بۇگىنگى كەشتە ءبىز دومبىرا تارتپادىق. كورەرمەندەرمەن بىرگە مەملەكەت باسشىسىنىڭ قاسىندا وتىرىپ, ورىنداۋشىلاردىڭ ونەرىن سىرتتاي تاماشالادىق. بىلتىر دومبىرا كۇنىن العاش تويلاعاندا ەلىمىزدىڭ تۇكپىر-تۇكپىرىنەن بارلىق كاسىبي دومبىراشىلار كەلىپ, جاپپاي اتسالىسقان بولاتىنبىز. تەك ەلوردا ءتورىنىڭ وزىندە 2000 دومبىراشى ءبىر مەزەتتە «كوڭىلاشارمەن» كۇيدەن شاشۋ شاشقاندا شاتتانباعان قازاق قالماعان شىعار. ۇلتىمىزدىڭ رۋحى كوتەرىلگەندەي ءبىر جاساپ, سەرپىلىپ قالىپ ەدىك سوندا. بيىلعى دومبىرا دۋمانىنىڭ ەرەكشەلىگى دە سول – وسى جولى تەك كاسىبي دومبىراشىلار عانا ەمەس, اۋەسقوي ورىنداۋشىلار دا ونەر كورسەتتى. سوندىقتان دا مەن ءۇشىن بۇگىنگى مەرەكە ءتىپتى قىزىق بولدى. ەلباسىمىزدىڭ سارابدال شەشىمىنىڭ ارقاسىندا بەكىتىلگەن جالپىۇلتتىق دومبىرا دۋمانى – كۇللى قازاقتىڭ رۋحىن كوتەرىپ, بىرلىگىن نىعايتاتىن ۇلىق مەيرام دەسەم, ارتىق ايتقاندىق ەمەس. ەندەشە, رۋحىمىز اسقاقتاپ, ىنتىماعىمىز جاراسا بەرسىن!
ايگۇل ۇلكەنباەۆا,
قازاقستاننىڭ ەڭبەك سىڭىرگەن ءارتىسى, كۇيشى