ ارداگەرى ۇرلىحا ساعىنتايقىزى قابيەۆا. انام مارقۇم جايكەن راقىمقىزى كوزى تىرىسىندە اۋىل مەدبيكەسى ۇ.ساعىنتايقىزىنا وتە ريزا بولىپ, مەن وقۋدان كەلگەندە ءجيى ايتىپ وتىراتىن. ويتكەنى ءبىزدىڭ كەيىپكەرىمىز كوپتىڭ باتاسىن العان جان.
ۇزاق جىلدار بويى دارىگەرلىك, ادامگەرشىلىك پارىزىن ادال ورىنداپ, كۇن-ءتۇن دەمەي باسى اۋىرىپ, بالتىرى سىزداعان ادامدارعا جەدەل كومەك كورسەتىپ كەلە جاتقان مامان اۋىل تۇرعىندارىنىڭ سەنەرى دە, سۇيەنەرى دە بولا ءبىلدى. ارينە ءبىر كەزدەرى كەڭشار ورتالىعى بولعان ەلدى مەكەندەگى ەمدەۋ امبۋلاتوريالىق اۋرۋحاناسىن باسقارعان بىلىكتى ماماندار – مارقۇم قايىر رازبەكوۆ, مايرا سۇلەيمەنوۆا جانە وسى اۋرۋحانادا ەڭبەك ەتىپ, دارىگەرلىك كومەگىمەن ەل قۇرمەتىنە بولەنگەن بارلىق اق حالاتتى ابزال جاندارعا حالىقتىڭ ءدان ريزا ەكەنىن جاقسى بىلەمىن. مەنىڭ دە العىسىم شەكسىز. انام مارقۇم اۋىرعاندا: «ۇرقيانىڭ, قايىركەننىڭ, مايراشتىڭ ىستىق ۋكولىنان, جىلى سوزىنەن جازىلىپ كەتتىم», دەپ ايتىپ وتىراتىن.
ۇرلىحا ساعىنتايقىزى قاراعاندى وبلىسى, ۋليانوۆ اۋدانىنىڭ بارلىساي ەلدى مەكەنىندە دۇنيەگە كەلىپتى. سۆەردلوۆ كەڭشارىنىڭ ون جىلدىق مەكتەبىن ءبىتىرىپ, 1976 جىلى قاراعاندى مەديتسينا ۋچيليششەسىنىڭ فەلدشەر ماماندىعى بويىنشا ۇزدىك بىتىرەدى. دارىگەرلىك قىزمەتىن قارقارالى اۋدانىنا قاراستى ق.امانجولوۆ اتىنداعى كەڭشاردىڭ اقباي-قىزىلباي بولىمشەسىندە فاپ مەڭگەرۋشىسى بولىپ باستاعان. دارىگەرلىك قىزمەتىندە ءوزىن بىلىكتى دە ءبىلىمدى مامان, بىلگىر دارىگەر رەتىندە كورسەتە ءبىلدى.
1989-1994 جىلدارى قاراعاندى وبلىسى, تالدى اۋدانى, جەرگىلىكتى اۋداندىق فرۋنزە سەلولىق كەڭەسىنىڭ دەپۋتاتى بولىپ سايلانعان. بىلىكتى ءدارىگەردىڭ ءىس-تاجىريبەسى اۋداندىق, وبلىستىق سەمينارلاردا تالاي مارتە ناسيحاتتالدى. ابىرويلى ەڭبەگى ەلەنىپ اۋداندىق, وبلىستىق دەنساۋلىق ساقتاۋ باسقارمالارىنىڭ قۇرمەت گراموتالارىمەن بىرنەشە رەت ماراپاتتالعان. ياعني, ونىڭ ەتكەن ەڭبەگى ەسكەرۋسىز قالعان جوق.
بۇگىندە زەينەتكەرلىك جاستا بولسا دا ەڭبەكتەن قول ۇزبەي كەلەدى. ءوز اۋىلىنىڭ اكۋشەر, پەدياترى ءارى تەراپەۆتى, كوپتەگەن ءسابيلەردىڭ كىندىك شەشەسى. وتاعاسى, اۋىل شارۋاشىلىعى سالاسىنىڭ بىلگىرى جۇماحان ەكەۋى ۇل-قىزدارىن تاربيەلەپ ءوسىرىپ, نەمەرە-جيەندەردىڭ قىزىعىن كورىپ كەلەدى. عاسىر جاساعان انالارىن باعىپ-قاعىپ, ماڭگىلىك مەكەنىنە قوندىرىپ, قاراشاڭىراقتىڭ ۇيىتقىسى بولىپ وتىر. ويىمدى قورىتىندىلاي كەلە, ەل ريزاشىلىعىنا بولەنگەن اعا بۋىن دارىگەرلەردىڭ ەڭبەگىن, بۇگىنگى ءبىلىمدى جاس دارىگەر ماماندار جالعاستىرسا, اۋىلىمىزدىڭ دامىپ كوركەيۋىنە, رۋحاني جاڭعىرۋىنا قوسقان زور ۇلەس بولار ەدى دەمەكپىن. تۇرسىن ءجۇنىسوۆ, تەحنيكا عىلىمدارىنىڭ كانديداتى, دوتسەنت