ءباسپاسوز ءماسليحاتىندا كاسىپكەرلەر پالاتاسى ديرەكتورىنىڭ اگروونەركاسىپتىك كەشەن ماسەلەلەرى بويىنشا ورىنباسارى پىرمۇحاممەد سىزدىقوۆ: «بۇگىنگى ءباسپاسوز ءماسليحاتىن وتكىزۋگە سەبەپ بولىپ وتىرعان جاعداي جاقىندا عانا الەۋمەتتىك جەلىدە «بايدالا» مەكەمەسىنىڭ كۇرىشىنە قاتىستى جاريالانعان جالعان بەينەجازبا. ناقتى زەردەلەۋ جۇمىستارى جۇرگىزىلمەي تاراتىلعان اقپاراتتىڭ سالدارىنان كاسىپكەر شىعىنعا ۇشىراپ وتىر. كاسىپكەر پالاتاعا كەلىپ بىزدەن كومەك سۇرادى. قازىر زاڭگەرلەرىمىز قۇقىقتىق قولداۋ كورسەتۋدە», - دەدى.
«بايدالا» جشس ديرەكتورىنىڭ ورىنباسارى ازامات بايداليەۆ كومپانيانىڭ بۇگىندە وبلىسقا قاراستى شيەلى, سىرداريا, جالاعاش اۋداندارىندا كۇرىش ەگىپ, ونى ءوز زاۋىتتارىندا اقتايتىندىقتارىن جەتكىزدى. بۇگىندە «بايدالانىڭ» زاۋىتىندا تۇراقتى 80 ادام جۇمىس جاساسا, ەگىندىكتەردە ماۋسىمدىق جۇمىستارعا 2000-عا جۋىق ادام تارتىلعان. ونىمدەرىن تاجىكستان, ۋكراينا, روسسيا, وزبەكستان, قىرعىزستان جانە وزگە دە ەلدەرگە ەكسپورتقا شىعارۋدا.
«الەۋمەتتىك جەلىدە تارالعان جالعان اقپارات ءبىزدىڭ كومپانيا بەدەلىنە نۇقسان كەلتىرىپ تۇر. مۇنداي بەينەماتەريالدى تاراتۋ كىمگە ءتيىمدى ەكەندىگىن بىلمەيمىن. قازىر تاراتۋشىنى انىقتاۋ جونىندە ىشكى ىستەر ورگاندارىنا شاعىمىمىزدى قالدىردىق. جالعان اقپارات تاراتۋشى انىقتالعان جاعدايدا ءارى قاراي سوتقا بەرەتىن بولامىز», - دەدى.
ءباسپاسوز ءماسليحاتىنىڭ قورىتىندىسىمەن كاسىپكەرلەر پالاتاسى ديرەكتورىنىڭ ورىنباسارى پىرمۇحاممەد سىزدىقوۆ پالاتا تاراپىنان كاسىپكەرگە جان-جاقتى قولداۋ, كومەك كورسەتىلەتىندىگىن جەتكىزدى.