تابيعي گاز تۇتىنۋعا ەندى ايماقتىڭ شەتكەرى اۋماعىنىڭ ءبىرى ۇيعىر اۋدانى تۇرعىندارى دا قول جەتكىزدى. جاقىندا شونجى اۋىلىندا اۋداندى كوگىلدىر وتىنمەن قامتاماسىز ەتەتىن گاز تاراتۋ قوندىرعىسىنىڭ اشىلۋى ءوتتى. ورتالىقتاندىرىلعان جاڭا گاز قۇبىرىمەن العاشقى تابيعي كوگىلدىر وتىندى جىبەرۋ سالتاناتىنا ارنايى كەلگەن وبلىس اكىمى اماندىق باتالوۆ قۋانىشتى ساتكە كۋا بولعان بارشا اۋدان تۇرعىندارىن قۇتتىقتادى.
– جەتىسۋ وڭىرىندە, ونىڭ ءىشىندە تالدىقورعان ايماعىندا تابيعي گاز تۇتىنۋ – بۇرىن-سوڭدى بولماعان جاعداي. ءبىز مەملەكەتتىڭ قولداۋى ارقاسىندا قازىر وبلىستاعى ءار ءۇيدىڭ كوگىلدىر وتىنعا قوسىلۋىنا جۇمىس ىستەپ جاتىرمىز. الىس اۋدانداردان العاشقى بولىپ قارادالى ءوڭىرى گاز جەلىسىنە قوسىلدى. ەندىگى باعىت – كەگەن مەن رايىمبەك اۋداندارى. وسى ماقساتتان اينىماي, تالدىقورعانعا جەتكەن گاز جەلىسىن اقسۋ, سارقان, الاكول اۋداندارىنا دەيىن تارتۋدى جالعاستىرامىز. بۇعان مۇمكىندىك بار, – دەگەن وبلىس اكىمى اماندىق باتالوۆ ەلىمىزدى گازداندىرۋعا قاتىستى ەلباسى جۇكتەگەن مىندەتتىڭ ورىندالىپ جاتقانىن ايتتى.
شونجى اۋىلىنداعى گاز تاراتۋ ستانساسىنىڭ قۇرىلىسى ءالى تولىق اياقتالعان جوق. وعان «شارىن» اۆتوماتتاندىرىلعان گاز تاراتۋ ستانساسى, شونجى اۋىلىنا دەيىنگى 9,5 شاقىرىمدىق جوعارى قىسىمدى گاز قۇبىرى جانە 46 شاقىرىمدىق ورتاشا قىسىمدى گاز تاراتۋ جۇيەسىنىڭ قۇرىلىسى كىرەدى. قازىرگى تاڭدا اۋىلىشىلىك جۇيەلەردىڭ قۇرىلىس-مونتاجداۋ جۇمىستارىنىڭ II كەزەڭىنىڭ قۇرىلىسى جۇرگىزىلۋدە. جۇمىستاردى 2019-2020 جىلداردىڭ جىلىتۋ ماۋسىمىنىڭ باستالۋىنا دەيىن اياقتاۋ جوسپارلانۋدا.
العاشقى كەزەڭدى ىسكە قوسۋ بارىسىندا-اق اۋىلداعى 42 ابونومەنت كوگىلدىر وتىنعا ءبىر كۇندە قوسىلعان, 150 ءۇيدىڭ ءوتىنىشى كەزەكتە تۇر. بۇل وڭىردەگى كوگىلدىر وتىنعا دەگەن سۇرانىستىڭ جوعارى ەكەنىن كورسەتەدى. جالپى, ءبىر عانا شونجى اۋىلى بويىنشا 5 ابونومەنت گاز جەلىسىنە قوسىلۋعا دايىن وتىر ەكەن.