قيىرداعى قانداستارىمىز قازاق ءتىلىن قانشالىقتى بىلەدى؟ وزگە ەلدە ءومىر ءسۇرىپ جاتقان اعايىننىڭ انا تىلىمىزگە دەگەن قۇرمەتى قانداي دارەجەدە؟ اتىراۋدا وتكەن «قازاقستان – اتا جۇرتىم, قاسيەتىم – انا ءتىلىم» اتتى قازاق ءتىلى مەن ادەبيەتىنەن حالىقارالىق وليمپيادا قورىتىندىسى جاقسى كورسەتكىشتەرمەن كوڭىل قۋانتتى. قىتاي, موڭعوليا, رەسەي, قىرعىزستان, يران, وزبەكستان مەملەكەتتەرىنەن كەلگەن قازاق بالالارى اتىراۋدا ءتورت كۇن بويى بىلىكتىلىكتەرىن سىنعا سالدى.
– قازاق دياسپوراسى وكىلدەرىنىڭ باسقا ەلدەردە تۇرسا دا, انا تىلدەرىن جەتىك مەڭگەرگەندەرى, ءوز تىلدەرىندە سويلەپ, بىلىمدەرىن جەتىلدىرەتىندەرى انىق كورىندى, –دەدى وليمپيادا جۇلدەگەرلەرىن ماراپاتتاۋ سالتاناتىندا وبلىس اكىمىنىڭ ءبىرىنشى ورىنباسارى سەرىك شاپكەنوۆ. – حالىق دانالىعىندا ايتىلعانداي, ءوز ءتىلىن ۇمىتقان ۇلت تامىرىن جوعالتادى. ۇلتتىق قۇندىلىقتاردى بويلارىنا سىڭىرگەن وسىنداي بالالار باردا قازاق ءتىلىنىڭ بولاشاعى دا باياندى.
حالىقارالىق وليمپيادا قورىتىندىسى بويىنشا, بەس قاتىسۋشى التىن مەدال, 8 قاتىسۋشى كۇمىس, 15 قاتىسۋشى قولا مەدال يەلەندى.
وبلىستىق ءبىلىم بەرۋ باسقارماسى باسشىسىنىڭ ءمىندەتىن اتقارۋشى جانسۇلۋ تورەمۇراتوۆا وليمپيادا ءجۇلدەگەرلەرىنە ەلىمىزدەگى بەس ۋنيۆەرسيتەتتە تەگىن وقۋ گرانتى بەرىلگەنىن ايتادى. ءبىلىم دوداسىنا قاتىسقان 62 وقۋشىنىڭ ەشقايسىسى اتاۋسىز قالمادى. «دارىن» رەسپۋبليكالىق عىلىمي-ءتاجىريبەلىك ورتالىعى ءداستۇرلى تۇردە ۇيىمداستىراتىن ءبىلىم جارىسىنا وسى جولى اتىراۋ وبلىسى اكىمدىگى قولداۋ كورسەتتى. اتاجۇرتتان الىستا ءجۇرگەن قازاق بالالارىن ىنتالاندىرۋعا باعىتتالعان شارا بيىل 16-شى رەت ءوتىپ وتىر. ۇيىمداستىرۋشىلار ونەر-ءبىلىم بايگەسىندە, اسىرەسە وزبەكستاننان كەلگەن وقۋشىلاردىڭ جاقسى ناتيجە كورسەتىپ, ماراپاتتاردىڭ باسىم ءبولىگىن جەڭىپ العاندارىن ايتتى.