تالداۋ قورىتىندىسى بويىنشا ەڭبەك ينسپەكتسيالارىنىڭ ۆەدومستۆولىق ءالسىز باقىلاۋى, مەملەكەتتىك كورپوراتسيانىڭ فيليالدارى مەن مەملەكەتتىك الەۋمەتتىك ساقتاندىرۋ قورىنىڭ الەۋمەتتىك جانە زەينەتاقى تولەمدەرىن تاعايىنداۋ جانە اۋدارۋ ماسەلەلەرى بويىنشا باقىلاۋىنىڭ بولماۋى, مەديتسينالىق-الەۋمەتتىك ساراپتاما جۇرگىزۋ كەزىندەگى مۇددەلەر قاقتىعىسى جانە تاعى باسقا دا جۇيەلى پروبلەمالار انىقتالدى. سونىمەن قاتار ناتيجەلى جۇمىسپەن قامتۋدىڭ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسىن ىسكە اسىرۋ كەزىندە ەڭبەك نارىعىنىڭ قاجەتتىلىگىن ساپاسىز بولجاۋ جانە قىسقا مەرزىمدى كاسىپتىك وقىتۋعا, جاستار تاجىريبەسىنە, الەۋمەتتىك جۇمىس ورىندارىنا زاڭسىز ورنالاستىرۋدى دەر كەزىندە انىقتاۋ جانە بولدىرماۋ تەتىكتەرىنىڭ جوقتىعى بەلگىلى بولدى.
جيىندا ولجاس بەكتەنوۆ: «مينيسترلىككە, كوميتەتكە جانە جەرگىلىكتى اتقارۋشى ورگاندارعا حالىقتى الەۋمەتتىك قورعاۋدى قامتاماسىز ەتۋ بويىنشا ۇلكەن مەملەكەتتىك مىندەتتەر سەنىپ تاپسىرىلدى. مەنىڭ ويىمشا, بۇل جەردە ۇلكەن جۇرەكتى جانە لايىقتى ادامدار جۇمىس ىستەۋى ءتيىس», دەدى.
ۇجىمعا پروفيلاكتيكالىق اسەردى كۇشەيتۋ ءۇشىن الەۋمەتتىك قورعاۋ جانە حالىقتى جۇمىسپەن قامتۋ سالاسىنداعى سىبايلاس جەمقورلىق قۇقىق بۇزۋشىلىقتار بويىنشا قىلمىستىق جاۋاپكەرشىلىككە تارتىلعان ادامدار تۋرالى بەينەروليك كورسەتىلدى. باسقوسۋدا و.بەكتەنوۆ اتاۋلى الەۋمەتتىك كومەكتى نەگىزسىز تولەۋدى انىقتاۋ بويىنشا جۇمىستار جۇرگىزىلىپ جاتقانىن اتاپ ءوتتى. «ەگەمەن-اقپارات»