ورتالىق ماماندارى وتباسى قۇندىلىقتارىن العا تارتا وتىرىپ, اجىراسۋ كەزەڭىندە ءارى-ءسارى جۇرگەن ەرلى-زايىپتىلارعا مورالدىق جانە پسيحولوگيالىق كومەك كورسەتۋدى كوزدەيدى. ولاردىڭ اراسىنداعى ءارتۇرلى ءتۇسىنىسپەۋشىلىك پەن كەلىسپەۋشىلىكتەردى ەڭسەرۋدى, قاجەتتى كومەك كورسەتۋدى مۇرات تۇتادى. اقتوبە قالالىق سوتىنىڭ سۋدياسى ايگۇل ابدۋللينانىڭ ايتۋىنشا, بۇل ورتالىق نەكە بۇزۋ ۇدەرىستەرىنىڭ تومەندەۋىنە, ەڭ باستىسى وتباسىنىڭ ساقتالۋىنا ءتيىستى ىقپالىن تيگىزبەك.
كامەلەتتىك جاسقا تولماعان بالالاردىڭ قۇقىعىن قورعاۋ مەن ولاردىڭ تولىق وتباسىندا تاربيەلەنۋى ءۇشىن باعىت-باعدار بەرۋ ءىسى دە ورتالىق قىزمەتكەرلەرىنىڭ ەنشىسىنە ءتيىپ وتىر. مۇنداي ورتالىقتىڭ قاجەتتىلىگى تومەندەگى دەرەكتەردەن ايقىن كورىنەدى. ايتالىق, 2018 جىلدىڭ 4 ايىندا اقتوبە قالاسى بويىنشا نەكەنى بۇزۋ مەن اجىراسۋ ءۇشىن سوتقا 1002 تالاپ ارىز تۇسسە, بۇل سان بيىل وسى كەزەڭدە 1264-كە وسكەن. ونىڭ بىرقاتارىنا ءتيىستى شەشىم شىعارىلسا, ءبىرازى ەكى تاراپتىڭ تاتۋلاسۋىنا بايلانىستى توقتاتىلعان. ءبىر جاقسىسى, وڭ قادامعا بارعاندار قاتارى وتكەن جىلمەن سالىستىرعاندا ەكى ەسە كوپ.
ايتسە دە وبلىس ورتالىعىندا اجىراسۋ كورىنىستەرى كوبەيىپ وتىرعانى قىنجىلتپاي قويمايدى. وسىنداي جاعدايدا وتباسىن ساقتاۋ ورتالىعى كەلەڭسىز كورىنىستى بولدىرماۋ مەن ەرلى-زايىپتىلاردىڭ باسىن قايتادان قوسۋ باعىتىندا ەلەۋلى ءرول اتقارارى انىق.