ولجاس قىلدىباەۆ ديريجەر تاياقشاسىن سىلتەپ قالعاندا, مىڭ دومبىرا شاناعىنان قۇرمانعازىنىڭ «بالبىراۋىنى» توگىلە جونەلدى. ارقانىڭ كەشكى ماي توڭعىسىز سامالى ەركە كۇيدى الىسقا الىپ كەتىپ جاتقانداي. كوككە ءىلىنىپ تۇرىپ, قۇيقىلجىتا سايرايتىن بوزتورعاي دا مىڭ دومبىراعا كەزەك بەرگەندەي, ۇلى دالا تىنىپ, كۇيگە ۇيىپ قالىپتى. دومبىراشىلار كۇيدىڭ ىرعاقتى جەرىندە سامال جەلپىگەن ەگىندەي تەربەلىپ كەتەدى. ديريجەردىڭ سيقىرلى تاياقشاسى مىڭ دومبىرانىڭ يەسىن دە, ءۇنىن دە باعىندىرىپ, ەرىكسىز بايلاپ العانداي, دومبىراشىلاردىڭ ساۋساقتارى پەرنەدە بىردەي ءجۇگىرىپ, شاناقتى بىردەي قاعادى. «بالبىراۋىن» مەن ويناقى حالىق كۇيى «كەلىنشەكتى» ويناعان مىڭ دومبىرانىڭ ۇنىنە دە, سانىنە دە ەلتىپ قالعان كورەرمەن كەشكى تىمىق اۋانى جارىپ, شاپالاقتى دا ايامادى.
وتكەن جىلى ۇلتتىق دومبىرا كۇنى مەرەكەسى بەلگىلەنگەندە اۋداندىق حالىق اسپاپتار وركەسترى كونتسەرت قويعان ەدى. سول كونتسەرتتى تىڭداعان اۋدان اكىمى ءامىرحان اسانوۆ: «امانگەلدى اۋدانىندا تورىنە دومبىرا ءىلمەگەن ءۇي جوق شىعار. قۇرمانعازىنىڭ ءبىر كۇيىن ءبىر مەزگىلدە تارتاتىن 500 دومبىراشى قالايشا شىقپاس ەكەن؟ سونى جاساپ كورسەك قايتەدى؟» دەپ باستاما كوتەرگەن ەدى. باسشىنى قوستاۋشى از بولعان جوق, سونىمەن قازان ايىندا ءىس قولعا الىندى. نەگىزگى كۇش اۋدانداعى 11 اۋىلدىق وكرۋگتەگى كلۋبتار مەن مەكتەپتەردىڭ مۋزىكا ماماندارىنا ءتۇستى. مەكتەپتەردەگى دومبىرا ۇيىرمەلەرى بۇرىنعىدان دا بەلسەندى جۇمىس ىستەدى, وقۋشىلارمەن قاتار مۇعالىمدەر دە دومبىرا ۇيرەنە باستادى. جاستار بىلاي تۇرسىن, اۋىلدىڭ ۇلكەندەرى دە كلۋبقا كۇي ءۇيرەنۋگە كەلەتىن بولدى. مىنە, التى اي بويى وسىنداي ىجداعاتتى دايىندىقتان كەيىن مامىر ايىنداعى قىزعالداق فەستيۆالىندە 500 دومبىراشى كۇي تارتقان ەدى. ودان تۋرا ءبىر ايدان كەيىن مىڭ دومبىراشى ساحناعا قايتا شىقتى. اۋداندا ون جەتى مىڭداي تۇرعىن بولسا دا, مىڭ دومبىراشىنى جيناۋ وڭاي شارۋا ەمەس. ويتكەنى دومبىرا ۇستاعاننىڭ ءبارى كۇيشى ەمەس عوي. سوندىقتان 90 جاسقا اياق باسقان عالىمجان ءجۇنىسوۆ اقساقال دا سوناۋ جاس كەزىندە ويناعان «بالبىراۋىندى» ەسىنە ءتۇسىرىپ, دومبىراشىلار قاتارىنا وتىردى. ال مىڭ دومبىراشىنىڭ قاتارىنداعى ەڭ جاس كۇيشى 10 جاستاعى ارسەن مۇراتوۆ بولدى.
– التى اي بويى دومبىراشىلارعا كۇي ۇيرەتتىك. ءتىپتى «بالبىراۋىندى» جاتتاپ الدى. دومبىراشىلار اراسىندا كىم جوق دەيسىز, وقۋشىلار, ستۋدەنتتەر, مۇعالىمدەر, مەكەمەلەر باسشىلارى, شارۋاشىلىقتاعى ماماندار كۇيشى بولىپ شىعا كەلدى. ۇيىمداستىرۋ جۇمىسى جەڭىل ەمەس, بىراق قىزىق بولدى, – دەيدى ديريجەر ولجاس قىلدىباەۆ.دومبىراشىلاردىڭ قاتارىنا باتپاققارا توپىراعىنان تۇلەپ ۇشقان, بۇگىندە ەسىمى ەلگە بەلگىلى ونەرپازدار دومبىراشى انار مۇزداحانوۆا, شولپان قورعانبەكوۆا, قايىرجان شاياحمەتوۆتەر وتىرىپ, مىڭدى تولىقتىرا ءتۇستى.
اۋداندا تويلانعان ۇلتتىق دومبىرا كۇنى مەن ەلوردا كۇنى مەرەكەلەرى اياسىندا بەلگىلى مادەنيەت مايتالمانى, وبلىستاعى كوركەمونەرپازدار ۇجىمدارىنىڭ دامۋىنا ۇلكەن ۇلەس قوسقان توكەن ەلتەباەۆتى ەسكە الۋعا ارنالعان عىلىمي-پراكتيكالىق كونفەرەنتسيا ءوتتى. «ۇرپاقتار ساباقتاستىعى» اتتى ۇلت اسپاپتارى انسامبلدەرىنىڭ بايقاۋى دا ونىڭ ەسىمىن ۇلىقتاۋعا ارنالدى. جۇرتشىلىق نۇر-سۇلتان, قوستاناي, ارقالىق قالالارى مەن التىنسارين, امانگەلدى اۋداندارىنان قاتىسقان ونەر ۇجىمدارىنىڭ ونەرىن تاماشالادى. باس جۇلدەنى نۇر-سۇلتان قالاسىنان كەلگەن «قورقىت» ءانسامبلى, ءبىرىنشى ورىندى ارقالىق قالاسىنىڭ «مۇراگەر», ەكىنشى ورىندى نۇر-سۇلتان شاھارىنان «تارلان», ءۇشىنشى ورىندى التىنسارين اۋدانىنىڭ «مۇراگەر» ءانسامبلى الدى. دارحان سۇلتانبەكوۆ, عازيزا جۇمەكەنوۆا, الما ادالحانوۆا, اقجاناي قاليەۆالار ورىنداعان ءان مەن كۇي رۋحانياتقا سۋساپ وتىراتىن اۋىلداعى اعايىننىڭ قۇلاق قۇرىشىن قاندىردى.
«ەل ءىشى – ونەر كەنىشى». امانگەلدىدەگى اعايىندار «مىڭ دومبىرا شىققان جەردە تاعى مىڭ جوق دەيسىڭ بە؟» دەگەن توق كوڭىلمەن تاراستى.